ചൂടിനെ തോൽപ്പിക്കാൻ കുടുംബശ്രീ എറണാകുളത്ത് തണ്ണീർപ്പന്തലുകളും സ്നേഹിത സേവനങ്ങളും സജീവം
എറണാകുളം ജില്ലയിൽ കുടുംബശ്രീയുടെ നേതൃത്വത്തിൽ ആരംഭിച്ച തണ്ണീർപ്പന്തലുകളെക്കുറിച്ചും സ്നേഹിത ഹെൽപ് ഡെസ്ക് ക്യാമ്പയിനെക്കുറിച്ചുമുള്ള വാർത്ത.
അനില എം കൃഷ്ണൻ 
വേനൽച്ചൂടിൽ കുളിർമയായി കുടുംബശ്രീ; തണ്ണീർപ്പന്തലുകളും സ്നേഹിത ക്യാമ്പയിനും എറണാകുളത്ത് സജീവം
കൊച്ചി: കടുത്ത വേനലിൽ ചുട്ടുപൊള്ളുന്ന ജനങ്ങൾക്ക് ആശ്വാസമേകി എറണാകുളം ജില്ലയിൽ കുടുംബശ്രീയുടെ നേതൃത്വത്തിൽ തണ്ണീർപ്പന്തലുകൾ ഒരുങ്ങുന്നു. കുടുംബശ്രീ സി.ഡി.എസുകളും ജെൻഡർ റിസോഴ്സ് സെന്ററുകളും സംയുക്തമായാണ് ജില്ലയുടെ വിവിധ ഭാഗങ്ങളിൽ ഈ സേവനം ലഭ്യമാക്കുന്നത്. വഴിയാത്രക്കാർക്ക് ആശ്വാസമായി സംഭാരം, കുമ്മട്ടി ജ്യൂസ് എന്നിവ സൗജന്യമായി ഇവിടെ വിതരണം ചെയ്യുന്നു.
ജില്ലയിലെ മണീട്, ചോറ്റാനിക്കര, ആമ്പല്ലൂർ, കടുങ്ങല്ലൂർ, കരുമാലൂർ തുടങ്ങി 26-ഓളം കേന്ദ്രങ്ങളിൽ നിലവിൽ തണ്ണീർപ്പന്തലുകൾ പ്രവർത്തനം ആരംഭിച്ചുകഴിഞ്ഞു. കഴിഞ്ഞ മൂന്ന് വർഷമായി തുടരുന്ന ഈ മാതൃകാപരമായ പ്രവർത്തനം ഇത്തവണയും ജനപങ്കാളിത്തത്തോടെയാണ് മുന്നേറുന്നത്.
തണ്ണീർപ്പന്തലുകൾക്ക് ഒപ്പം തന്നെ 'സ്നേഹിത' ഹെൽപ് ഡെസ്ക് ക്യാമ്പയിനും സജീവമാണ്. സ്ത്രീകൾക്കും കുട്ടികൾക്കും എതിരെയുള്ള അതിക്രമങ്ങൾ തടയുന്നതിനായി പ്രവർത്തിക്കുന്ന 'സ്നേഹിത' ജെൻഡർ ഹെൽപ് ഡെസ്കിന്റെ സേവനങ്ങളെക്കുറിച്ച് പൊതുജനങ്ങളിൽ അവബോധം സൃഷ്ടിക്കുകയാണ് ഇതിലൂടെ ലക്ഷ്യമിടുന്നത്. 24 മണിക്കൂറും പ്രവർത്തിക്കുന്ന സ്നേഹിതയുടെ സേവനങ്ങൾ കൂടുതൽ പേരിലേക്ക് എത്തിക്കാൻ ഈ സംരംഭം സഹായിക്കുന്നു.
