​കണ്ണൂർ ഡെന്റൽ കോളേജ് വിദ്യാർത്ഥിയുടെ മരണം ജാതീയ അധിക്ഷേപമെന്ന് പരാതി അധ്യാപകർക്കെതിരെ നടപടി

​കണ്ണൂർ: അഞ്ചരക്കണ്ടി കണ്ണൂർ ഡെന്റൽ കോളേജിലെ ഒന്നാം വർഷ ബിഡിഎസ് വിദ്യാർത്ഥിയും തിരുവനന്തപുരം ആര്യനാട് സ്വദേശിയുമായ ആർ.എൽ. നിതിൻ രാജ് (22) കോളേജ് കെട്ടിടത്തിൽ നിന്ന് ചാടി മരിച്ച സംഭവത്തിൽ കോളേജ് അധികൃതർക്കെതിരെ ഗുരുതര ആരോപണങ്ങളുമായി രക്ഷിതാക്കൾ. നിതിനെ അധ്യാപകർ ജാതീയമായി അധിക്ഷേപിച്ചെന്നും മാനസികമായി പീഡിപ്പിച്ചെന്നുമാണ് കുടുംബത്തിന്റെ പരാതി.

​'പുഴുത്ത പട്ടി' എന്ന് വിളിച്ച് അധിക്ഷേപം

നിതിനെ ഒരു അധ്യാപകൻ 'പുഴുത്ത പട്ടി' എന്ന് വിളിച്ചതായും ജാതി പറഞ്ഞ് അധിക്ഷേപിച്ചതായും പിതാവ് രാജൻ ആരോപിച്ചു. നിറത്തിന്റെ പേരിലും പിതാവിന്റെ തൊഴിലിനെ പരിഹസിച്ചും അധ്യാപകർ നിരന്തരം വേട്ടയാടിയിരുന്നതായി ബന്ധുക്കൾ പറയുന്നു. പരീക്ഷയ്ക്ക് തോൽപ്പിക്കുമെന്നും പരാതിപ്പെട്ടാൽ നിന്റെ 'ബോഡി'യാകും ഇവിടെനിന്ന് കൊണ്ടുപോകേണ്ടി വരികയെന്നും അധ്യാപകർ ഭീഷണിപ്പെടുത്തിയിരുന്നതായി നിതിന്റെ സഹോദരീഭർത്താവ് വെളിപ്പെടുത്തി. അധ്യാപകരിൽ നിന്ന് നേരിട്ട ദുരനുഭവങ്ങൾ വിവരിക്കുന്ന നിതിന്റെ ഓഡിയോ സന്ദേശങ്ങളും ഇപ്പോൾ പുറത്തുവന്നിട്ടുണ്ട്.

​രണ്ട് അധ്യാപകർക്ക് സസ്പെൻഷൻ

സംഭവവുമായി ബന്ധപ്പെട്ട് അനാട്ടമി വിഭാഗം മേധാവി ഡോ. എം.കെ. റാം, അധ്യാപിക ഡോ. കെ.ടി. സംഗീത നമ്പ്യാർ എന്നിവരെ കോളേജ് മാനേജ്‌മെന്റ് സസ്‌പെൻഡ് ചെയ്തു. ഇവർക്കെതിരെ പോലീസിലും പട്ടികജാതി കമ്മീഷനിലും പരാതി നൽകാനാണ് കുടുംബത്തിന്റെ തീരുമാനം.

​മരണവിവരം അറിഞ്ഞത് ചാനലിലൂടെ

വെള്ളിയാഴ്ച ഉച്ചയ്ക്ക് 2 മണിയോടെയാണ് നിതിനെ കെട്ടിടത്തിൽ നിന്ന് വീണ നിലയിൽ കണ്ടെത്തിയത്. അന്ന് രാവിലെ വീട്ടിലേക്ക് വിളിച്ച നിതിൻ, വൈകിട്ടുള്ള ട്രെയിനിൽ നാട്ടിലേക്ക് വരുമെന്ന് അറിയിച്ചിരുന്നു. എന്നാൽ നിതിൻ മരിച്ച വിവരം ചാനൽ വാർത്തകളിലൂടെയാണ് മാതാപിതാക്കൾ അറിഞ്ഞത്. പ്രിൻസിപ്പലിനെ പലതവണ ബന്ധപ്പെട്ടെങ്കിലും കൃത്യമായ മറുപടി ലഭിച്ചില്ലെന്നും കുടുംബം ആരോപിക്കുന്നു.

​കോളേജിന്റെ വിശദീകരണം

അധിക്ഷേപങ്ങൾ സംബന്ധിച്ച പരാതികൾ നേരത്തെ ലഭിച്ചിട്ടില്ലെന്നാണ് പ്രിൻസിപ്പൽ ഡോ. വിനോദ് മോനിയുടെ വിശദീകരണം. മരണത്തെക്കുറിച്ച് അന്വേഷിക്കാൻ വിദ്യാർത്ഥി-അധ്യാപക പ്രതിനിധികൾ ഉൾപ്പെടുന്ന സമിതി രൂപീകരിച്ചതായും അദ്ദേഹം അറിയിച്ചു.

​തിരുവനന്തപുരം സ്വദേശിയായ പെയിന്റിംഗ് തൊഴിലാളി രാജന്റെയും ലതയുടെയും ഏക മകനാണ് നിതിൻ രാജ്. മൃതദേഹം ഇന്ന് ഉച്ചയോടെ സംസ്‌കരിക്കും.