കൊച്ചിയിൽ കാറിനുള്ളിൽ രഹസ്യ അറയുണ്ടാക്കി എംഡിഎംഎ കടത്ത് രണ്ട് യുവാക്കൾ പിടിയിൽ
കൊച്ചി നെടുമ്പാശ്ശേരിയിൽ 24 ഗ്രാം എംഡിഎംഎയുമായി രണ്ട് യുവാക്കൾ പിടിയിൽ. ബംഗളൂരുവിൽ നിന്ന് കാറിന്റെ ഡാഷ്ബോർഡിനുള്ളിൽ ഒളിപ്പിച്ചു കടത്തുകയായിരുന്ന രാസലഹരിയാണ് പോലീസ് പിടികൂടിയത്
Angel Varghese 
കാറിൽ പ്രത്യേക അറയുണ്ടാക്കി എംഡിഎംഎ കടത്ത്: കൊച്ചിയിൽ രണ്ട് യുവാക്കൾ പിടിയിൽ
നെടുമ്പാശ്ശേരി: എറണാകുളം റൂറൽ പരിധിയിൽ ലഹരിമാഫിയക്കെതിരെ നടക്കുന്ന 'ഓപ്പറേഷൻ തൂഫാൻ' (Operation Toofan) പരിശോധനയുടെ ഭാഗമായി 24 ഗ്രാം എംഡിഎംഎയുമായി (MDMA) രണ്ട് യുവാക്കൾ പോലീസിന്റെ പിടിയിലായി. മട്ടാഞ്ചേരി ഇരവേലി മംഗലത്ത് പറമ്പ് സ്വദേശി റിസ്വാൻ (23), സൗത്ത് ചെല്ലാനം ചിത്തിര ഡെയ്ലിൽ വിക്ടർ ജോസ് (36) എന്നിവരെയാണ് റൂറൽ ജില്ലാ ഡാൻസാഫ് (DANSAF) ടീമും നെടുമ്പാശ്ശേരി പോലീസും ചേർന്ന് പിടികൂടിയത്.
ബംഗളൂരുവിൽ നിന്നും കാറിൽ കടത്തുകയായിരുന്ന രാസലഹരി അത്താണി ഭാഗത്ത് വെച്ചാണ് അന്വേഷണസംഘം കസ്റ്റഡിയിലെടുത്തത്. വാഹനത്തിന്റെ ഡാഷ്ബോർഡിന് താഴെ പ്രത്യേകമായി നിർമ്മിച്ച രഹസ്യ അറയിൽ ഒളിപ്പിച്ച നിലയിലായിരുന്നു മയക്കുമരുന്ന്. കൊച്ചിയിലെ ഐടി മേഖല കേന്ദ്രീകരിച്ചായിരുന്നു ഇവർ ലഹരി വിൽപ്പന നടത്തിയിരുന്നതെന്ന് പോലീസ് വ്യക്തമാക്കി.
ജില്ലാ പോലീസ് മേധാവി കെ. എസ്. സുദർശന്റെ നേതൃത്വത്തിലുള്ള ഡാൻസാഫ് ടീം, ഡിവൈഎസ്പിമാരായ ജെ. ഉമേഷ് കുമാർ, എൻ. ബാബുക്കുട്ടൻ, നെടുമ്പാശ്ശേരി ഇൻസ്പെക്ടർ ബി. കെ. അരുൺ, സബ് ഇൻസ്പെക്ടർ അരുൺ ദേവ് എന്നിവരടങ്ങിയ സംഘമാണ് പ്രതികളെ വലയിലാക്കിയത്. പ്രദേശത്തെ ലഹരി ശൃംഖലകളെക്കുറിച്ച് കൂടുതൽ അന്വേഷണം നടത്തിവരികയാണെന്ന് പോലീസ് അറിയിച്ചു.
