അമ്മ യിലെ പ്രശ്നങ്ങൾ അവർ തന്നെ പരിഹരിക്കുമെന്ന് ഉറപ്പുനൽകി, ആവശ്യമെങ്കിൽ സർക്കാർ ഇടപെടും മന്ത്രി പി.സി. വിഷ്ണുനാഥ്‌

'അമ്മ'യിലെ പ്രശ്നങ്ങൾ അവർ തന്നെ പരിഹരിക്കുമെന്ന് ഉറപ്പുനൽകി, ആവശ്യമെങ്കിൽ സർക്കാർ ഇടപെടും: മന്ത്രി പി.സി. വിഷ്ണുനാഥ്‌

​തിരുവനന്തപുരം: മലയാള സിനിമയിലെ അഭിനേതാക്കളുടെ സംഘടനയായ 'അമ്മ'യിൽ (A.M.M.A) നിലനിൽക്കുന്ന ആഭ്യന്തര പ്രശ്നങ്ങളിൽ പ്രതികരണവുമായി സാംസ്കാരിക മന്ത്രി പി.സി. വിഷ്ണുനാഥ്. സംഘടനയ്ക്കുള്ളിലെ പ്രശ്നങ്ങൾ അവർ തന്നെ പരിഹരിക്കാമെന്ന് ഭാരവാഹികൾ സർക്കാരിന് ഉറപ്പുനൽകിയിട്ടുണ്ടെന്ന് മന്ത്രി വ്യക്തമാക്കി. താരസംഘടനയുടെ ആഭ്യന്തര കാര്യങ്ങളിൽ നേരിട്ട് ഇടപെടാൻ സർക്കാർ ആഗ്രഹിക്കുന്നില്ലെന്നും, എന്നാൽ ഇടപെടേണ്ട സാഹചര്യമുണ്ടായാൽ കൃത്യമായി ഇടപെടുക തന്നെ ചെയ്യുമെന്നും അദ്ദേഹം കൂട്ടിച്ചേർത്തു. കുക്കു പരമേശ്വരൻ ഉൾപ്പെടെയുള്ളവർ ഇതുമായി ബന്ധപ്പെട്ട കാര്യങ്ങൾ സംസാരിച്ചിട്ടുണ്ടെന്നും മന്ത്രി മാധ്യമങ്ങളോട് പറഞ്ഞു.

​മലയാള ചലച്ചിത്ര മേഖലയിലെ വിവിധ സംഘടനാ ഭാരവാഹികളുമായി തിരുവനന്തപുരത്ത് നടത്തിയ ചർച്ചയ്ക്ക് ശേഷമാണ് മന്ത്രി നിലപാട് വ്യക്തമാക്കിയത്. സിനിമയുടെ മുന്നണിയിലും പിന്നണിയിലും പ്രവർത്തിക്കുന്നവർ നേരിടുന്ന വെല്ലുവിളികളും പ്രധാന ആവശ്യങ്ങളും ചർച്ചയിൽ നേരിട്ട് കേട്ടു മനസ്സിലാക്കിയതായി മന്ത്രി അറിയിച്ചു.

​ചർച്ചയിലെ പ്രധാന തീരുമാനങ്ങൾ

​വ്യവസായ പദവി: ചലച്ചിത്ര മേഖലയ്ക്ക് ഇതുവരെ വ്യവസായിക സ്റ്റാറ്റസ് ഇല്ലെന്ന വിഷയം ചർച്ചയിൽ ഉയർന്നു വന്നു. ഇതിന്മേൽ ആവശ്യമായ നടപടികൾ സ്വീകരിക്കും.

​ഏകജാലക സംവിധാനവും ഇ-ടിക്കറ്റിംഗും: സിനിമകൾക്ക് വേഗത്തിൽ അനുമതി നൽകുന്നതിനുള്ള ക്ലിയറൻസ് ഏകജാലക സംവിധാനവും, തിയേറ്ററുകളിൽ ഇ-ടിക്കറ്റിംഗും നടപ്പിലാക്കണമെന്ന ആവശ്യം ഉയർന്നിട്ടുണ്ട്.

​വ്യാജപതിപ്പുകൾക്കെതിരെ നടപടി: സിനിമാ പൈറസി തടയുന്നതിനായി കൊച്ചിയിലും മലബാറിലും പ്രത്യേക സോൺ ഓഫീസുകൾ നടപ്പിലാക്കും.

​വിനോദ നികുതി: വിനോദ നികുതിയുമായി ബന്ധപ്പെട്ട പ്രതിസന്ധികൾ ശ്രദ്ധയിൽപ്പെട്ടിട്ടുണ്ടെന്നും, എന്നാൽ ഇതിൽ പെട്ടെന്ന് ഒരു ഉറപ്പ് നൽകാൻ കഴിയില്ലെന്നും മന്ത്രി വ്യക്തമാക്കി.

​ചലച്ചിത്ര മേഖലയിൽ നിന്ന് ഉയർന്നുവന്ന ഓരോ ആവശ്യങ്ങളിലും ആശങ്കകളിലും സർക്കാരിന്റെ ഭാഗത്തുനിന്നും ചെയ്യാൻ കഴിയുന്ന പരമാവധി കാര്യങ്ങൾ ഉറപ്പാക്കുമെന്നും, മലയാള സിനിമയ്ക്ക് കൂടുതൽ കരുത്തോടെ മുന്നേറാൻ ആവശ്യമായ എല്ലാ പിന്തുണയും സർക്കാർ നൽകുമെന്നും മന്ത്രി പി.സി. വിഷ്ണുനാഥ് ഉറപ്പുനൽകി.