​ആഭിചാര പൂജയുടെ മറവിൽ പതിനഞ്ചുകാരിയെ പീഡിപ്പിക്കാൻ ശ്രമം ബിജെപി ജില്ലാ കമ്മിറ്റി അംഗം അറസ്റ്റിൽ

​ആഭിചാരത്തിന്റെ മറവിൽ പെൺകുട്ടിയെ പീഡിപ്പിക്കാൻ ശ്രമിച്ച ബിജെപി നേതാവ് അറസ്റ്റിൽ

അടൂർ: ആഭിചാര പൂജയുടെ മറവിൽ പതിനഞ്ചുകാരിയായ പെൺകുട്ടിയെ പീഡിപ്പിക്കാൻ ശ്രമിച്ച ബിജെപി പ്രാദേശിക നേതാവിനെ പോലീസ് അറസ്റ്റ് ചെയ്തു. ബിജെപി കൊല്ലം ഈസ്റ്റ് ജില്ലാ കമ്മിറ്റി അംഗമായിരുന്ന രഞ്ജു ആണ് അടൂർ പോലീസിന്റെ പിടിയിലായത്. അടൂർ നെല്ലിമുകൾ സ്വദേശിനിയായ പതിനഞ്ചുകാരയോടാണ് ഇയാൾ ക്രൂരതയ്ക്ക് മുതിർന്നത്. സംഭവം വിവാദമായതോടെ ഇയാളെ പാർട്ടിയിൽ നിന്നും പുറത്താക്കിയതായി ബിജെപി ഔദ്യോഗികമായി അറിയിച്ചു.

​പോരുവഴിയിലെ ഒരു പഞ്ചായത്ത് അംഗം മുഖേനയാണ് പ്രതി രഞ്ജു പെൺകുട്ടിയുടെ വീട്ടിൽ പൂജയ്ക്കായി എത്തിയത്. ഒരു പട്ടികജാതി കുടുംബത്തിന്റെ വീട്ടിലായിരുന്നു പൂജ നടന്നിരുന്നത്. മുറിയിൽ പൂജയ്ക്കുള്ള ക്രമീകരണങ്ങൾ ചെയ്ത ശേഷം പെൺകുട്ടിയുടെ രക്ഷിതാക്കളെ ഇയാൾ മുറിക്ക് പുറത്താക്കുകയായിരുന്നു. തുടർന്ന് ഇത് ആഭിചാര ക്രിയകളുടെ ഭാഗമാണെന്ന് പറഞ്ഞ് തെറ്റിദ്ധരിപ്പിച്ചാണ് പ്രതി പെൺകുട്ടിയെ ഉപദ്രവിക്കാൻ ശ്രമിച്ചത്.

​സംഭവത്തെത്തുടർന്ന് ഭയന്നുപോയ പെൺകുട്ടി രണ്ടു ദിവസത്തിന് ശേഷമാണ് വിവരം മാതാപിതാക്കളെ അറിയിക്കുന്നത്. തുടർന്ന് രക്ഷിതാക്കൾ അടൂർ പോലീസ് സ്റ്റേഷനിൽ പരാതി നൽകുകയായിരുന്നു. പരാതി ലഭിച്ച ഉടൻ തന്നെ പോലീസ് പ്രതിയെ അറസ്റ്റ് ചെയ്തു.

​പ്രതിയായ രഞ്ജു മുൻപും സമാനമായ രീതിയിൽ മറ്റ് വീടുകളിലും ആഭിചാര പൂജകളുടെ മറവിൽ ഉപദ്രവങ്ങൾ നടത്തിയിട്ടുണ്ടോ എന്ന കാര്യത്തിൽ പോലീസിന് ശക്തമായ സംശയമുണ്ട്. ഇതിന്റെ അടിസ്ഥാനത്തിൽ ഇയാളെ കേന്ദ്രീകരിച്ച് വിപുലമായ അന്വേഷണം നടത്താനാണ് പോലീസ് തീരുമാനം.