ഈ കുഞ്ഞുമോൾ ഇനി ദൈവം ആലിന് ആദരാഞ്ജലി അർപ്പിച്ച് സുരേഷ് ഗോപി
അവയവദാനത്തിലൂടെ മാതൃകയായ ആലിൻ ഷെറിൻ ഏബ്രഹാമിന് ആദരാഞ്ജലി അർപ്പിച്ച് സുരേഷ് ഗോപി.
അനില എം കൃഷ്ണൻ
140
ആലിൻ ദൈവതുല്യയായ സന്ദേശം; യാത്ര പാതിവഴിയിൽ നിർത്തി പ്രധാനമന്ത്രിയുടെ നിർദ്ദേശപ്രകാരം സുരേഷ് ഗോപി മല്ലപ്പള്ളിയിൽ
മല്ലപ്പള്ളി: അവയവദാനത്തിലൂടെ പുതുജീവൻ നൽകി വിടവാങ്ങിയ ആലിൻ ഷെറിൻ ഏബ്രഹാമിന് ആദരാഞ്ജലി അർപ്പിക്കാൻ കേന്ദ്രമന്ത്രി സുരേഷ് ഗോപിയെത്തിയത് പ്രധാനമന്ത്രി നരേന്ദ്ര മോദിയുടെ പ്രത്യേക നിർദ്ദേശപ്രകാരം. ശിവരാത്രി ചടങ്ങുകൾക്കായി കോയമ്പത്തൂരിലേക്കുള്ള യാത്ര പകുതിവഴിയിൽ ഉപേക്ഷിച്ചാണ് മന്ത്രി മല്ലപ്പള്ളിയിലെത്തിയത്.
"ഈ മുഹൂർത്തവുമായി പൂർണ്ണമായും താദാത്മ്യം പ്രാപിക്കാൻ കഴിയുന്ന ഒരച്ഛനാണ് ഞാൻ," എന്ന് വികാരാധീനനായി സുരേഷ് ഗോപി പറഞ്ഞു. കുഞ്ഞ് ആലിന് ആദരാഞ്ജലി അർപ്പിച്ച അദ്ദേഹം പ്രധാനമന്ത്രിയുടെ അനുശോചനവും കുടുംബത്തെ അറിയിച്ചു.
പ്രധാനമന്ത്രിയുടെ ഫോൺ സന്ദേശം
കോയമ്പത്തൂരിലേക്കുള്ള യാത്രയ്ക്കിടെയാണ് പ്രധാനമന്ത്രി തന്നെ വിളിച്ചതെന്ന് മന്ത്രി വെളിപ്പെടുത്തി. "കുഞ്ഞ് ആലിൻ്റെ വേർപാടും ആ കുടുംബം എടുത്ത അവയവദാനമെന്ന മഹത്തായ തീരുമാനവും പ്രധാനമന്ത്രിയെ അറിയിച്ചിരുന്നു. തുടർന്നാണ് അദ്ദേഹം എന്നെ നേരിട്ട് അങ്ങോട്ട് പോകാൻ ചുമതലപ്പെടുത്തിയത്," സുരേഷ് ഗോപി പറഞ്ഞു.
കേരളത്തിന് വലിയ സന്ദേശം
കേരളത്തിന് വലിയൊരു സന്ദേശമാണ് ആലിൻ നൽകിയതെന്ന് മന്ത്രി കൂട്ടിച്ചേർത്തു. മുൻപ് ഡൽഹിയിലും ഒഡീഷയിലും ഇത്തരത്തിൽ ചെറിയ കുട്ടികളുടെ അവയവങ്ങൾ ദാനം ചെയ്ത സംഭവങ്ങൾ അദ്ദേഹം ഓർത്തെടുത്തു. "അവയവദാനത്തിലൂടെ ഒട്ടേറെപ്പേർക്ക് പുതുജീവൻ നൽകിയ ആലിൻ മലയാളികളുടെ മനസ്സിൽ എന്നും ജീവിക്കും. ഈ കുഞ്ഞുമോൾ ഇനി എല്ലാവർക്കും ദൈവമാണ്," അദ്ദേഹം പറഞ്ഞു. കുടുംബത്തിൻ്റെ ദുഃഖത്തിൽ പങ്കുചേരുന്നതായും അദ്ദേഹം അറിയിച്ചു.
