കള്ളാടി മണ്ണിടിച്ചിൽ രക്ഷാപ്രവർത്തനം നാല് സോണുകളായി തിരിച്ച് ഊർജിതമാക്കും മൂന്ന് മൃതദേഹങ്ങൾ ഇന്ന് നാട്ടിലെത്തിക്കും

കള്ളാടി മണ്ണിടിച്ചിൽ: രക്ഷാപ്രവർത്തനം നാല് സോണുകളായി തിരിച്ച് ഊർജിതമാക്കും; മൂന്ന് മൃതദേഹങ്ങൾ ഇന്ന് വിമാനമാർഗം നാട്ടിലെത്തിക്കും

​കണ്ണൂർ/വയനാട്: കള്ളാടി തുരങ്കപാതാ പദ്ധതി പ്രദേശത്തുണ്ടായ വൻ മണ്ണിടിച്ചിലിൽ കാണാതായവർക്കായുള്ള രണ്ടാം ദിവസത്തെ തെരച്ചിൽ നാല് സോണുകളായി തിരിച്ച് ഊർജിതമാക്കുമെന്ന് റവന്യൂ വകുപ്പ് മന്ത്രി എ.പി അനിൽകുമാർ അറിയിച്ചു. കള്ളാടിയിലെ അപകടസ്ഥലവും മേപ്പാടി വിംസ് ആശുപത്രിയിൽ ചികിത്സയിൽ കഴിയുന്നവരെയും സന്ദർശിച്ച ശേഷം ചേർന്ന അടിയന്തര അവലോകന യോഗത്തിൽ സംസാരിക്കുകയായിരുന്നു മന്ത്രി. എൻ.ഡി.ആർ.എഫ്, ഫയർ ഫോഴ്സ്, പോലീസ്, സിവിൽ ഡിഫൻസ് സേനകളുടെ നേതൃത്വത്തിൽ ശാസ്ത്രീയമായ തെരച്ചിലാണ് പ്രദേശത്ത് നടക്കുന്നത്.

​കഴിഞ്ഞ ദിവസം (ജൂലൈ 7) രാവിലെ 11.15 ഓടെ തുരങ്കപാതാ നിർമ്മാണ സ്ഥലത്തു നിന്നും 200 മീറ്റർ ചുറ്റളവിലാണ് മണ്ണിടിച്ചിലുണ്ടായത്. ഏഴ് മുതൽ പത്ത് അടി വരെ ഉയരത്തിലാണ് പ്രദേശത്ത് മണ്ണ് അടിഞ്ഞുകൂടിയിരിക്കുന്നത്. അപകട മേഖലയിൽ നിന്നും 23 കുടുംബങ്ങളിലെ 76 പേരെ മേപ്പാടി പോളിടെക്നിക് കോളേജിൽ സജ്ജീകരിച്ചിട്ടുള്ള ദുരിതാശ്വാസ ക്യാമ്പിലേക്ക് മാറ്റിയിട്ടുണ്ട്.

​മൃതദേഹങ്ങൾ ഇന്ന് നാട്ടിലെത്തിക്കും

അപകടത്തിൽ മരിച്ച മൂന്ന് തൊഴിലാളികളുടെയും പോസ്റ്റ്മോർട്ടം വൈത്തിരി താലൂക്ക് ആശുപത്രിയിൽ പൂർത്തിയായി. മൃതദേഹങ്ങൾ കോഴിക്കോട് മെഡിക്കൽ കോളേജിലെത്തിച്ച് എംബാം ചെയ്ത ശേഷം സംസ്ഥാന സർക്കാറിന്റെയും കൊങ്കൺ റെയിൽവെയുടെയും ഏകോപനത്തോടെ ബുധനാഴ്ച വിമാനമാർഗം സ്വദേശങ്ങളിലേക്ക് കൊണ്ടുപോകും. മരണപ്പെട്ടവരുടെയും കാണാതായവരുടെയും ബന്ധുക്കളെ നാട്ടിലെത്തിക്കാനുള്ള സജ്ജീകരണങ്ങൾ ജില്ലാ കളക്ടറും ഡി.എം.ഓയും നിർവഹിക്കും.

​മരണപ്പെട്ടവർ:

​ചന്ദ്ര ബാൻ (ഓപ്പറേറ്റർ) - മദ്ധ്യപ്രദേശ്

​ബികാഷ് കുമാർ (സിവിൽ ഫോർമാൻ) - ബീഹാർ

​അൻമോൽ (തൊഴിലാളി) - ജാർഖണ്ഡ്

​കാണാതായവർ:

​വിക്രം റാണ (കൺസ്ട്രക്ഷൻ മാനേജർ) - ഹിമാചൽ പ്രദേശ്

​രാഹുൽ (എഞ്ചിനീയർ) - ഹിമാചൽ പ്രദേശ്

​മുഹമ്മദ് ഇംറാൻ (എക്സ്കവേറ്റർ ഓപ്പറേറ്റർ) - ബീഹാർ

​രാകേഷ് ഗുച്ചൈത് (സർവേയർ) - പശ്ചിമബംഗാൾ

​അസ്ഹറുദ്ദീൻ അൻസാരി (സർവേയർ) - ഉത്തർപ്രദേശ്

​നിയന്ത്രണങ്ങളും കൺട്രോൾ റൂമും

ദുരന്തമേഖലയിൽ കൂടുതൽ യന്ത്രസാമഗ്രികൾ എത്തിച്ച് തെരച്ചിൽ സുഗമമാക്കുന്നതിനായി പൊതുജനങ്ങൾക്കും സ്വകാര്യ വാഹനങ്ങൾക്കും കർശന നിയന്ത്രണം ഏർപ്പെടുത്തിയിട്ടുണ്ട്. വാഹനങ്ങൾക്ക് മേപ്പാടി ടൗൺ, ബോച്ചേ എസ്റ്റേറ്റ് എന്നിവിടങ്ങളിലും അപകട മേഖലയുടെ 500 മീറ്റർ അകലെയും നിയന്ത്രണമുണ്ടാകും.

​അപകടവുമായി ബന്ധപ്പെട്ട വിവരങ്ങൾക്കായി ജില്ലാതല കൺട്രോൾ റൂം തുറന്നിട്ടുണ്ട്. ഹെൽപ്പ് ലൈൻ നമ്പർ: 04936- 288750.

​മിംസ് ആശുപത്രിയിൽ നടന്ന അവലോകന യോഗത്തിൽ കൃഷി വകുപ്പ് മന്ത്രി ടി സിദ്ദീഖ്, എം.എൽ.എ ഉഷ വിജയൻ, ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ, ജില്ലാ കലക്ടർ ഡി.ആർ മേഘശ്രീ, കണ്ണൂർ റേഞ്ച് ഡി.ഐ.ജി കെ കാർത്തിക് എന്നിവരുൾപ്പെടെയുള്ള പ്രമുഖ ഉദ്യോഗസ്ഥർ പങ്കെടുത്തു.