ആർ.സി.സി പുതിയ മന്ദിരം അടിയന്തരമായി തുറക്കാൻ നിർദ്ദേശം നൽകി മന്ത്രി കെ.മുരളീധരൻ

ആർ.സി.സിയിലെ പുതിയ ബഹുനില മന്ദിരം സെപ്റ്റംബർ 30നകം തുറക്കണം മന്ത്രി കെ.മുരളീധരൻ

തിരുവനന്തപുരം: തിരുവനന്തപുരം റീജണൽ കാൻസർ സെന്ററിലെ (ആർ.സി.സി) പുതിയ ബഹുനില മന്ദിരം അടിയന്തരമായി പ്രവർത്തനസജ്ജമാക്കി തുറന്നു നൽകണമെന്ന് ആരോഗ്യ വകുപ്പ് മന്ത്രി കെ.മുരളീധരൻ നിർദ്ദേശം നൽകി. കഴിഞ്ഞ ദിവസം മന്ത്രി നേരിട്ടെത്തി നിർമാണ പ്രവർത്തനങ്ങൾ വിലയിരുത്തിയ ശേഷമാണ് ബന്ധപ്പെട്ട ഉദ്യോഗസ്ഥർക്ക് കർശന നിർദ്ദേശം നൽകിയത്.

​നിർമാണ ചുമതലയുള്ള ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റി (ULCC) അധികൃതരുമായി നടത്തിയ ചർച്ചയിലാണ് തീരുമാനം. കരാർപ്രകാരമുള്ള എല്ലാ ജോലികളും സെപ്റ്റംബർ 30നകം പൂർത്തിയാക്കി കെട്ടിടം ആർ.സി.സിക്ക് കൈമാറണമെന്ന് മന്ത്രി ആവശ്യപ്പെട്ടു. നിർമാണ പ്രവർത്തനങ്ങളിൽ യാതൊരുവിധ കാലതാമസവും ഉണ്ടാകരുതെന്നും അദ്ദേഹം വ്യക്തമാക്കി.

​കോടിക്കണക്കിന് രൂപ ചെലവഴിച്ച് നിർമിച്ച ആധുനിക സൗകര്യങ്ങളുള്ള കെട്ടിടം രോഗികൾക്ക് ഉപയോഗിക്കാൻ കഴിയാത്ത സാഹചര്യം ഒരു കാരണവശാലും അനുവദിക്കാനാവില്ലെന്ന് മന്ത്രി വ്യക്തമാക്കി. കാൻസർ രോഗികൾക്ക് കൂടുതൽ മെച്ചപ്പെട്ട ചികിത്സാ സൗകര്യങ്ങളും സേവനങ്ങളും വേഗത്തിൽ ഉറപ്പാക്കുന്നതിനായി പുതിയ കെട്ടിടം ഉടൻ തുറക്കേണ്ടത് അനിവാര്യമാണെന്നും അദ്ദേഹം കൂട്ടിച്ചേർത്തു.

​നിലവിലുള്ള പ്രവർത്തനങ്ങളുടെ പുരോഗതി, ശേഷിക്കുന്ന ജോലികൾ, സമയബന്ധിതമായി പൂർത്തീകരിക്കുന്നതിനുള്ള നടപടികൾ എന്നിവ സംബന്ധിച്ച് നിർമാണ കമ്പനി പ്രതിനിധികളുമായും ആർ.സി.സി അധികൃതരുമായും മന്ത്രി വിശദമായ ചർച്ച നടത്തി.