സാന്നിധ്യമല്ല, കൃത്യമായ ഇടപെടലാണ് പ്രധാനം കള്ളാടിയിൽ പ്രിയങ്ക എത്താതിരുന്നതിൽ വിശദീകരണവുമായി ടി. സിദ്ദിഖ്
കള്ളാടി മണ്ണിടിച്ചിൽ ദുരന്തമേഖലയിൽ വയനാട് എംപി പ്രിയങ്ക ഗാന്ധി നേരിട്ടെത്താതിരുന്നതിൽ വിശദീകരണവുമായി ടി. സിദ്ദിഖ് എംഎൽഎ. സാന്നിധ്യത്തേക്കാൾ പ്രധാനം സമഗ്രമായ ഇടപെടലാണെന്ന് അദ്ദേഹം ന്യൂഡൽഹിയിൽ വാർത്താസമ്മേളനത്തിൽ പറഞ്ഞു.
Angel Varghese 
കള്ളാടി ദുരന്തം: പ്രിയങ്ക ഗാന്ധി നേരിട്ടെത്താതിരുന്നതിൽ വിശദീകരണവുമായി ടി. സിദ്ദിഖ്; 'സാന്നിധ്യമല്ല, ഇടപെടലാണ് പ്രധാനം'
ന്യൂഡൽഹി: കള്ളാടി മണ്ണിടിച്ചിൽ ദുരന്തം നടന്ന് ദിവസങ്ങൾ പിന്നിട്ടിട്ടും മണ്ഡലം എംപിയായ പ്രിയങ്ക ഗാന്ധി പ്രദേശം സന്ദർശിച്ചില്ലെന്ന ആക്ഷേപത്തിൽ ന്യായീകരണവുമായി ടി. സിദ്ദിഖ് എംഎൽഎ. ദുരന്തമേഖലയിൽ എംപിയുടെ നേരിട്ടുള്ള സാന്നിധ്യം വേണമെന്നില്ലെന്നും, കൃത്യസമയത്ത് ആവശ്യമായ എല്ലാ മാർഗനിർദേശങ്ങളും അവർ നൽകുന്നുണ്ടായിരുന്നു എന്നും അദ്ദേഹം ന്യൂഡൽഹിയിൽ നടത്തിയ വാർത്താസമ്മേളനത്തിൽ വ്യക്തമാക്കി.
മുഖ്യമന്ത്രിയുടെ അധ്യക്ഷതയിൽ ചേർന്ന അവലോകന യോഗത്തിൽ പ്രിയങ്ക ഗാന്ധി ഓൺലൈനായി പങ്കെടുത്തിരുന്നുവെന്ന് സിദ്ദിഖ് ചൂണ്ടിക്കാട്ടി. ദുരന്തവുമായി ബന്ധപ്പെട്ട എല്ലാ കാര്യങ്ങളിലും അവർക്ക് വ്യക്തമായ കാഴ്ചപ്പാടുണ്ട്. അവസാനത്തെ മൃതദേഹം കണ്ടെത്തിയ ദിവസം വൈകിട്ട് അടിയന്തര യോഗം ചേരാൻ നിർദേശിച്ചതും എംപിയായിരുന്നു. അവർ നൽകിയ നിർദേശങ്ങളെല്ലാം കൃത്യതയോടെ ദുരന്തമേഖലയിൽ നടപ്പിലാക്കാൻ സാധിച്ചതായും അദ്ദേഹം കൂട്ടിച്ചേർത്തു.
ദുരന്തത്തിൽ മരിച്ച വിക്രം റാണയുടെ മൃതദേഹം കണ്ടെത്തിയപ്പോൾ അടുത്ത ബന്ധുവായ അങ്കുഷ് പ്രിയങ്ക ഗാന്ധിക്ക് നന്ദി പറഞ്ഞത് അവരുടെ ഇടപെടലുകൾക്കുള്ള തെളിവാണെന്ന് സിദ്ദിഖ് പറഞ്ഞു. ദുരന്തബാധിതരുമായി അവർ നിരന്തരം ആശയവിനിമയം നടത്തുന്നുണ്ട്. ഒരാളുടെ ഇടപെടൽ അളക്കേണ്ടത് നേരിട്ടുള്ള സാന്നിധ്യം കൊണ്ട് മാത്രമല്ല, വിദൂരതയിൽ നിന്നാണെങ്കിലും എത്രത്തോളം സമഗ്രമായി ഇടപെടുന്നു എന്നതിലൂടെയാണ്. ആ ഇടപെടൽ വഴിയുള്ള അനുകൂല ഫലം കള്ളാടിയിൽ ഉണ്ടായിട്ടുണ്ടെന്നും അദ്ദേഹം അവകാശപ്പെട്ടു.
പ്രിയങ്ക ഗാന്ധി സമയാസമയം വയനാട്ടിൽ വരുന്നുണ്ടെന്നും അവിടുത്തെ എല്ലാ കാര്യങ്ങളിലും സജീവമായി ഇടപെടുന്നുണ്ടെന്നും സിദ്ദിഖ് മാധ്യമങ്ങളോട് പറഞ്ഞു. സിഎസ്ആർ ഫണ്ടും എംപി ഫണ്ടും അവർ മണ്ഡലത്തിനായി വിനിയോഗിക്കുന്നുണ്ട്. വയനാട്ടിലെ 80 ശതമാനം ജനങ്ങൾക്കും ഉപകാരപ്പെടുന്ന ഗോത്ര സർവകലാശാല ഉൾപ്പെടെയുള്ള പദ്ധതികൾ സംസ്ഥാന ബജറ്റിൽ ഉൾപ്പെടുത്താൻ ഇടപെട്ടതും പ്രിയങ്ക ഗാന്ധിയാണ്. ഇത് വരുംദിവസങ്ങളിൽ മികച്ചൊരു 'സെന്റർ ഓഫ് എക്സലൻസ്' ആയി മാറും. വയനാട്ടുകാർക്ക് താങ്ങും തണലുമാണ് പ്രിയങ്കയുടെ നേതൃത്വമെന്നും, ഇതിനെ രാഷ്ട്രീയമായി മലീമസമാക്കാൻ ശ്രമിച്ചാൽ വയനാട്ടിലെ ജനങ്ങൾ അതിന് വഴങ്ങില്ലെന്നും ടി. സിദ്ദിഖ് വ്യക്തമാക്കി.
