പാലിയേക്കരയിൽ കിലോമീറ്ററുകളോളം ഗതാഗതക്കുരുക്ക്; ടോൾ ബൂത്തുകൾ തുറന്നുവിട്ട് കേന്ദ്രമന്ത്രി സുരേഷ് ഗോപി

പാലിയേക്കരയിൽ കിലോമീറ്ററുകളോളം ഗതാഗതക്കുരുക്ക്; ടോൾ ബൂത്തുകൾ തുറന്നുവിട്ട് കേന്ദ്രമന്ത്രി സുരേഷ് ഗോപി

തൃശ്ശൂർ:  പാലിയേക്കര ടോൾപ്ലാസയിൽ മണിക്കൂറുകളോളം നീണ്ട രൂക്ഷമായ ഗതാഗതക്കുരുക്കിന് പരിഹാരവുമായി കേന്ദ്രസഹമന്ത്രി സുരേഷ് ഗോപി. കൊച്ചിയിലേക്കുള്ള യാത്രയ്ക്കിടെ വൈകീട്ട് 5.45 ഓടെ ടോൾ ബൂത്തിന് ഇരുവശത്തുമായി രണ്ടു കിലോമീറ്ററോളം വാഹനങ്ങളുടെ നിര നീണ്ടത് ശ്രദ്ധയിൽപ്പെട്ടതോടെയാണ് മന്ത്രി നേരിട്ടിറങ്ങി ഇടപെട്ടത്.

​സുരേഷ് ഗോപിയും അദ്ദേഹത്തിന്റെ ജീവനക്കാരും ചേർന്ന് ടോൾ ബൂത്തുകൾ തുറന്നുകൊടുക്കുകയായിരുന്നു. തുടർന്ന് പോലീസ് ഉദ്യോഗസ്ഥരുടെ സഹായത്തോടെ ഇരുവശത്തേക്കുമുള്ള 12 ബൂത്തുകളും ഏകദേശം 10 മുതൽ 15 മിനിറ്റോളം പൂർണ്ണമായി തുറന്നുവിട്ട് വാഹനങ്ങൾ കടത്തിവിട്ടു.

​പൈലറ്റ് വാഹനമുണ്ടായിട്ടും തന്റെ കാറിന് മുന്നോട്ടു പോകാൻ സാധിക്കാത്ത സാഹചര്യമായിരുന്നുവെന്നും, ദീർഘനേരം വഴിയിൽ കുടുങ്ങിയ യാത്രക്കാരുടെ പ്രയാസം കണ്ടാണ് ഇടപെട്ടതെന്നും സുരേഷ് ഗോപി പറഞ്ഞു. അടിയന്തര നടപടിയിലൂടെ കുറഞ്ഞ സമയത്തിനുള്ളിൽ വലിയ കുരുക്കഴിക്കാൻ സാധിച്ചതായി അദ്ദേഹം വ്യക്തമാക്കി.

​ടോൾ പ്ലാസകളിലെ തിരക്ക് നേരിട്ട് നിരീക്ഷിക്കാൻ ആറ് ക്യാമറകൾ സ്ഥാപിച്ച് ജില്ലാ കളക്ടറുടെ ചേംബറിലേക്ക് ബന്ധിപ്പിക്കണമെന്നും, വലിയ കുരുക്കുണ്ടാകുമ്പോൾ ഗേറ്റ് തുറക്കാൻ നിർദേശം നൽകാൻ സംവിധാനമുണ്ടാകണമെന്നും അദ്ദേഹം ആവശ്യപ്പെട്ടു. ദുബായിലെ 'സാലിക്' (Salik) മാതൃകയിലുള്ള ആധുനിക ടോൾ സംവിധാനം കൊണ്ടുവരുന്നതിനായി കേന്ദ്ര ഗതാഗതമന്ത്രിയെ കാണുമെന്നും, സംസ്ഥാനത്തെ മുഴുവൻ ടോൾ ബൂത്തുകളിലെയും പ്രശ്നങ്ങൾക്ക് ശാശ്വത പരിഹാരമാണ് ആവശ്യമെന്നും മന്ത്രി കൂട്ടിച്ചേർത്തു.