വിഴിഞ്ഞം രണ്ടാംഘട്ട വികസനത്തിന് തുടക്കം
വിഴിഞ്ഞം വികസനക്കുതിപ്പിൽ രണ്ടാംഘട്ട വികസനത്തിന് ഇന്ന് തുടക്കം മുഖ്യമന്ത്രി ഉദ്ഘാടനം ചെയ്യും
Angel Varghese 
വിഴിഞ്ഞം വികസനക്കുതിപ്പിൽ: രണ്ടാംഘട്ട വികസനത്തിന് ഇന്ന് തുടക്കം; മുഖ്യമന്ത്രി ഉദ്ഘാടനം ചെയ്യും
തിരുവനന്തപുരം: രാജ്യത്തെ ആദ്യ ഓട്ടോമേറ്റഡ് തുറമുഖമായ വിഴിഞ്ഞം അന്താരാഷ്ട്ര തുറമുഖം വികസനത്തിന്റെ അടുത്ത ഘട്ടത്തിലേക്ക്. തുറമുഖത്തിന്റെ രണ്ട്, മൂന്ന്, നാല് ഘട്ടങ്ങളുടെ സംയുക്ത നിർമ്മാണ ഉദ്ഘാടനം ഇന്ന് വൈകുന്നേരം 4 മണിക്ക് മുഖ്യമന്ത്രി പിണറായി വിജയൻ നിർവഹിക്കും. ചടങ്ങിൽ കേന്ദ്ര തുറമുഖ വകുപ്പ് മന്ത്രി മുഖ്യാതിഥിയായി പങ്കെടുക്കും.
പ്രതിപക്ഷ നേതാവ് വി.ഡി. സതീശൻ, കേന്ദ്ര-സംസ്ഥാന മന്ത്രിമാർ, എം.പിമാർ, എം.എൽ.എമാർ തുടങ്ങിയ പ്രമുഖർ ചടങ്ങിൽ സംബന്ധിക്കും. ഏകദേശം 9,700 കോടി രൂപയുടെ ബൃഹത്തായ പദ്ധതികളാണ് ഈ ഘട്ടത്തിൽ നടപ്പിലാക്കുന്നത്. 2028-ഓടെ തുറമുഖത്തിന്റെ സമ്പൂർണ്ണ വികസനം പൂർത്തിയാക്കുക എന്ന ലക്ഷ്യത്തോടെയാണ് സർക്കാർ മുന്നോട്ട് പോകുന്നത്.
2024 ഡിസംബർ 3-ന് ഒന്നാംഘട്ടം പ്രവർത്തനക്ഷമമായതിന് ശേഷം റെക്കോർഡ് നേട്ടങ്ങളാണ് വിഴിഞ്ഞം കൈവരിച്ചത്. ഡിസംബറിൽ മാത്രം 1.23 ലക്ഷം കണ്ടെയ്നറുകൾ കൈകാര്യം ചെയ്തത് വലിയ നാഴികക്കല്ലായി. ആദ്യ ഒരു വർഷത്തിനുള്ളിൽ 15 ലക്ഷം കണ്ടെയ്നറുകൾ കൈകാര്യം ചെയ്യാനും തുറമുഖത്തിന് സാധിച്ചു. രണ്ടാംഘട്ട നിർമ്മാണ പ്രവർത്തനങ്ങൾ പൂർത്തിയാകുന്നതോടെ റോഡ് വഴിയുള്ള കണ്ടെയ്നർ നീക്കം കൂടുതൽ സുഗമമാകും. വരും വർഷങ്ങളിൽ ലോകത്തിലെ തന്നെ ഏറ്റവും പ്രധാനപ്പെട്ട ട്രാൻസ്ഷിപ്പ്മെന്റ് ഹബ്ബായി വിഴിഞ്ഞം മാറുമെന്നാണ് പ്രതീക്ഷിക്കുന്നത്.
