കറൻസി ഉപയോഗം കൂടുന്നു എടിഎം പിൻവലിക്കലിൽ കേരളം മുന്നിൽ

ന്യൂഡൽഹി: നോട്ട് അസാധുവാക്കലിന് പിന്നാലെ രാജ്യം ഡിജിറ്റൽ വിപ്ലവത്തിലേക്ക് കുതിച്ചെങ്കിലും, ഇന്ത്യക്കാരുടെ കയ്യിലുള്ള കറൻസിയുടെ അളവ് റെക്കോർഡ് വേഗത്തിൽ വർധിക്കുന്നു. 2026 ജനുവരിയിലെ കണക്കുകൾ പ്രകാരം രാജ്യത്ത് പ്രചാരത്തിലുള്ള കറൻസികളുടെ ആകെ മൂല്യം മുൻവർഷത്തേക്കാൾ 11.1 ശതമാനം വർധിച്ചതായി എസ്ബിഐ റിസർച്ചിന്റെ ഏറ്റവും പുതിയ റിപ്പോർട്ട് വ്യക്തമാക്കുന്നു.

​കൈവശമുള്ളത് 39 ലക്ഷം കോടി

പൊതുജനങ്ങളുടെ കൈവശമുള്ള കറൻസിയുടെ ആകെ മൂല്യം 39 ലക്ഷം കോടി രൂപയിലെത്തി. ഇത് സർവ്വകാല റെക്കോർഡാണ്. 2026-ൽ മാത്രം ഇതുവരെ 2.76 ലക്ഷം കോടി രൂപയുടെ വർധനവാണ് രേഖപ്പെടുത്തിയത്. രാജ്യത്തെ മൊത്തം കറൻസി മൂല്യത്തിന്റെ 97.6 ശതമാനവും ജനങ്ങളുടെ കൈവശമാണെന്ന കൗതുകകരമായ വസ്തുതയും റിപ്പോർട്ട് ചൂണ്ടിക്കാട്ടുന്നു. അതേസമയം, ജിഡിപിയിൽ കറൻസിയുടെ അനുപാതം (Cash-to-GDP ratio) 14.4 ശതമാനത്തിൽ നിന്ന് 11 ശതമാനമായി കുറഞ്ഞത് മാത്രമാണ് ഏക ആശ്വാസം.

​എടിഎം പിൻവലിക്കലിൽ കേരളം മുന്നിൽ

എടിഎം വഴി പണം പിൻവലിക്കുന്നവരുടെ എണ്ണത്തിലുണ്ടായ വർധനയാണ് കറൻസി പ്രചാരം ഉയരാൻ പ്രധാന കാരണം. ഒരാൾ ശരാശരി 2.5 ലക്ഷം രൂപ വീതം മാസം പിൻവലിക്കുന്ന അവസ്ഥയിലേക്ക് കാര്യങ്ങൾ ഉടൻ എത്തുമെന്നാണ് കണക്കാക്കുന്നത്. കർണാടക, തമിഴ്നാട്, ബംഗാൾ എന്നിവയ്‌ക്കൊപ്പം കേരളവും എടിഎം പിൻവലിക്കലിൽ മുന്നിലുണ്ട്.

​ജിഎസ്ടി നോട്ടീസും യുപിഐ ബഹിഷ്കരണവും

കർണാടകയിൽ 18,000 ചെറുകിട കച്ചവടക്കാർക്ക് ജിഎസ്ടി വകുപ്പ് നോട്ടീസ് അയച്ചത് ഡിജിറ്റൽ ഇടപാടുകളിൽ നിന്ന് ആളുകൾ പിന്മാറാൻ കാരണമായെന്ന് റിപ്പോർട്ട് നിരീക്ഷിക്കുന്നു. 40 ലക്ഷം രൂപയുടെ വാർഷിക വിറ്റുവരവ് പരിധി ലംഘിച്ചെന്ന് കാട്ടിയാണ് യുപിഐ ഇടപാടുകളുടെ അടിസ്ഥാനത്തിൽ നോട്ടീസ് നൽകിയത്. ഇത് 'യുപിഐ ബന്ദിനും' കറൻസി ഇടപാടുകളിലേക്കുള്ള മടക്കത്തിനും വഴിതെളിച്ചു. സമാനമായ രീതിയിൽ കേരളം, ബംഗാൾ, ബിഹാർ എന്നിവിടങ്ങളിലും കറൻസി ഉപയോഗം കൂടിയിട്ടുണ്ട്.

​മറ്റ് കാരണങ്ങൾ:

​സ്വർണ്ണവില: സ്വർണ്ണത്തിനും വെള്ളിക്കും വില വർധിച്ചതോടെ സ്വർണ്ണപ്പണയത്തിലൂടെ വിപണിയിലേക്ക് കൂടുതൽ പണം ഒഴുകി.

​പലിശ നിരക്ക്: ബാങ്ക് നിക്ഷേപങ്ങൾക്ക് പലിശ കുറഞ്ഞതോടെ ഗ്രാമീണ മേഖലകളിൽ പണം ബാങ്കിലിടുന്നതിന് പകരം കൈവശം വെക്കുന്ന രീതി കൂടി.

​ചെറിയ നോട്ടുകൾ: 2000 രൂപ നോട്ട് പിൻവലിച്ചതോടെ 500, 200, 100 രൂപ നോട്ടുകൾക്ക് ഡിമാൻഡ് വർധിച്ചതും കറൻസി പ്രചാരം കൂടാൻ കാരണമായി.