ചിന്നു പാപ്പുവിന്റെ മരണം ആൺസുഹൃത്ത് സന്ദേശിനെ മരിച്ച നിലയിൽ കണ്ടെത്തി

​സോഷ്യൽ മീഡിയ താരം ചിന്നു പാപ്പുവിന്റെ മരണം: ആൺസുഹൃത്ത് സന്ദേശിനെ തൂങ്ങിമരിച്ച നിലയിൽ കണ്ടെത്തി

​കാസർകോട്: സോഷ്യൽ മീഡിയ ഇൻഫ്ലുവൻസർ ചിന്നു പാപ്പുവിന്റെ ആത്മഹത്യയ്ക്ക് പിന്നാലെ ആൺസുഹൃത്തിനെയും മരിച്ച നിലയിൽ കണ്ടെത്തി. കാസർകോട് ചൗക്കി സ്വദേശി സന്ദേശിനെ (29) ആണ് കൂഡുലു മന്നിപ്പാടിയിലെ സ്വന്തം വീട്ടിൽ തൂങ്ങിമരിച്ച നിലയിൽ കണ്ടെത്തിയത്.

​ഫെബ്രുവരി ഒൻപതിനാണ് ചിന്നു പാപ്പുവിനെ കുഡ്‌ലു ആസാദ് നഗറിലെ വാടക വീട്ടിൽ ആത്മഹത്യ ചെയ്ത നിലയിൽ കണ്ടെത്തിയത്. ഈ സംഭവത്തിൽ സന്ദേശിനെ കാസർകോട് ടൗൺ പൊലീസ് നേരത്തെ ചോദ്യം ചെയ്തിരുന്നു. ചോദ്യം ചെയ്യലിന് ശേഷം വിട്ടയച്ച സന്ദേശിനെയാണ് ഇപ്പോൾ മരിച്ച നിലയിൽ കണ്ടെത്തിയിരിക്കുന്നത്.

​അന്വേഷണം തുടരുന്നതിനിടെ മരണം

ഭർത്താവുമായി അകന്നു കഴിയുകയായിരുന്ന ചിന്നു പാപ്പു ഏറെക്കാലമായി സന്ദേശിനൊപ്പമായിരുന്നു താമസം. ഇവർ തമ്മിലുണ്ടായ തർക്കങ്ങളാണ് ചിന്നുവിന്റെ മരണത്തിലേക്ക് നയിച്ചതെന്ന് ആരോപണമുയർന്നിരുന്നു. ചിന്നുവിന്റെ കുടുംബം മരണത്തിൽ ദുരൂഹത ആരോപിച്ച് പരാതി നൽകിയതിനെ തുടർന്നാണ് പൊലീസ് അന്വേഷണം ഊർജിതമാക്കിയത്. ഈ അന്വേഷണം പൂർത്തിയാകുന്നതിന് മുൻപാണ് സന്ദേശിന്റെ വിയോഗം.

​മൃതദേഹം പൊലീസ് ഇൻക്വസ്റ്റ് നടപടികൾക്ക് ശേഷം കാസർകോട് ജനറൽ ആശുപത്രിയിലേക്ക് മാറ്റി. പരേതനായ നാരായണ നായ്ക്കിന്റെയും സരോജയുടെയും മകനാണ് സന്ദേശ്. സഹോദരി: ഗൗതമി.

​ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക പ്രയാസങ്ങൾ അനുഭവിക്കുന്നവർ സഹായത്തിനായി താഴെ പറയുന്ന നമ്പറുകളിൽ ബന്ധപ്പെടുക:

​ദിശ (DISHA): 1056

​മൈത്രി (Maithri): 0484 2540501