യുവതിയോട് മോശമായി പെരുമാറി തിരുവനന്തപുരത്ത് ലൈസൻസില്ലാത്ത സ്പാ നഗരസഭ അടപ്പിച്ചു
തിരുവനന്തപുരം സെക്രട്ടേറിയറ്റിന് എതിർവശത്തുള്ള സ്പർശൻ വെൽനെസ് സ്പാ നഗരസഭ അടപ്പിച്ചു. യുവതിയുടെ പരാതിയെ തുടർന്ന് മേയർ വി.വി. രാജേഷിന്റെ നിർദ്ദേശപ്രകാരമാണ് നടപടി.
അനില എം കൃഷ്ണൻ 
യുവതിയോട് മോശമായി പെരുമാറി; തിരുവനന്തപുരത്ത് ലൈസൻസില്ലാത്ത സ്പാ നഗരസഭ അടപ്പിച്ചു
തിരുവനന്തപുരം: സെക്രട്ടേറിയറ്റിന് സമീപം പ്രവർത്തിക്കുന്ന 'സ്പർശൻ വെൽനെസ് സ്പാ' തിരുവനന്തപുരം നഗരസഭ അടപ്പിച്ചു. ജോലിക്കായി അഭിമുഖത്തിനെത്തിയ യുവതിയോട് സ്ഥാപന അധികൃതർ മോശമായി പെരുമാറിയെന്ന പരാതിയെത്തുടർന്നാണ് നടപടി. പരിശോധനയിൽ സ്ഥാപനത്തിന് കൃത്യമായ ലൈസൻസില്ലെന്നും മാനദണ്ഡങ്ങൾ ലംഘിച്ചാണ് പ്രവർത്തിക്കുന്നതെന്നും കണ്ടെത്തി.
മേയറുടെ ഇടപെടൽ
അഭിമുഖത്തിനെത്തിയപ്പോൾ നേരിടേണ്ടി വന്ന ദുരനുഭവത്തെക്കുറിച്ച് യുവതി തിരുവനന്തപുരം മേയർ വി.വി. രാജേഷിനെ ഫോണിൽ വിളിച്ച് നേരിട്ട് പരാതിപ്പെടുകയായിരുന്നു. ഇതിന് പിന്നാലെ മേയറുടെ നിർദ്ദേശപ്രകാരം കോർപറേഷൻ ആരോഗ്യസുരക്ഷാ വിഭാഗം ഉദ്യോഗസ്ഥർ സ്ഥലത്തെത്തി പരിശോധന നടത്തി.
പരിശോധനയിൽ കണ്ടെത്തിയ നിയമലംഘനങ്ങൾ:
രണ്ട് മുറികളുള്ള സ്പായിൽ ഒരു ഭാഗത്തിന് മാത്രമേ ലൈസൻസ് ഉണ്ടായിരുന്നുള്ളൂ.
മസാജ് ചെയ്യുന്ന ട്രെയ്നർമാരുടെ യോഗ്യത തെളിയിക്കുന്ന സർട്ടിഫിക്കറ്റുകളോ ജീവനക്കാരുടെ രേഖകളോ സ്ഥാപനത്തിൽ ഉണ്ടായിരുന്നില്ല.
പാങ്ങോട് സ്വദേശി മനോഹരന്റെ പേരിലാണ് ലൈസൻസ് എങ്കിലും ജീവനക്കാർക്ക് ഇതിനെക്കുറിച്ച് അറിവുണ്ടായിരുന്നില്ല.
നഗരത്തിൽ പരിശോധന ശക്തമാക്കും: മേയർ
നഗരത്തിലെ സ്പാ, മസാജ് സെന്ററുകളുടെ മറവിൽ വ്യാപകമായി നിയമവിരുദ്ധ പ്രവർത്തനങ്ങൾ നടക്കുന്നുണ്ടെന്ന് മേയർ വി.വി. രാജേഷ് പറഞ്ഞു. സ്പാ സെന്ററുകളിൽ ഡോക്ടർമാരുടെ സേവനം നിർബന്ധമാണെങ്കിലും പലയിടത്തും ഇത് പാലിക്കപ്പെടുന്നില്ല. പുരുഷന്മാർക്ക് പുരുഷന്മാരും സ്ത്രീകൾക്ക് സ്ത്രീകളും മാത്രമേ മസാജ് ചെയ്യാവൂ എന്ന നിബന്ധന ലംഘിച്ച് പലയിടത്തും 'ക്രോസ് മസാജിങ്' നടക്കുന്നുണ്ടെന്നും അദ്ദേഹം ചൂണ്ടിക്കാട്ടി.
ഇത്തരം സ്ഥാപനങ്ങൾക്ക് ചില ഉന്നത പൊലീസ് ഉദ്യോഗസ്ഥരുടെ പിന്തുണയുണ്ടെന്നും വരും ദിവസങ്ങളിൽ പൊലീസിന്റെ സഹായത്തോടെ നഗരത്തിലെ മുഴുവൻ സെന്ററുകളിലും പരിശോധന നടത്തുമെന്നും മേയർ കൂട്ടിച്ചേർത്തു. അതേസമയം, സംഭവത്തെക്കുറിച്ച് ഔദ്യോഗികമായി പരാതി ലഭിച്ചിട്ടില്ലെന്നാണ് പൊലീസിന്റെ നിലപാട്.
