കേരള കുംഭമേള ഉദ്ഘാടനം ഗവർണർ

തിരുനാവായയിൽ 'കേരള കുംഭമേള'യ്ക്ക് ഇന്ന് തുടക്കം; ഉദ്ഘാടനം 19-ന് ഗവർണർ നിർവഹിക്കും

 കേരളത്തിന്റെ കുംഭമേളയെന്നറിയപ്പെടുന്ന മഹാമാഘ മഹോത്സവത്തിന് ഭാരതപ്പുഴയുടെ തീരമായ തിരുനാവായയിൽ ഇന്ന് (വെള്ളിയാഴ്ച) തുടക്കമാകും. വിശേഷാൽ പൂജകളോടെ ആരംഭിക്കുന്ന ചടങ്ങുകൾ ഫെബ്രുവരി മൂന്ന് വരെ നീണ്ടുനിൽക്കും. ഉത്സവത്തിന്റെ ഔദ്യോഗിക ഉദ്ഘാടനം ജനുവരി 19-ന് രാവിലെ 11-ന് നാവാമുകുന്ദ ക്ഷേത്രപരിസരത്ത് ഗവർണർ രാജേന്ദ്ര വിശ്വനാഥ് ആർലേക്കർ നിർവഹിക്കും.

​ആചാരപ്പൊലിമയോടെ തുടക്കം

വെള്ളിയാഴ്ച രാവിലെ സ്വാമി അഭിനവ ബാലാനന്ദ ഭൈരവയുടെ കാർമികത്വത്തിൽ ചടങ്ങുകൾ ആരംഭിക്കും. വിവിധ ഹിന്ദു സമ്പ്രദായങ്ങളിൽപ്പെട്ട ഭക്തർ അവരുടെ അനുഷ്ഠാനങ്ങൾക്കനുസരിച്ച് ദേവതാവന്ദനങ്ങളും പിതൃകർമങ്ങളും നിർവഹിക്കും. രാവിലെ ആറ് മണിക്ക് ആയിനിപ്പുള്ളി വൈശാഖിന്റെ കാർമ്മികത്വത്തിൽ 'വീരസാധനക്രിയ' നടക്കും. ശനിയാഴ്ച രാവിലെ ചെറുമുക്ക് വൈദികൻ വല്ലഭൻ അക്കിത്തിരിപ്പാടിന്റെ നേതൃത്വത്തിൽ വൈദിക ശ്രാദ്ധകർമം നടത്തുന്നതോടെ കുംഭമേളയ്ക്ക് ഔപചാരികമായ തുടക്കമാകും.

​ഭരണകൂടത്തിന്റെ അനുമതി

പുഴയിലെ നിർമാണപ്രവർത്തനങ്ങൾക്ക് റവന്യൂവകുപ്പ് നേരത്തെ സ്റ്റോപ്പ് മെമ്മോ നൽകിയിരുന്നെങ്കിലും, സംഘാടക സമിതി ചെയർമാൻ അരീക്കര സുധീർ നമ്പൂതിരിയുടെ നേതൃത്വത്തിൽ ജില്ലാ കളക്ടർ വി.ആർ. വിനോദുമായി നടത്തിയ ചർച്ചയെത്തുടർന്ന് തടസ്സങ്ങൾ നീങ്ങി. കർശന നിബന്ധനകളോടെ ചടങ്ങുകൾ നടത്താൻ ജില്ലാ ഭരണകൂടം വാക്കാൽ അനുമതി നൽകി. മലപ്പുറം ജില്ലാ പോലീസ് മേധാവി ആർ. വിശ്വനാഥിന്റെ നേതൃത്വത്തിലുള്ള സംഘം വ്യാഴാഴ്ച സ്ഥലത്തെത്തി സുരക്ഷാ ക്രമീകരണങ്ങൾ വിലയിരുത്തി. ചടങ്ങുകൾ സുഗമമായി നടത്താനുള്ള ഒരുക്കങ്ങൾ പൂർത്തിയായതായി മഹാമാഘം സഭാപതി മഹാമണ്ഡലേശ്വർ സ്വാമി ആനന്ദവനം ഭാരതി അറിയിച്ചു.