ഹരിപ്പാട് മെഡിക്കൽ കോളേജിന് ആറുമാസത്തിനകം തറക്കല്ലിടും മന്ത്രി കെ. മുരളീധരൻ

ഹരിപ്പാട് സൂപ്പർ സ്പെഷ്യാലിറ്റി മെഡിക്കൽ കോളേജിന് ആറുമാസത്തിനകം തറക്കല്ലിടും: മന്ത്രി കെ. മുരളീധരൻ

​ഹരിപ്പാട്: എല്ലാ വിഭാഗങ്ങളും ഉൾപ്പെടുന്ന സൂപ്പർ സ്പെഷ്യാലിറ്റി ഇൻസ്റ്റിറ്റ്യൂട്ടായി ഹരിപ്പാട് മെഡിക്കൽ കോളേജ് യാഥാർത്ഥ്യമാക്കുമെന്ന് ആരോഗ്യവകുപ്പ് മന്ത്രി കെ. മുരളീധരൻ വ്യക്തമാക്കി. ആറുമാസത്തിനുള്ളിൽ പദ്ധതിക്ക് തറക്കല്ലിട്ട് നിർമ്മാണം ആരംഭിക്കുമെന്നും എത്രയും വേഗം പണി പൂർത്തിയാക്കുമെന്നും അദ്ദേഹം അറിയിച്ചു. ഹരിപ്പാട് ആരംഭിക്കുന്ന മെഡിക്കൽ കോളേജിനായി ഏറ്റെടുത്ത കരുവാറ്റയിലെ സ്ഥലം സന്ദർശിച്ച ശേഷം സംസാരിക്കുകയായിരുന്നു മന്ത്രി.

​ഇതുസംബന്ധിച്ച് സ്ഥലം എം.എൽ.എയും മന്ത്രിയുമായ രമേശ് ചെന്നിത്തലയുമായി പ്രത്യേക യോഗം ചേർന്നതായി അദ്ദേഹം പറഞ്ഞു. ആഭ്യന്തരവകുപ്പ് മന്ത്രി രമേശ് ചെന്നിത്തല, എക്സൈസ്-സഹകരണ വകുപ്പ് മന്ത്രി എം. ലിജു എന്നിവരും മന്ത്രിയോടൊപ്പം സന്ദർശനത്തിൽ പങ്കെടുത്തിരുന്നു.

​ആലപ്പുഴ മെഡിക്കൽ കോളേജിൽ രണ്ടുമാസത്തിനുള്ളിൽ പരീക്ഷണാടിസ്ഥാനത്തിൽ കമ്മ്യൂണിറ്റി കിച്ചൻ ആരംഭിക്കുമെന്ന് മന്ത്രി കെ. മുരളീധരൻ കൂട്ടിച്ചേർത്തു. മെഡിക്കൽ കോളേജിന്റെ പ്രവർത്തനങ്ങൾ കൂടുതൽ മികച്ചതാക്കുന്നതിനുള്ള നടപടികൾ പുരോഗമിക്കുകയാണ്. മഴക്കെടുതി റിപ്പോർട്ടുകൾ ലഭിച്ചുതുടങ്ങിയ ഘട്ടത്തിൽത്തന്നെ ആശുപത്രികൾ പൂർണ്ണ സജ്ജമാകാൻ നിർദ്ദേശം നൽകിയിട്ടുണ്ട്. ആവശ്യത്തിന് മരുന്ന് സ്റ്റോക്ക് സൂക്ഷിക്കാനും ജില്ലാ മെഡിക്കൽ ഓഫീസർമാർക്കും ഡി.പി.എംമാർക്കും കർശന നിർദ്ദേശം നൽകിയിട്ടുണ്ടെന്നും അദ്ദേഹം വ്യക്തമാക്കി.

​സ്ഥലസന്ദർശനത്തിനു ശേഷം നടന്ന ആലോചനാ യോഗത്തിൽ ആഭ്യന്തരവകുപ്പ് മന്ത്രി രമേശ് ചെന്നിത്തല അധ്യക്ഷത വഹിച്ചു. ആശുപത്രികളുടെ പ്രവർത്തനം മെച്ചപ്പെടുത്തുന്നതിന്റെ ഭാഗമായി ഡോക്ടർമാരുടെ എണ്ണം വർദ്ധിപ്പിക്കേണ്ടിവരുമെന്ന് യോഗത്തിൽ സംസാരിച്ച മന്ത്രി എം. ലിജു പറഞ്ഞു. കായംകുളം ജനറൽ ആശുപത്രിയിൽ 50 കിടക്കകൾ കൂടി വർദ്ധിപ്പിക്കണമെന്ന് അദ്ദേഹം യോഗത്തിൽ ആവശ്യപ്പെട്ടു. മുൻ എം.എൽ.എ. അഡ്വ. ബി. ബാബുപ്രസാദും യോഗത്തിൽ സന്നിഹിതനായിരുന്നു