കനോലി പ്ലോട്ടിൽ സംയോജിത സുസ്ഥിര വികസനം നടപ്പാക്കും മന്ത്രി ഷിബു ബേബി ജോൺ

കനോലി പ്ലോട്ടിൽ സംയോജിത സുസ്ഥിര വികസനം നടപ്പാക്കും; മന്ത്രി ഷിബു ബേബി ജോൺ

നിലമ്പൂർ: നിലമ്പൂർ നോർത്ത് ഫോറസ്റ്റ് ഡിവിഷനിൽ സ്ഥിതി ചെയ്യുന്ന ചരിത്രപ്രസിദ്ധമായ കനോലി പ്ലോട്ടിൽ സംയോജിത സുസ്ഥിര വികസനം നടപ്പാക്കുമെന്ന് വനം വന്യജീവി വകുപ്പ് മന്ത്രി ഷിബു ബേബി ജോൺ അറിയിച്ചു. കനോലി പ്ലോട്ട് സന്ദർശിച്ച് സാധ്യതകൾ വിലയിരുത്തിയ ശേഷം ഉദ്യോഗസ്ഥരുടെയും ജനപ്രതിനിധികളുടെയും യോഗത്തിലാണ് മന്ത്രി സുപ്രധാന തീരുമാനം പ്രഖ്യാപിച്ചത്.

​നിലമ്പൂർ എം.എൽ.എ. ആര്യാടൻ ഷൗക്കത്തിന്റെ എം.എൽ.എ. ഫണ്ടും ഉപയോഗപ്പെടുത്തിയാണ് സുസ്ഥിര വികസനത്തിനായുള്ള പദ്ധതി തയ്യാറാക്കുന്നത്. ചാലിയാർ പുഴയുടെ ഇരുകരകളെയും ബന്ധിപ്പിക്കുന്ന തൂക്കുപാലത്തിന്റെ നിർമ്മാണം ഉടൻ പൂർത്തിയാക്കാൻ നിർദ്ദേശം നൽകിയിട്ടുണ്ട്. 2019 ലെ പ്രളയത്തിലാണ് ചാലിയാർ പുഴയ്ക്ക് കുറുകെയുള്ള തൂക്കുപാലം പൂർണ്ണമായും തകർന്നത്. പുതിയ പാലം നിർമ്മിക്കുന്നതിനുള്ള ചുമതല 2020-ൽ സ്റ്റീൽ ഇൻഡസ്ട്രീസ് കേരള ലിമിറ്റഡിനെ (സിൽക്ക്) ഏൽപ്പിച്ചിരുന്നെങ്കിലും നിർമ്മാണം വൈകുന്ന സാഹചര്യത്തിൽ കമ്പനി സിഇഒയോട് തിരുവനന്തപുരത്തെ ഓഫീസിലെത്തി വിശദീകരണം നൽകാൻ മന്ത്രി ആവശ്യപ്പെട്ടു.

​കനോലി പ്ലോട്ടിന് സമീപം വനം വകുപ്പ് 1981-ൽ കേരള സ്റ്റേറ്റ് വുഡ് ഇൻഡസ്ട്രീസ് ലിമിറ്റഡിന് ലീസിന് നൽകിയ സ്ഥലവും പാട്ടക്കാലാവധി അവസാനിച്ചതിനെ തുടർന്ന് തിരിച്ചെടുത്തിട്ടുണ്ട്. കേരള ഫോറസ്റ്റ് ഡെവലപ്‌മെന്റ് കോർപ്പറേഷനുമായി സഹകരിച്ച് ഇവിടെയുള്ള ഫാക്ടറിയും ക്വാർട്ടേഴ്സുകളും പുനരുദ്ധരിച്ച് ഇക്കോ ടൂറിസം പദ്ധതിയുടെ ഭാഗമാക്കുമെന്നും മന്ത്രി കൂട്ടിച്ചേർത്തു.

​ചാലിയാർ പുഴയുടെ ഇരുകരകളിലായി രാമല്ലൂർ റിസർവിലാണ് ലോകത്തിലെ ഏറ്റവും വലിയ തേക്ക് സ്ഥിതി ചെയ്യുന്ന കനോലി പ്ലോട്ട് സ്ഥിതി ചെയ്യുന്നത്. 1842-ൽ അന്നത്തെ മലബാർ കളക്ടറായിരുന്ന എച്ച്.വി. കനോലിയുടെ നിർദ്ദേശപ്രകാരം ഫോറസ്റ്റ് സബ് കൺസർവേറ്ററായിരുന്ന ചാത്തു മേനോന്റെ നേതൃത്വത്തിലാണ് ഇവിടെ തേക്ക് തൈകൾ നട്ടുപിടിപ്പിച്ചത്. സമഗ്ര വികസന പദ്ധതികൾ പൂർത്തിയാകുന്നതോടെ ചരിത്രപ്രധാനമായ ഈ പ്രദേശത്തേക്ക് കൂടുതൽ വിനോദസഞ്ചാരികളെ ആകർഷിക്കാൻ സാധിക്കുമെന്നാണ് വിലയിരുത്തപ്പെടുന്നത്.

​യോഗത്തിൽ ആര്യാടൻ ഷൗക്കത്ത് എം.എൽ.എ, നിലമ്പൂർ മുനിസിപ്പൽ ചെയർപേഴ്‌സൺ പത്മിനി ഗോപിനാഥ്, വൈസ് ചെയർപേഴ്‌സൺ ഷൗക്കത്ത് അലി കൂമഞ്ചേരി, അഡീഷണൽ പ്രിൻസിപ്പൽ ചീഫ് ഫോറസ്റ്റ് കൺസർവേറ്റർ ഡോ. പ്രമോദ് ജി. കൃഷ്ണൻ, ചീഫ് കൺസർവേറ്റർ ഓഫ് ഫോറസ്റ്റ് കെ. വിജയാനന്ദ്, കെ. കാർത്തികേയൻ, ഡി.എഫ്.ഒമാരായ പി. ധനേഷ് കുമാർ, ജി. ധനിക് ലാൽ തുടങ്ങിയവർ പങ്കെടുത്തു.