വീണാ ജോർജിന് മികച്ച നടിക്കുള്ള അവാർഡ് ലഭിക്കും വി.ഡി. സതീശൻ
മന്ത്രി വീണാ ജോർജിനെതിരെ രൂക്ഷവിമർശനവുമായി വി.ഡി. സതീശൻ. കെഎസ്യു പ്രതിഷേധത്തിനിടെ പരിക്കേറ്റത് നാടകമാണെന്നും കേരളം വലിയ കടക്കെണിയിലാണെന്നും അദ്ദേഹം ആരോപിച്ചു.
Angel Varghese 
വീണാ ജോർജിന് മികച്ച നടിക്കുള്ള അവാർഡ് ലഭിക്കും; ആക്രമണ നാടകം കെട്ടിച്ചമച്ചതെന്ന് വി.ഡി. സതീശൻ
ആരോഗ്യവകുപ്പ് മന്ത്രി വീണാ ജോർജിനെതിരെ കടുത്ത പരിഹാസവുമായി പ്രതിപക്ഷ നേതാവ് വി.ഡി. സതീശൻ. കെഎസ്യു പ്രതിഷേധത്തിനിടെ മന്ത്രിക്ക് പരിക്കേറ്റു എന്നത് പൂർണ്ണമായും കെട്ടിച്ചമച്ച കഥയാണെന്നും, അഭിനയത്തിന് മന്ത്രിക്ക് കേന്ദ്ര-സംസ്ഥാന അവാർഡുകൾ ലഭിക്കുമെന്നും അദ്ദേഹം പരിഹസിച്ചു. യുഡിഎഫ് സംഘടിപ്പിച്ച പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം.
റെയിൽവേ സ്റ്റേഷനിലെ സിസിടിവി ദൃശ്യങ്ങളിൽ അക്രമം നടന്നതിന്റെ യാതൊരു സൂചനയുമില്ലെന്ന് സതീശൻ ചൂണ്ടിക്കാട്ടി. ഒന്നാമത്തെ പ്ലാറ്റ്ഫോമിലില്ലാത്ത കുഴപ്പം മൂന്നാമത്തെ പ്ലാറ്റ്ഫോമിൽ വെച്ച് മന്ത്രി അഭിനയിച്ചു കാണിക്കുകയായിരുന്നു. ഈ വ്യാജ സംഭവത്തിന്റെ പേരിൽ സംസ്ഥാന വ്യാപകമായി സിപിഎം അക്രമം അഴിച്ചുവിടുകയാണ്. ഇത്തരം അക്രമങ്ങളെ ശക്തമായി നേരിടുമെന്നും അദ്ദേഹം മുന്നറിയിപ്പ് നൽകി.
സംസ്ഥാനത്തിന്റെ സാമ്പത്തിക പ്രതിസന്ധിയെക്കുറിച്ചും പ്രതിപക്ഷ നേതാവ് രൂക്ഷമായ വിമർശനം ഉന്നയിച്ചു. അടുത്ത മാസം പിണറായി സർക്കാർ ഭരണം ഒഴിയുമ്പോൾ കേരളം 6 ലക്ഷം കോടി രൂപയുടെ കടബാധ്യതയിലാകും. അഴിമതിയും ആർഭാടവും മുഖമുദ്രയാക്കിയ എൽഡിഎഫ് സർക്കാർ സാധാരണക്കാരന്റെ ജീവിതം ദുസ്സഹമാക്കി. ഇന്ത്യയിൽ ഏറ്റവും കൂടുതൽ വിലക്കയറ്റമുള്ള സംസ്ഥാനമായി കേരളം മാറിയെന്നും അദ്ദേഹം ആരോപിച്ചു.
കെപിസിസി കോർ കമ്മിറ്റി അംഗം പി.ജെ. കുര്യൻ സമ്മേളനം ഉദ്ഘാടനം ചെയ്തു. വരാനിരിക്കുന്ന തിരഞ്ഞെടുപ്പിൽ യുഡിഎഫ് 100-ലധികം സീറ്റുകൾ നേടി അധികാരത്തിൽ വരുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. യുഡിഎഫ് നിയോജക മണ്ഡലം ചെയർമാൻ ലാലു തോമസ് അധ്യക്ഷത വഹിച്ച ചടങ്ങിൽ പി.ജെ. ജോസഫ്, അടൂർ പ്രകാശ്, ബെന്നി ബഹനാൻ, ആന്റോ ആന്റണി തുടങ്ങിയ പ്രമുഖ നേതാക്കൾ പങ്കെടുത്തു. ചടങ്ങിൽ വെച്ച് നിയോജക മണ്ഡലത്തിന്റെ വികസന രേഖ വി.ഡി. സതീശന് കൈമാറി.
