ഉപരാഷ്ട്രപതി നാളെ കോട്ടയത്ത് നഗരത്തിൽ ഉച്ചയ്ക്ക് 1 മുതൽ ഗതാഗത ക്രമീകരണം, ചരക്കുവാഹനങ്ങൾക്ക് വിലക്ക്
ഉപരാഷ്ട്രപതി ഡോ. സി.പി. രാധാകൃഷ്ണന്റെ കോട്ടയം സന്ദർശനത്തോടനുബന്ധിച്ച് നാളെ ഉച്ചയ്ക്ക് ഒന്നു മുതൽ നഗരത്തിൽ ഗതാഗതനിയന്ത്രണം ഏർപ്പെടുത്തിയതായി പൊലീസ് അറിയിച്ചു. ചരക്കുവാഹനങ്ങൾക്ക് രാവിലെ 11 മുതൽ വിലക്കുണ്ടാകും.
അനില എം കൃഷ്ണൻ 
ഉപരാഷ്ട്രപതിയുടെ സന്ദർശനം: കോട്ടയത്ത് നാളെ കർശന ഗതാഗതനിയന്ത്രണം
കോട്ടയം: ഉപരാഷ്ട്രപതി ഡോ. സി.പി. രാധാകൃഷ്ണന്റെ കോട്ടയം സന്ദർശനത്തോടനുബന്ധിച്ച് നാളെ (ഞായറാഴ്ച) നഗരത്തിൽ കർശന ഗതാഗതനിയന്ത്രണം ഏർപ്പെടുത്തിയതായി ജില്ലാ പൊലീസ് മേധാവി അറിയിച്ചു. നാളെ ഉച്ചയ്ക്ക് ഒന്നു മുതൽ ഉപരാഷ്ട്രപതിയുടെ സന്ദർശനം അവസാനിക്കുന്നത് വരെയാണ് നഗരത്തിൽ നിയന്ത്രണം. വലിയ ചരക്കുവാഹനങ്ങൾക്ക് നാളെ രാവിലെ 11 മണി മുതൽ നഗരത്തിലേക്ക് പ്രവേശനമുണ്ടായിരിക്കില്ല.
യാത്രക്കാർക്കായി പൊലീസ് നിർദേശിച്ച ബദൽ റൂട്ടുകൾ താഴെ പറയുന്നവയാണ്:
നാട്ടകം ഭാഗത്തുനിന്ന് വരുന്ന വാഹനങ്ങൾ: എംസി റോഡിലൂടെ നാട്ടകം ഭാഗത്തുനിന്നു വന്ന് മെഡിക്കൽ കോളജ്, ഏറ്റുമാനൂർ, കുമരകം ഭാഗങ്ങളിലേക്ക് പോകേണ്ട വാഹനങ്ങൾ സിമന്റ് കവലയിൽനിന്ന് ഇടത്തോട്ട് തിരിഞ്ഞ് പാറേച്ചാൽ ബൈപാസിലൂടെ പോകണം. ഇതേ റൂട്ടിൽ കഞ്ഞിക്കുഴി, മണർകാട്, പുതുപ്പള്ളി ഭാഗങ്ങളിലേക്ക് പോകേണ്ടവ മണിപ്പുഴ ജംക്ഷനിൽ നിന്ന് വലത്തോട്ട് തിരിഞ്ഞ് കടുവാക്കുളം, കൊല്ലാട് വഴി തിരിഞ്ഞുപോകണം.
കെഎസ്ആർടിസി ബസുകൾ: കെഎസ്ആർടിസി സ്റ്റാൻഡിൽ നിന്ന് കെകെ റോഡ് വഴി പോകേണ്ട ബസുകൾ മണിപ്പുഴ ജംക്ഷനിലെത്തി കൊല്ലാട്– ദേവലോകം – കഞ്ഞിക്കുഴി ജംക്ഷൻ വഴി യാത്ര തുടരേണ്ടതാണ്.
നാഗമ്പടം സ്റ്റാൻഡിൽ നിന്നുള്ള ബസുകൾ: നാഗമ്പടത്തുനിന്ന് മണർകാട്, പുതുപ്പള്ളി, കൊല്ലാട് റൂട്ടിൽ പോകേണ്ട ബസുകൾ സീസേഴ്സ് ജംക്ഷനിലെത്തി വലത്തേക്ക് തിരിഞ്ഞ് മംഗളം ജംക്ഷൻ– വട്ടമൂട് പാലം– കഞ്ഞിക്കുഴി ജംക്ഷൻ വഴി പോകണം.
മണർകാട്, പുതുപ്പള്ളി ഭാഗത്തുനിന്നുള്ള വാഹനങ്ങൾ: ഈ ഭാഗങ്ങളിൽ നിന്നുള്ള എല്ലാ വണ്ടികളും കഞ്ഞിക്കുഴി ജംക്ഷനിൽ നിന്ന് ഇടത്തേക്ക് തിരിഞ്ഞ് ദേവലോകം– കൊല്ലാട് വഴി മണിപ്പുഴ ജംക്ഷനിലെത്തി യാത്ര തുടരണം.
മൂവാറ്റുപുഴ, കടുത്തുരുത്തി ഭാഗത്തുനിന്നുള്ള വാഹനങ്ങൾ: ഇവിടെ നിന്നും ചങ്ങനാശേരിയിലേക്ക് പോകേണ്ട വാഹനങ്ങൾ പട്ടിത്താനം ജംക്ഷനിൽ നിന്ന് ഏറ്റുമാനൂർ– മണർകാട് ബൈപാസ് വഴി പുതുപ്പള്ളിയിലൂടെ പോകണം. മണർകാട് ഭാഗത്തുനിന്നും മെഡിക്കൽ കോളജിലേക്ക് പോകേണ്ട വാഹനങ്ങളും ഈ മണർകാട് ബൈപാസ് തന്നെ ഉപയോഗിക്കേണ്ടതാണ്.
മെഡിക്കൽ കോളജ് ഭാഗത്തുനിന്നുള്ള വാഹനങ്ങൾ: മെഡിക്കൽ കോളജ് ഭാഗത്തുനിന്നും ചങ്ങനാശേരിയിലേക്ക് പോകേണ്ടവ കുടയംപടി– ചാലുകുന്ന് – അറുത്തൂട്ടി ജംക്ഷൻ– തിരുവാതുക്കൽ– പാറേച്ചാൽ ബൈപാസ് വഴി തിരിഞ്ഞുപോകണം.
നാളെ കോട്ടയം നഗരത്തിലേക്ക് എത്തുന്ന പൊതുജനങ്ങൾ ഈ ഗതാഗത ക്രമീകരണങ്ങളോട് സഹകരിക്കണമെന്ന് പൊലീസ് അഭ്യർത്ഥിച്ചു.
