കെഎസ്ഇബി ഓഫിസുകളിൽ ജനരോഷം അർധരാത്രി ഉപരോധം പലയിടത്തും സംഘർഷാവസ്ഥ
സംസ്ഥാനത്ത് കനത്ത ചൂടിനിടെ വൈദ്യുതി മുടങ്ങുന്നതിൽ പ്രതിഷേധിച്ച് തൃശൂരിലും കോഴിക്കോട്ടും കെഎസ്ഇബി ഓഫിസുകൾ നാട്ടുകാർ ഉപരോധിച്ചു. ജീവനക്കാർ പോലീസ് സുരക്ഷ തേടി.
Angel Varghese 
സംസ്ഥാനത്ത് പവർ കട്ട് സമാനമായ സാഹചര്യം; കെഎസ്ഇബി ഓഫിസുകളിൽ അർധരാത്രി ജനരോഷം, ഉദ്യോഗസ്ഥരെ തടഞ്ഞു
തൃശൂർ/കോഴിക്കോട്: കഠിനമായ ചൂടിനിടെ തുടർച്ചയായുണ്ടാകുന്ന അപ്രഖ്യാപിത വൈദ്യുതി തടസ്സത്തിൽ സംസ്ഥാനത്തിന്റെ വിവിധ ഭാഗങ്ങളിൽ കെഎസ്ഇബി ഓഫിസുകൾക്ക് നേരെ ജനരോഷം. തൃശൂർ എരുമപ്പെട്ടി, കോഴിക്കോട് പന്നിയങ്കര, നാദാപുരം എന്നിവിടങ്ങളിൽ ജനങ്ങളും രാഷ്ട്രീയ പ്രവർത്തകരും അർധരാത്രി ഓഫിസുകൾ ഉപരോധിച്ചു.
എരുമപ്പെട്ടിയിൽ ഉപരോധം പുലർച്ചെ വരെ
തിങ്കളാഴ്ച രാത്രി തൃശൂർ എരുമപ്പെട്ടി ഡിവിഷൻ ഓഫിസിൽ നൂറിലേറെ നാട്ടുകാരാണ് പ്രതിഷേധവുമായെത്തിയത്. രാത്രി 11 മണിക്ക് തുടങ്ങിയ പ്രതിഷേധം പുലർച്ചെ രണ്ടര വരെ നീണ്ടു. എരുമപ്പെട്ടി, കടങ്ങോട്, വരവൂർ പഞ്ചായത്തുകളിൽ പലതവണ വൈദ്യുതി മുടങ്ങിയതും ഓഫിസിൽ ഫോൺ വിളിച്ചിട്ട് എടുക്കാത്തതുമാണ് ജനങ്ങളെ പ്രകോപിപ്പിച്ചത്. ചിലർ ഓഫിസിനുള്ളിൽ പായ വിരിച്ച് കിടന്നു പ്രതിഷേധിച്ചു. ഒടുവിൽ അസിസ്റ്റന്റ് എക്സിക്യൂട്ടീവ് എൻജിനീയർ എത്തി പ്രശ്നപരിഹാരം ഉറപ്പുനൽകിയ ശേഷമാണ് നാട്ടുകാർ പിരിഞ്ഞുപോയത്.
കോഴിക്കോടും നാദാപുരത്തും പ്രതിഷേധം
കോഴിക്കോട് പന്നിയങ്കര കെഎസ്ഇബി ഓഫിസിൽ യൂത്ത് ലീഗ് പ്രവർത്തകർ പുലർച്ചെ രണ്ട് മണിയോടെ പ്രതിഷേധവുമായെത്തി. നാദാപുരം സബ്സ്റ്റേഷനിൽ മെഴുകുതിരി കത്തിച്ചായിരുന്നു പ്രതിഷേധം.
സുരക്ഷ തേടി ജീവനക്കാർ
വൈദ്യുതി മുടങ്ങുന്നതിൽ ക്ഷുഭിതരായ ജനങ്ങൾ ഓഫിസിലെത്തി ജീവനക്കാരെ അസഭ്യം പറയുന്നതായും കയ്യേറ്റം ചെയ്യുന്നതായും പരാതിയുണ്ട്. ആലുവ വെസ്റ്റ് സെക്ഷനിലെ ജീവനക്കാർ തങ്ങൾക്ക് രാത്രികാലങ്ങളിൽ പോലീസ് സുരക്ഷ വേണമെന്നാവശ്യപ്പെട്ട് പോലീസിനെ സമീപിച്ചു.
ചൂട് വർധിച്ചതോടെ വൈദ്യുതി ഉപഭോഗം റെക്കോർഡ് നിലയിലെത്തിയതാണ് പ്രതിസന്ധിക്ക് കാരണം. ഫീഡറുകളിൽ ലോഡ് കൂടുന്നത് മൂലം ലൈനുകൾ താനേ ട്രിപ്പ് ആകുന്നതും 33 കെവി ലൈനുകളിലെ സാങ്കേതിക തകരാറുകളുമാണ് വൈദ്യുതി തടസ്സത്തിന് കാരണമായി കെഎസ്ഇബി ചൂണ്ടിക്കാണിക്കുന്നത്
