മൃഗസംരക്ഷണ പദ്ധതികൾ കൃത്യമായ വിവരങ്ങളുടെ അടിസ്ഥാനത്തിൽ ആസൂത്രണം ചെയ്യണം കൊച്ചി മേയർ വി.കെ. മിനിമോൾ
മൃഗസംരക്ഷണ മേഖലയിലെ പദ്ധതികൾ കൃത്യമായ സ്ഥിതിവിവരക്കണക്കുകളുടെ അടിസ്ഥാനത്തിൽ ആസൂത്രണം ചെയ്യണമെന്നും പൊതുപണം ഫലപ്രദമായി വിനിയോഗിക്കണമെന്നും കൊച്ചി കോർപറേഷൻ മേയർ വി.കെ. മിനിമോൾ പറഞ്ഞു. മൃഗസംരക്ഷണ വകുപ്പിന്റെ സംയോജിത സാമ്പിൾ സർവേ സംസ്ഥാനതല പരിശീലന ക്യാമ്പ് ഉദ്ഘാടനം ചെയ്യുകയായിരുന്നു മേയർ.
മൃഗസംരക്ഷണ പദ്ധതികൾ കൃത്യമായ വിവരങ്ങളുടെ അടിസ്ഥാനത്തിൽ ആസൂത്രണം ചെയ്യണം: മേയർ വി.കെ. മിനിമോൾ
കൊച്ചി: മൃഗസംരക്ഷണ മേഖലയിലെ വികസന പദ്ധതികൾ കൃത്യമായ സ്ഥിതിവിവരക്കണക്കുകളുടെ അടിസ്ഥാനത്തിൽ ആസൂത്രണം ചെയ്യണമെന്നും അനുവദിക്കുന്ന ഫണ്ട് കർഷകർക്ക് നേരിട്ട് പ്രയോജനപ്പെടുന്ന രീതിയിൽ വിനിയോഗിക്കണമെന്നും കൊച്ചി കോർപറേഷൻ മേയർ വി.കെ. മിനിമോൾ പറഞ്ഞു. മൃഗസംരക്ഷണ വകുപ്പിന്റെ സംയോജിത സാമ്പിൾ സർവേയുടെ (ISS) സംസ്ഥാനതല പരിശീലന ക്യാമ്പ് എറണാകുളം ഗവ. ഗസ്റ്റ് ഹൗസ് ബാങ്ക്വറ്റ് ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു അവർ.
ചടങ്ങിൽ സംയോജിത സാമ്പിൾ സർവേയുടെ റിപ്പോർട്ടും ബ്രോഷറും മേയർ പ്രകാശനം ചെയ്തു.
തദ്ദേശ സ്വയംഭരണ സ്ഥാപനങ്ങൾ മൃഗസംരക്ഷണ മേഖലയ്ക്കായി ചെലവഴിക്കുന്ന പദ്ധതി തുകയുടെ ഗുണഫലം കൃത്യമായി വിലയിരുത്താൻ വിവരശേഖരണം അനിവാര്യമാണെന്ന് മേയർ ചൂണ്ടിക്കാട്ടി. മുട്ടക്കോഴി വിതരണം പോലുള്ള പദ്ധതികൾ നടപ്പാക്കുമ്പോൾ അവയുടെ യഥാർഥ പ്രയോജനം എത്രത്തോളമുണ്ടെന്ന് പരിശോധിക്കണം. കൃത്യമായ കണക്കുകളില്ലാതെ പദ്ധതികൾ നടപ്പാക്കുന്നത് പൊതുപണത്തിന്റെ ഫലപ്രദമായ വിനിയോഗത്തിന് തടസ്സമാകും. വിവരശേഖരണത്തിനായി ജിയോ ടാഗിങ് ഉൾപ്പെടെയുള്ള ആധുനിക സാങ്കേതിക വിദ്യകൾ പ്രയോജനപ്പെടുത്തണമെന്നും അവർ കൂട്ടിച്ചേർത്തു.
പാൽ, മുട്ട, മാംസം എന്നിവയുടെ ഉത്പാദന മേഖലകളിലെ യഥാർഥ സ്ഥിതി മനസ്സിലാക്കാൻ ഇന്റഗ്രേറ്റഡ് സാമ്പിൾ സർവേ സഹായിക്കും. സർവേ പഠന റിപ്പോർട്ടുകൾ സമയബന്ധിതമായി തയ്യാറാക്കേണ്ടതുണ്ട്. കാലതാമസത്തോടെ ലഭിക്കുന്ന കണക്കുകൾക്ക് പ്രായോഗിക പ്രയോജനം കുറവാണെന്നതിനാൽ ഫീൽഡിലെത്തി കൃത്യമായ വിവരങ്ങൾ ശേഖരിക്കാൻ ഉദ്യോഗസ്ഥർ ശ്രദ്ധിക്കണമെന്നും മേയർ നിർദേശിച്ചു.
ഉയർന്ന വിദ്യാഭ്യാസം നേടിയ യുവാക്കൾ മൃഗസംരക്ഷണ മേഖലയിലേക്ക് കടന്നുവരുന്നത് പ്രതീക്ഷ നൽകുന്ന കാര്യമാണ്. കർഷകരുടെ ക്ഷേമവും ഉപജീവനമാർഗങ്ങളുടെ സംരക്ഷണവും ലക്ഷ്യമിട്ട് വകുപ്പും തദ്ദേശ സ്വയംഭരണ സ്ഥാപനങ്ങളും പൊതുസമൂഹവും കൂട്ടായി പ്രവർത്തിക്കണമെന്നും മേയർ പറഞ്ഞു.
ജില്ലാ മൃഗസംരക്ഷണ ഓഫീസർ ഡോ. എൽദോസ് എ. ചടങ്ങിൽ അധ്യക്ഷത വഹിച്ചു. സാമ്പത്തിക സ്ഥിതിവിവരക്കണക്ക് വകുപ്പ് ജോയിന്റ് ഡയറക്ടർ ഗോപകുമാർ എസ്., ഡെപ്യൂട്ടി ഡയറക്ടർ ഷറഫുദ്ദീൻ സി.എം., മൃഗസംരക്ഷണ വകുപ്പ് ജോയിന്റ് ഡയറക്ടർ (സ്റ്റാറ്റിസ്റ്റിക്സ്) കെ. സിൻസിമോൾ ആന്റണി, റിസർച്ച് ഓഫീസർമാരായ ചിന്തു വർഗ്ഗീസ്, ബിനോജ് ജി., റീജ പി.എസ്. തുടങ്ങിയവർ സംസാരിച്ചു.
പൾസ് പോളിയോ ദിനാചരണം എറണാകുളം ജില്ലയിൽ 1.61 ലക്ഷം കുട്ടികൾക്ക് തുള്ളിമരുന്ന് നൽകും
കുഞ്ഞുങ്ങൾക്കായുള്ള സൗജന്യ ചികിത്സാ കൂട്ടായ്മകൾ മാതൃകാപരം മുഖ്യമന്ത്രി വി ഡി സതീശൻ
കൊലക്കേസ് പ്രതിയെ കാപ്പ ചുമത്തി വിയ്യൂർ ജയിലിൽ അടച്ചു നടപടി ജാമ്യത്തിലിറങ്ങി വീണ്ടും കവർച്ച നടത്തിയതോടെ
പ്രതിസന്ധികൾ മറികടന്ന് കബഡിയിൽ സ്വർണം നേടി അട്ടപ്പാടിയിലെ പെൺപട
സൗന്ദര്യവർദ്ധക ക്രീം ഉപയോഗിച്ച 17 കാരിക്ക് വൃക്കരോഗം ബാലാവകാശ കമ്മിഷൻ സ്വമേധയാ കേസെടുത്തു
അംഗീകാരമില്ലാത്ത കളരിപ്പയറ്റ് ചാമ്പ്യൻഷിപ്പ് കായികതാരങ്ങൾ ശ്രദ്ധിക്കണം 
