ദേശീയ പരിസ്ഥിതി സമ്മേളനം ഫെബ്രുവരി 23 മുഖ്യമന്ത്രി ഉദ്ഘാടനം ചെയ്യും
കേരളത്തിന്റെ ഹരിത മാതൃകകൾ ചർച്ചയാകുന്ന ദേശീയ പരിസ്ഥിതി സമ്മേളനത്തിന് തലസ്ഥാനം വേദിയാകുന്നു.
അനില എം കൃഷ്ണൻ 
ദേശീയ പരിസ്ഥിതി സമ്മേളനം ഫെബ്രുവരി 23 മുതൽ; മുഖ്യമന്ത്രി ഉദ്ഘാടനം ചെയ്യും
തിരുവനന്തപുരം: കേരളത്തിന്റെ ഹരിത മാതൃകകൾ ചർച്ചയാകുന്ന ദേശീയ പരിസ്ഥിതി സമ്മേളനത്തിന് തലസ്ഥാനം വേദിയാകുന്നു. ഹരിതകേരളം മിഷന്റെ നേതൃത്വത്തിൽ ഫെബ്രുവരി 23 മുതൽ 25 വരെ കവടിയാർ ഉദയ് പാലസ് കൺവെൻഷൻ സെൻ്ററിലാണ് സമ്മേളനം സംഘടിപ്പിക്കുന്നത്. ഫെബ്രുവരി 23-ന് ഉച്ചയ്ക്ക് മുഖ്യമന്ത്രി പിണറായി വിജയൻ സമ്മേളനത്തിന്റെ ഔദ്യോഗിക ഉദ്ഘാടനം നിർവഹിക്കും.
സംസ്ഥാനത്ത് കഴിഞ്ഞ പത്തുവർഷത്തിനിടെ നടപ്പിലാക്കിയ മാതൃകാപരമായ പരിസ്ഥിതി പുനസ്ഥാപന പ്രവർത്തനങ്ങളെ മുൻനിർത്തിയാണ് ഈ ദേശീയ സംഗമം ഒരുക്കിയിരിക്കുന്നത്. മൂന്ന് ദിവസങ്ങളിലായി നടക്കുന്ന സമ്മേളനത്തിൽ പരിസ്ഥിതിയുമായി ബന്ധപ്പെട്ട വിവിധ വിഷയങ്ങളിൽ ആഴത്തിലുള്ള ചർച്ചകൾ നടക്കും.
പ്രധാന പ്രത്യേകതകൾ:
വിഷയങ്ങൾ: ശുചിത്വം, മാലിന്യസംസ്കരണം, ജലസുരക്ഷ, കാലാവസ്ഥാ വ്യതിയാനം, മനുഷ്യ-വന്യമൃഗ സംഘർഷം തുടങ്ങിയവയെ അധികരിച്ച് 18 സെഷനുകൾ.
അവതരണങ്ങൾ: ദേശീയ തലത്തിലെ പ്രമുഖ വിദഗ്ധർ പങ്കെടുക്കുന്ന സെഷനുകളിൽ 73 പ്രബന്ധങ്ങൾ അവതരിപ്പിക്കും.
പ്രദർശനം: അറുപതിലധികം സ്റ്റാളുകൾ ഉൾപ്പെടുത്തിയിട്ടുള്ള വിപുലമായ പരിസ്ഥിതി പുനസ്ഥാപന പ്രദർശനം സമ്മേളനത്തിന്റെ ഭാഗമായി ഒരുക്കിയിട്ടുണ്ട്.
പൊതുജനങ്ങൾക്ക് അവസരം: പ്രദർശനത്തിലേക്കും സമ്മേളന നഗരിയിലേക്കും പൊതുജനങ്ങൾക്ക് പ്രവേശനം സൗജന്യമായിരിക്കും.
ദേശീയതലത്തിലെ വിദഗ്ധർ മുന്നോട്ടുവെക്കുന്ന ആശയങ്ങളും ചർച്ചകളിൽ ഉരുത്തിരിയുന്ന നിർദ്ദേശങ്ങളും ക്രോഡീകരിച്ച് ഭാവിയിലെ പരിസ്ഥിതി പ്രവർത്തനങ്ങൾക്കായുള്ള ശുപാർശകളായി സർക്കാർ സമർപ്പിക്കും.
