പാലക്കാട്ട് വീണ്ടുമൊരു മധു
സംശയത്തിന്റെ പേരിൽ ആൾക്കൂട്ട മർദ്ദനം പാലക്കാട് ഇതരസംസ്ഥാന തൊഴിലാളി കൊല്ലപ്പെട്ടു വിശപ്പടക്കാൻ തൊഴിൽ തേടി കേരളത്തിലെത്തിയ ഇതരസംസ്ഥാന തൊഴിലാളിയാണ്
Angel Varghese 
സംശയത്തിന്റെ പേരിൽ ആൾക്കൂട്ട മർദ്ദനം . പാലക്കാട് ഇതരസംസ്ഥാന തൊഴിലാളി കൊല്ലപ്പെട്ടു
പാലക്കാട്: വിശപ്പടക്കാൻ തൊഴിൽ തേടി കേരളത്തിലെത്തിയ ഇതരസംസ്ഥാന തൊഴിലാളിക്ക് പാലക്കാട് അട്ടപ്പള്ളത്ത് ദാരുണാന്ത്യം. ജാർഖണ്ഡ് സ്വദേശി റാം നാരായൺ ആണ് മോഷ്ടാവെന്നാരോപിച്ച് ഒരു സംഘം യുവാക്കൾ നടത്തിയ ആൾക്കൂട്ട മർദ്ദനത്തിന് ഇരയായി കൊല്ലപ്പെട്ടത്. ഭാര്യയുടെ മരണശേഷം മക്കളുടെ സംരക്ഷണത്തിനായി നാല് ദിവസം മുൻപ് മാത്രം കേരളത്തിലെത്തിയതായിരുന്നു ഇദ്ദേഹം.
ക്രൂരമായ മർദ്ദനം, വഴിതെറ്റിയെത്തിയതിന് ശിക്ഷ
കഴിഞ്ഞ ദിവസം വൈകുന്നേരത്തോടെയാണ് നാടിനെ നടുക്കിയ സംഭവം അരങ്ങേറിയത്. വഴിതെറ്റി ജനവാസ കേന്ദ്രത്തിലെത്തിയ റാം നാരായണനെ ബംഗ്ലാദേശിയാണെന്നും മോഷ്ടാവാണെന്നും ആരോപിച്ച് നാലഞ്ചു പേരടങ്ങുന്ന സംഘം വളയുകയായിരുന്നു. താൻ നിരപരാധിയാണെന്ന് അറിയാവുന്ന ഭാഷയിൽ അയാൾ യാചിച്ചിട്ടും അക്രമികൾ ചെവികൊണ്ടില്ല. നിലത്തിട്ട് ചവിട്ടുകയും തലയ്ക്കടക്കം ക്രൂരമായി മർദ്ദിക്കുകയും ചെയ്തു.
മർദ്ദനത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവത്തിന്റെ ഭീകരത പുറംലോകമറിഞ്ഞത്. ഭാര്യയുടെ വേർപാടിനെത്തുടർന്നുള്ള മാനസിക വിഷമത്തിലും ഭാഷാപരമായ ബുദ്ധിമുട്ടുകൾ കാരണവും അക്രമികളുടെ ചോദ്യങ്ങൾക്ക് മറുപടി നൽകാൻ ഇദ്ദേഹത്തിന് കഴിഞ്ഞിരുന്നില്ല.
മധു വധക്കേസിന് സമാനമായ സാഹചര്യം
യാതൊരുവിധ ക്രിമിനൽ പശ്ചാത്തലവുമില്ലാത്ത ഒരാളെ പോലീസിൽ ഏൽപ്പിക്കുന്നതിന് പകരം നിയമം കയ്യിലെടുത്ത് തല്ലിക്കൊന്നത് വലിയ പ്രതിഷേധത്തിന് ഇടയാക്കിയിട്ടുണ്ട്. അട്ടപ്പാടിയിൽ മധു കൊല്ലപ്പെട്ടതിന് സമാനമായ സാഹചര്യമാണ് ഇവിടെയും ഉണ്ടായതെന്നാണ് നാട്ടുകാരുടെ ആക്ഷേപം. സംഭവത്തിൽ ഉൾപ്പെട്ട പ്രതികളിൽ ചിലർ പ്രാദേശിക രാഷ്ട്രീയ പ്രവർത്തകരാണെന്നും സൂചനയുണ്ട്. പോലീസ് കേസെടുത്ത് അന്വേഷണം ആരംഭിച്ചു.
