സംസ്ഥാനത്ത് സൂര്യാഘാത സാധ്യത 11 മുതൽ 3 വരെ നേരിട്ട് വെയിലേൽക്കരുത്
സംസ്ഥാനത്ത് വരും ദിവസങ്ങളിൽ ചൂട് സാധാരണയേക്കാൾ 3 മുതൽ 4 ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. സൂര്യാഘാതവും നിർജലീകരണവും ഒഴിവാക്കാൻ സംസ്ഥാന ദുരന്ത നിവാരണ അതോറിറ്റി പൊതുജനങ്ങൾക്കായി പ്രത്യേക ജാഗ്രത നിർദേശങ്ങൾ പുറപ്പെടുവിച്ചു.
അനില എം കൃഷ്ണൻ 
സംസ്ഥാനത്ത് താപനില ഉയരുന്നു: പൊതുജനങ്ങൾക്കായി ജാഗ്രത നിർദേശങ്ങൾ പുറപ്പെടുവിച്ച് ദുരന്ത നിവാരണ അതോറിറ്റി
തിരുവനന്തപുരം: സംസ്ഥാനത്ത് വരും ദിവസങ്ങളിൽ താപനില വർധിക്കാൻ സാധ്യതയുള്ളതിനാൽ പൊതുജനങ്ങൾക്കായി സംസ്ഥാന ദുരന്ത നിവാരണ അതോറിറ്റി ജാഗ്രത നിർദേശങ്ങൾ പുറപ്പെടുവിച്ചു. സെപ്റ്റംബർ 7 മുതൽ 9 വരെ കേരളത്തിൽ സാധാരണയേക്കാൾ 3 മുതൽ 4 ഡിഗ്രി സെൽഷ്യസ് വരെ ചൂട് കൂടാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്.
ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി ഗുരുതരമായ ആരോഗ്യപ്രശ്നങ്ങൾക്ക് കാരണമാകും. ഈ സാഹചര്യത്തിൽ പൊതുജനങ്ങളും വിവിധ സ്ഥാപനങ്ങളും കർശനമായ മുൻകരുതലുകൾ സ്വീകരിക്കേണ്ടതാണ്.
പ്രധാന ജാഗ്രത നിർദേശങ്ങൾ:
വെയിലേൽക്കുന്നത് ഒഴിവാക്കുക: പകൽ 11 മണി മുതൽ വൈകുന്നേരം 3 മണി വരെയുള്ള സമയത്ത് നേരിട്ട് ശരീരത്തിൽ കൂടുതൽ സമയം വെയിലേൽക്കുന്നത് ഒഴിവാക്കുക.
ധാരാളം വെള്ളം കുടിക്കുക: ദാഹമില്ലെങ്കിലും ആവശ്യത്തിന് ശുദ്ധജലം കുടിക്കുക. നിർജലീകരണമുണ്ടാക്കുന്ന മദ്യം, കാപ്പി, ചായ, കാർബണേറ്റഡ് പാനീയങ്ങൾ എന്നിവ പകൽ സമയത്ത് ഒഴിവാക്കണം. പഴങ്ങളും പച്ചക്കറികളും, ORS ലായനി, സംഭാരം എന്നിവയുടെ ഉപയോഗം കൂട്ടുക.
വസ്ത്രധാരണം: അയഞ്ഞതും ഇളം നിറത്തിലുള്ളതുമായ കോട്ടൺ വസ്ത്രങ്ങൾ ധരിക്കുക. പുറത്തിറങ്ങുമ്പോൾ പാദരക്ഷകളും കുടയോ തൊപ്പിയോ ഉപയോഗിക്കുക.
തൊഴിൽ സമയം ക്രമീകരിക്കുക: നിർമാണത്തൊഴിലാളികൾ, കർഷകത്തൊഴിലാളികൾ, വഴിയോരക്കച്ചവടക്കാർ തുടങ്ങിയവർ ജോലി സമയം ക്രമീകരിക്കുകയും ആവശ്യത്തിന് വിശ്രമം ഉറപ്പാക്കുകയും വേണം.
കുട്ടികൾക്കും വിദ്യാഭ്യാസ സ്ഥാപനങ്ങൾക്കും: സ്കൂളുകളിൽ ശുദ്ധമായ കുടിവെള്ളവും ക്ലാസ് മുറികളിൽ വായുസഞ്ചാരവും ഉറപ്പാക്കണം. വെയിലേൽക്കുന്ന രീതിയിലുള്ള അസംബ്ലികളും മറ്റ് പരിപാടികളും ഒഴിവാക്കുക. കുട്ടികളെയോ വളർത്തുമൃഗങ്ങളെയോ പാർക്ക് ചെയ്ത വാഹനങ്ങളിൽ തനിച്ചാക്കി പോകരുത്.
പ്രത്യേക ശ്രദ്ധ വേണ്ട വിഭാഗങ്ങൾ: കിടപ്പുരോഗികൾ, പ്രായമായവർ, ഗർഭിണികൾ, കുട്ടികൾ, ഭിന്നശേഷിക്കാർ എന്നിവർ പകൽ 11 മുതൽ 3 മണി വരെ നേരിട്ട് വെയിലേൽക്കാതെ പ്രത്യേക ശ്രദ്ധ പുലർത്തണം.
ഓൺലൈൻ ഡെലിവറി, മാധ്യമപ്രവർത്തകർ: ഓൺലൈൻ ഭക്ഷണ വിതരണം നടത്തുന്നവർക്കും ജോലിയിലുള്ള മാധ്യമപ്രവർത്തകർക്കും പോലീസുകാർക്കും വിശ്രമവും ആവശ്യത്തിന് കുടിവെള്ളവും ഉറപ്പാക്കണം.
തീപിടുത്ത സാധ്യതയും കാട്ടുതീയും: മാർക്കറ്റുകൾ, മാലിന്യശേഖരണ കേന്ദ്രങ്ങൾ തുടങ്ങിയ ഇടങ്ങളിൽ ഫയർ ഓഡിറ്റ് നടത്തണം. വനമേഖലയോട് ചേർന്ന് താമസിക്കുന്നവരും വിനോദസഞ്ചാരികളും കാട്ടുതീ സാധ്യത മുൻനിർത്തി വനംവകുപ്പിന്റെ നിർദേശങ്ങൾ കർശനമായി പാലിക്കണം.
ആരോഗ്യ അസ്വസ്ഥതകൾ അനുഭവപ്പെടുന്നവർ ഉടൻ തന്നെ വിശ്രമിക്കുകയും വൈദ്യസഹായം തേടുകയും ചെയ്യണമെന്ന് അതോറിറ്റി അറിയിച്ചു.
