തിരുവനന്തപുരം മൃഗശാലയിലെ വെള്ളക്കടുവ മലർ ചത്തു വിയോഗം 17 ാം വയസ്സിൽ.
തിരുവനന്തപുരം മൃഗശാലയിലെ വെള്ളക്കടുവ മലർ പ്രായാധിക്യം മൂലം ചത്തു. 2014 ൽ ഡൽഹിയിൽ നിന്നെത്തിച്ച മലറിന്റെ മരണകാരണം അവയവങ്ങളുടെ പ്രവർത്തന തകരാറാണ്.
അനില എം കൃഷ്ണൻ 
തിരുവനന്തപുരം മൃഗശാലയിലെ വെള്ളക്കടുവ 'മലർ' വിടവാങ്ങി; അന്ത്യം പ്രായാധിക്യത്തെത്തുടർന്ന്
തിരുവനന്തപുരം: തലസ്ഥാനത്തെ മൃഗശാലയിലെ പ്രധാന ആകർഷണമായിരുന്ന മലർ എന്ന വെള്ളക്കടുവ ചത്തു. 17 വയസ്സായിരുന്നു. പ്രായാധിക്യത്തെത്തുടർന്നുണ്ടായ അവശതകളാൽ കഴിഞ്ഞ ഒരു വർഷമായി മലറിനെ സന്ദർശകരുടെ മുന്നിൽ നിന്നും മാറ്റി പ്രത്യേകം തയ്യാറാക്കിയ കൂട്ടിൽ പരിചരിച്ചു വരികയായിരുന്നു.
2014-ൽ ഡൽഹി നാഷണൽ സുവോളജിക്കൽ പാർക്കിൽ നിന്നാണ് മലറിനെയും ശ്രാവൺ എന്ന ആൺ വെള്ളക്കടുവയേയും തിരുവനന്തപുരത്ത് എത്തിച്ചത്. വാർദ്ധക്യസഹജമായ ബുദ്ധിമുട്ടുകൾ കാരണം ഇറച്ചി ചവച്ചരച്ച് കഴിക്കാൻ ബുദ്ധിമുട്ട് നേരിട്ടതിനെത്തുടർന്ന് മിൻസ്ഡ് മീറ്റ്, പാൽ, മുട്ട എന്നിവയായിരുന്നു മലറിന് ഭക്ഷണമായി നൽകിയിരുന്നത്.
മരണകാരണം അവയവങ്ങളുടെ പ്രവർത്തനം നിലച്ചത്
മൃഗങ്ങളിൽ വാർദ്ധക്യകാലത്ത് നൽകുന്ന ജെറിയാട്രിക്ക് കെയർ (Geriatric Care) ചികിത്സ മലറിന് നൽകിയിരുന്നു. പ്രായാധിക്യം മൂലം ശരീരത്തിലെ വിവിധ അവയവങ്ങളുടെ പ്രവർത്തനം നിലച്ചതാണ് (Multiple Organ Failure) മരണകാരണമെന്ന് വെറ്ററിനറി സർജൻ അറിയിച്ചു. സ്റ്റേറ്റ് ഇൻസ്റ്റിറ്റ്യൂട്ട് ഫോർ അനിമൽ ഡിസീസ് പാലോട് നിന്നുള്ള ഡോ. സി. ഹരീഷ്, മൃഗശാല വെറ്ററിനറി സർജൻ ഡോ. നികേഷ് കിരൺ എന്നിവരുടെ നേതൃത്വത്തിലായിരുന്നു പോസ്റ്റ്മോർട്ടം.
ശാസ്ത്രീയ വശം
സാധാരണ ബംഗാൾ കടുവകളെ അപേക്ഷിച്ച് വെള്ളക്കടുവകൾക്ക് ആയുസ്സും ആരോഗ്യവും കുറവായിരിക്കും. ഇവയുടെ ശരീരത്തിലെ SLC45A2 എന്ന റിസസ്സിവ് ജീൻ (Recessive Gene) ആണ് ഈ നിറവ്യത്യാസത്തിന് കാരണമാകുന്നത്. മലറിന്റെ വിയോഗത്തോടെ ഇനി ശ്രാവൺ എന്ന വെള്ളക്കടുവയും മൂന്ന് ബംഗാൾ കടുവകളുമാണ് തിരുവനന്തപുരം മൃഗശാലയിൽ അവശേഷിക്കുന്നത്.
മൃഗശാല ഡയറക്ടർ മഞ്ജുളാ ദേവി അന്തോപചാരം അർപ്പിച്ചു. വൈകുന്നേരത്തോടെ പോസ്റ്റ്മോർട്ടം നടപടികൾ പൂർത്തിയാക്കി ജഡം ദഹിപ്പിച്ചു. മൃഗശാല സൂപ്രണ്ട് രാജേഷ് വി.എസ്, ക്യൂറേറ്റർ സംഗീത തുടങ്ങി പ്രമുഖ ഉദ്യോഗസ്ഥർ ചടങ്ങുകൾക്ക് മേൽനോട്ടം വഹിച്ചു.
