പെരുവംമുഴിയിൽ നാടിനെ നടുക്കിയ അപകടം: കാറിൽ തട്ടി റോഡിലേക്ക് വീണു, ഇരുപതുകാരനായ വിദ്യാർത്ഥിക്ക് ലോറിയടിച്ച് ദാരുണാന്ത്യം
കൊച്ചി ധനുഷ്കോടി ദേശീയപാതയിലെ പെരുവംമുഴിയിൽ സ്കൂട്ടറും ലോറിയും കൂട്ടിയിടിച്ച് വരിക്കോലി മുത്തൂറ്റ് എൻജിനീയറിങ് കോളേജ് വിദ്യാർത്ഥി രാഹുൽ എസ് (20) മരണപ്പെട്ടു.
Abu TA 
പെരുവംമുഴിയിൽ ദാരുണ വാഹനാപകടം: ലോറിയിടിച്ച് കോളേജ് വിദ്യാർത്ഥി മരിച്ചു
മുവാറ്റുപുഴ: കൊച്ചി - ധനുഷ്കോടി ദേശീയപാതയിലെ പെരുവംമുഴിയിലുണ്ടായ ദാരുണമായ വാഹനാപകടത്തിൽ കോളേജ് വിദ്യാർത്ഥി സംഭവസ്ഥലത്തുതന്നെ മരണപ്പെട്ടു. തൊടുപുഴ മടക്കത്താനം സ്വദേശി രാഹുൽ എസ് (20) ആണ് മരിച്ചത്. വരിക്കോലി മുത്തൂറ്റ് എൻജിനീയറിങ് കോളേജിലെ വിദ്യാർത്ഥിയാണ് രാഹുൽ. സ്കൂട്ടറിലുണ്ടായിരുന്ന സുഹൃത്ത് ജൂലിയൻ ജോസഫ് (21) നിസ്സാര പരിക്കുകളോടെ അത്ഭുതകരമായി രക്ഷപ്പെട്ടു.
ഇന്ന് രാവിലെ ഏഴരയോടെയാണ് നാടിനെ നടുക്കിയ അപകടം ഉണ്ടായത്. വിദ്യാർത്ഥികൾ സഞ്ചരിച്ചിരുന്ന സ്കൂട്ടർ മുന്നിലുണ്ടായിരുന്ന കാറിനെ ഓവർടേക്ക് ചെയ്യാൻ ശ്രമിക്കുന്നതിനിടെ കാറിൽ തട്ടി നിയന്ത്രണം വിടുകയായിരുന്നു. റോഡിലേക്ക് തെറിച്ചുവീണ രാഹുലിന്റെ തലയിലൂടെ എതിർദിശയിൽ നിന്നും വന്ന ലോറിയുടെ ചക്രങ്ങൾ കയറിയിറങ്ങുകയായിരുന്നുവെന്ന് ദൃക്സാക്ഷികൾ പറഞ്ഞു.
അപകടത്തെ തുടർന്ന് ദേശീയപാതയിൽ അൽപ്പസമയം ഗതാഗതം തടസ്സപ്പെട്ടു. സ്ഥലത്തെത്തിയ പോലീസും നാട്ടുകാരും ചേർന്നാണ് തുടർനടപടികൾ സ്വീകരിച്ചത്. രാഹുലിന്റെ മൃതദേഹം പോസ്റ്റുമോർട്ടം നടപടികൾക്കായി ആശുപത്രിയിലേക്ക് മാറ്റി.
