ഓണാഘോഷം വിപുലമാക്കാൻ എറണാകുളം ജില്ലാ ഭരണകൂടം ആഘോഷങ്ങൾ ഓഗസ്റ്റ് 24 മുതൽ 30 വരെ
എറണാകുളം ജില്ലാതല ഓണാഘോഷ പരിപാടികൾ ഓഗസ്റ്റ് 24 മുതൽ 30 വരെ മൂന്ന് പ്രധാന വേദികളിലായി നടക്കും. ഓഗസ്റ്റ് 24 ന് വൈകുന്നേരം 6 നാണ് ഔദ്യോഗിക ഉദ്ഘാടനം.
അനില എം കൃഷ്ണൻ 
ഓണാഘോഷം വിപുലമാക്കാൻ എറണാകുളം ജില്ലാ ഭരണകൂടം; ജില്ലാതല ഉദ്ഘാടനം ഓഗസ്റ്റ് 24-ന്
കൊച്ചി: എറണാകുളം ജില്ലാ ഭരണകൂടത്തിന്റെ നേതൃത്വത്തിൽ ഈ വർഷത്തെ ഓണാഘോഷ പരിപാടികൾ ഓഗസ്റ്റ് 24 മുതൽ 30 വരെ വിപുലമായി സംഘടിപ്പിക്കും. ദർബാർ ഹാൾ ഗ്രൗണ്ട്, ഫോർട്ട് കൊച്ചി, പറവൂർ എന്നിങ്ങനെ മൂന്ന് പ്രധാന വേദികളിലായിരിക്കും ആഘോഷങ്ങൾ അരങ്ങേറുക. ഇതിനുപുറമേ, ജില്ലയിലെ വിവിധ നിയമസഭാ മണ്ഡലങ്ങളിൽ അതത് എം.എൽ.എമാരുടെ നേതൃത്വത്തിലും പ്രത്യേക ആഘോഷ പരിപാടികൾ ഉണ്ടാകും.
ഓഗസ്റ്റ് 24-ന് വൈകുന്നേരം ആറുമണിക്ക് ജില്ലാതല ഓണാഘോഷത്തിന്റെ ഔദ്യോഗിക ഉദ്ഘാടനം നടക്കും. ഓഗസ്റ്റ് 25-ന് ജില്ലയിലെ ട്രൈബൽ ഉന്നതികളിൽ പ്രത്യേക ഓണാഘോഷ പരിപാടികൾ സംഘടിപ്പിക്കാനും തീരുമാനമായിട്ടുണ്ട്. ആഘോഷങ്ങളിൽ ജില്ലയിലെ മുഴുവൻ ജനപ്രതിനിധികളും പങ്കാളികളാകും.
ഉന്നതവിദ്യാഭ്യാസ വകുപ്പ് മന്ത്രിയും ജില്ലയുടെ ചുമതലയുള്ള മന്ത്രിയുമായ റോജി എം. ജോണിന്റെ അധ്യക്ഷതയിലാണ് സംഘാടക സമിതി യോഗം ചേർന്നത്. ആഘോഷങ്ങളുടെ സുഗമമായ നടത്തിപ്പിനായി പ്രോഗ്രാം, ഫിനാൻസ്, പബ്ലിസിറ്റി തുടങ്ങി വിവിധ ഉപസമിതികൾക്ക് യോഗം രൂപം നൽകി.
കലാകാരന്മാർക്ക് അവസരം
ഓണാഘോഷങ്ങളുടെ ഭാഗമായി നടക്കുന്ന കലാപരിപാടികളിൽ പങ്കെടുക്കാൻ താല്പര്യമുള്ള നാടൻ കലാകാരന്മാർ ഉൾപ്പെടെയുള്ള പ്രതിഭകളിൽ നിന്ന് താല്പര്യപത്രം ക്ഷണിച്ചിട്ടുണ്ട്. കലാകാരന്മാരുടെ അന്തിമ പട്ടിക ഓഗസ്റ്റ് 12-ന് ചേരുന്ന പ്രോഗ്രാം സബ് കമ്മിറ്റി യോഗത്തിൽ തയ്യാറാക്കും.
കളക്ടറേറ്റ് ഓഡിയോ വിഷ്വൽ ഹാളിൽ ചേർന്ന യോഗത്തിൽ ജനപ്രതിനിധികളും ഉദ്യോഗസ്ഥരും പങ്കെടുത്തു. എം.എൽ.എമാരായ ദീപക് ജോയ്, ഷിബു തെക്കുംപുറം, ടി.ജെ. വിനോദ്, മനോജ് മൂത്തേടൻ, അൻവർ സാദത്ത്, മുഹമ്മദ് ഷിയാസ്, ജില്ലാ കളക്ടർ ജി. പ്രിയങ്ക, സബ് കളക്ടർ ഗ്രന്ഥെ സായി കൃഷ്ണ, അഡീഷണൽ ജില്ലാ മജിസ്ട്രേറ്റ് കെ. മനോജ്, ഡി.ടി.പി.സി. സെക്രട്ടറി ലിജോ ജോസഫ് എന്നിവരും വിവിധ വകുപ്പ് ഉദ്യോഗസ്ഥരും യോഗത്തിൽ പങ്കെടുത്തു
