ഗുരുതിക്കളത്ത് പാറക്കൂട്ടങ്ങൾ ഇളകി വീഴാൻ സാധ്യത ഹൈറേഞ്ച് റോഡിൽ വലിയ അപകടഭീഷണി
തൊടുപുഴ പുളിയൻമല സംസ്ഥാന പാതയിലെ ഗുരുതിക്കളം ഒന്നാം വളവിന് സമീപം പാറക്കൂട്ടങ്ങൾ ഇളകി വീഴാൻ സാധ്യത. ഗതാഗത തടസ്സത്തിനും വീടുകൾക്കും ഭീഷണിയായ പാറകൾ നീക്കം ചെയ്യണമെന്ന് ആവശ്യം.
അനില എം കൃഷ്ണൻ 
ഗുരുതിക്കളത്ത് പാറക്കൂട്ടങ്ങൾ ഇളകി വീഴാൻ സാധ്യത: ഹൈറേഞ്ച് റോഡിൽ വലിയ അപകടഭീഷണി
ഇടുക്കി: തൊടുപുഴ - പുളിയൻമല സംസ്ഥാന പാതയിൽ ഗുരുതിക്കളം ഒന്നാം വളവിന് സമീപം അപകടഭീഷണിയായി വലിയ പാറക്കൂട്ടങ്ങൾ. ഏതുസമയവും റോഡിലേക്ക് പതിക്കാവുന്ന നിലയിലുള്ള ഈ പാറകൾ യാത്രക്കാരുടെ ജീവനും പ്രദേശത്തെ വീടുകൾക്കും വലിയ വെല്ലുവിളിയാണ് ഉയർത്തുന്നത്.
പാറക്കൂട്ടങ്ങൾക്കിടയിലെ മണ്ണ് മഴയിൽ ഒലിച്ചുപോയതോടെയാണ് ഇവ ഇളകിയ നിലയിലായത്. ഈ ഭാഗത്ത് പാറകൾ താഴേക്ക് പതിച്ചാൽ ഹൈറേഞ്ചിലേക്കുള്ള പ്രധാന ഗതാഗത സംവിധാനം പൂർണ്ണമായും തടസ്സപ്പെടും. കൂടാതെ, റോഡിന് താഴെ താമസിക്കുന്ന കുടുംബങ്ങളും വലിയ ഭീതിയിലാണ്. ദിനംപ്രതി നൂറുകണക്കിന് വാഹനങ്ങൾ കടന്നുപോകുന്ന ഇടുക്കി റൂട്ടിലെ ഈ പ്രധാന പാതയിൽ വലിയൊരു ദുരന്തത്തിന് മുൻപ് അധികൃതർ ഇടപെടണമെന്നാണ് നാട്ടുകാരുടെ ആവശ്യം.
പൊതുപ്രവർത്തകനായ മംഗലമുണ്ടയ്ക്കൽ രവി വില്ലേജ് അധികൃതർക്ക് നൽകിയ പരാതിയെത്തുടർന്ന് ഉദ്യോഗസ്ഥർ സ്ഥലം സന്ദർശിച്ച് അപകടസാധ്യത വിലയിരുത്തിയിട്ടുണ്ട്. ഭീഷണിയായ പാറക്കൂട്ടങ്ങൾ അടിയന്തരമായി പൊട്ടിച്ചുനീക്കി യാത്രക്കാരുടെയും പ്രദേശവാസികളുടെയും സുരക്ഷ ഉറപ്പാക്കണമെന്ന് നാട്ടുകാർ ആവശ്യപ്പെട്ടു.
