ദേശീയപാതകളിൽ അമിതഭാരം കയറ്റുന്ന വാഹനങ്ങൾക്ക് നാലിരട്ടി ടോൾ പുതിയ നിയമം പ്രാബല്യത്തിൽ
ദേശീയപാതകളിൽ അമിതഭാരം കയറ്റിയെത്തുന്ന വാഹനങ്ങൾക്ക് ഏപ്രിൽ 15 മുതൽ നാലിരട്ടി വരെ ടോൾ ഈടാക്കും. ഡിജിറ്റൽ പേയ്മെന്റ് നിർബന്ധമാക്കി കേന്ദ്ര സർക്കാർ ഉത്തരവ്.
അനില എം കൃഷ്ണൻ 
ദേശീയപാതകളിൽ അമിതഭാരം കയറ്റുന്ന വാഹനങ്ങൾക്ക് നാലിരട്ടി ടോൾ; പുതിയ നിയമം നിലവിൽ വന്നു
ന്യൂഡൽഹി: രാജ്യത്തെ ദേശീയപാതകളിലൂടെ അനുവദനീയമായ പരിധിയിൽ കൂടുതൽ ഭാരം കയറ്റി എത്തുന്ന വാഹനങ്ങളിൽ നിന്ന് അധിക ടോൾ ഈടാക്കാനുള്ള കേന്ദ്ര സർക്കാർ ഉത്തരവ് പ്രാബല്യത്തിലായി. ഏപ്രിൽ 15 മുതൽ നടപ്പിലാക്കിയ പുതിയ നിയമപ്രകാരം, വാഹനത്തിന്റെ നിശ്ചിത ഭാരത്തേക്കാൾ 40 ശതമാനത്തിൽ കൂടുതൽ അധികമായി കയറ്റുന്ന വാഹനങ്ങൾ നിലവിലുള്ള ടോൾ നിരക്കിന്റെ നാലിരട്ടി തുക പിഴയായി നൽകേണ്ടി വരും. റോഡുകളുടെ ആയുസ്സ് കുറയുന്നതും വർദ്ധിച്ചുവരുന്ന അപകടങ്ങളും നിയന്ത്രിക്കുക എന്ന ലക്ഷ്യത്തോടെയാണ് ഈ കർശന നടപടി.
പുതിയ നിയമമനുസരിച്ച് വാഹനങ്ങൾക്ക് അനുവദിച്ചിട്ടുള്ള ഭാരത്തിന്റെ 10 ശതമാനം വരെ അധികം കയറ്റുന്ന വാഹനങ്ങളെ പിഴയിൽ നിന്ന് ഒഴിവാക്കിയിട്ടുണ്ട്. എന്നാൽ 10 ശതമാനം മുതൽ 40 ശതമാനം വരെ അധികഭാരം കയറ്റിയാൽ ടോൾ നിരക്കിന്റെ ഇരട്ടി തുക ഈടാക്കും. 40 ശതമാനത്തിന് മുകളിലുള്ള ഓരോ നിയമലംഘനത്തിനും ടോൾ നിരക്കിന്റെ നാലിരട്ടി തുക തന്നെ നൽകേണ്ടി വരും. പിഴത്തുക ഫാസ്റ്റാഗ്, യുപിഐ അല്ലെങ്കിൽ സർക്കാർ അംഗീകരിച്ച മറ്റ് ഡിജിറ്റൽ പേയ്മെന്റ് സംവിധാനങ്ങൾ വഴി മാത്രമേ സ്വീകരിക്കാവൂ എന്ന് ടോൾ പ്ലാസകൾക്ക് കർശന നിർദ്ദേശം നൽകിയിട്ടുണ്ട്. പണമായി പിഴ സ്വീകരിക്കാൻ അനുവാദമില്ല.
ഇത്തരത്തിൽ പിഴ ഈടാക്കുന്ന വാഹനങ്ങളുടെ പൂർണ്ണ വിവരങ്ങൾ തത്സമയം തന്നെ കേന്ദ്ര മോട്ടോർ വാഹന പോർട്ടലായ 'വാഹൻ' സൈറ്റിലേക്ക് കൈമാറണം. ടോൾ പ്ലാസകളിൽ വാഹനങ്ങളുടെ തൂക്കം പരിശോധിക്കാനുള്ള വെയ്ബ്രിഡ്ജ് സംവിധാനം ഇല്ലാത്ത ഇടങ്ങളിൽ അധിക ടോൾ ഈടാക്കാൻ പാടില്ലെന്നും ഉത്തരവിൽ വ്യക്തമാക്കുന്നുണ്ട്. കൂടാതെ, അമിതഭാരം കയറ്റിയ വാഹനങ്ങൾക്ക് ഫാസ്റ്റാഗ് ഇല്ലെങ്കിൽ ടോൾ പ്ലാസകളിൽ നിലവിലുള്ള അധിക പിഴ കൂടി ഇതോടൊപ്പം നൽകേണ്ടി വരുമെന്ന് അധികൃതർ അറിയിച്ചു.
