കേരളത്തിലേക്ക് 10,000 കോടിയുടെ കപ്പൽ നിർമ്മാണ പദ്ധതിയുമായി ടാറ്റാ ഗ്രൂപ്പ്

കേരളത്തിൽ 10,000 കോടിയുടെ കപ്പൽ നിർമ്മാണ പദ്ധതിയുമായി ടാറ്റാ ഗ്രൂപ്പ്; സ്ഥിരീകരിച്ച് മുഖ്യമന്ത്രി വി.ഡി. സതീശൻ

തിരുവനന്തപുരം: രാജ്യത്തെ പ്രമുഖ വ്യവസായ ശൃംഖലയായ ടാറ്റാ ഗ്രൂപ്പ് കപ്പൽ നിർമ്മാണ മേഖലയിലേക്ക് ചുവടുവെക്കുന്നു. ഇതിന്റെ ഭാഗമായി കേരളത്തിൽ 10,000 കോടി രൂപയുടെ (ഏകദേശം 1 ബില്യൺ ഡോളർ) വൻ നിക്ഷേപം നടത്താൻ ടാറ്റാ ഗ്രൂപ്പ് സന്നദ്ധത അറിയിച്ചതായി മുഖ്യമന്ത്രി വി.ഡി. സതീശൻ വ്യക്തമാക്കി. പ്രമുഖ അന്താരാഷ്ട്ര വാർത്താ ഏജൻസിയായ 'ബ്ലൂംബെർഗിന്' നൽകിയ പ്രത്യേക അഭിമുഖത്തിലാണ് മുഖ്യമന്ത്രി ഇക്കാര്യം വെളിപ്പെടുത്തിയത്.

​കപ്പൽ നിർമ്മാണ ശാല ആരംഭിക്കുന്നതിനായി ടാറ്റാ ഗ്രൂപ്പ് സംസ്ഥാന സർക്കാരിന് അപേക്ഷ സമർപ്പിച്ചിട്ടുണ്ട്. ഈ നിർദ്ദേശം സർക്കാർ അതീവ ഗൗരവത്തോടെയാണ് പരിഗണിക്കുന്നത്. പദ്ധതിക്ക് ആവശ്യമായ ഭൂമി വിട്ടുനൽകുന്നതുൾപ്പെടെയുള്ള കാര്യങ്ങളിൽ അടുത്ത ഒരു മാസത്തിനുള്ളിൽ അനുകൂലമായ തീരുമാനമുണ്ടാകുമെന്നും മുഖ്യമന്ത്രി അറിയിച്ചു.

​ടാറ്റാ ഗ്രൂപ്പിനെ സംബന്ധിച്ചിടത്തോളം കപ്പൽ നിർമ്മാണ മേഖലയിലേക്കുള്ള അവരുടെ ആദ്യത്തെ വലിയ ചുവടുവെയ്പ്പാണിത്. സ്റ്റീൽ, ഓട്ടോമൊബൈൽ, ഐടി, വ്യോമയാനം തുടങ്ങിയ മേഖലകളിൽ സജീവമായ ടാറ്റയുടെ വരവ് കേരളത്തിന്റെ വ്യവസായ മേഖലയ്ക്ക് വൻ കുതിപ്പേകും.

​സംസ്ഥാനത്തേക്ക് കൂടുതൽ വൻകിട നിക്ഷേപകരെ ആകർഷിക്കുന്നതിനായി സർക്കാർ നടത്തുന്ന ശ്രമങ്ങളുടെ ഭാഗമായാണ് ടാറ്റയുടെ ഈ നീക്കം. ടാറ്റയ്ക്ക് പുറമെ വിമാനത്താവള വികസന രംഗത്തെ പ്രമുഖരായ സിംഗപ്പൂരിലെ ചാങ്കി  എയർപോർട്ട് ഗ്രൂപ്പ് ഉൾപ്പെടെയുള്ള മറ്റ് പ്രമുഖ കമ്പനികളും നിക്ഷേപ സാധ്യതകൾ തേടി സർക്കാരിനെ സമീപിച്ചിട്ടുണ്ടെന്നും മുഖ്യമന്ത്രി അഭിമുഖത്തിൽ കൂട്ടിച്ചേർത്തു.

​കൊച്ചി, വിഴിഞ്ഞം അന്താരാഷ്ട്ര തുറമുഖങ്ങളുടെ വികസന സാധ്യതകൾ കൂടി കണക്കിലെടുത്ത്, സംസ്ഥാനത്തിന്റെ തീരദേശ-മാരിടൈം മേഖലയ്ക്ക് കരുത്തുപകരുന്ന ഒന്നാകും ടാറ്റയുടെ ഈ കപ്പൽ നിർമ്മാണ പദ്ധതി വിലയിരുത്തപ്പെടുന്നു.