നയൻതാരയ്ക്കെതിരെ അശ്ലീല പരാമർശം എഐഎഡിഎംകെ നേതാവ് സി.വി. ഷൺമുഖത്തിനെതിരെ വ്യാപക പ്രതിഷേധം
നയൻതാരയെ വിവാഹം കഴിച്ചുതരുമോ എന്ന് ചോദിച്ച് തമിഴ്നാട് മുഖ്യമന്ത്രിയെ പരിഹസിച്ച സി.വി. ഷൺമുഖം എംപിക്കെതിരെ ഡിഎംകെ
Angel Varghese 
നയൻതാരയ്ക്കെതിരെ സ്ത്രീവിരുദ്ധ പരാമർശം: എഐഎഡിഎംകെ നേതാവ് സി.വി. ഷൺമുഖം വിവാദത്തിൽ
വിഴുപ്പുറം: തമിഴ്നാട് മുഖ്യമന്ത്രി എം.കെ. സ്റ്റാലിന്റെ ജനസമ്പർക്ക പരിപാടിയെ പരിഹസിക്കുന്നതിനിടെ ചലച്ചിത്ര താരം നയൻതാരയ്ക്കെതിരെ സ്ത്രീവിരുദ്ധ പരാമർശം നടത്തിയ എഐഎഡിഎംകെ നേതാവും രാജ്യസഭാ എംപിയുമായ സി.വി. ഷൺമുഖം വിവാദത്തിൽ. ഡിഎംകെ സർക്കാരിനെതിരെ എഐഎഡിഎംകെ വിഴുപ്പുറത്ത് സംഘടിപ്പിച്ച പ്രതിഷേധ സമ്മേളനത്തിലായിരുന്നു എംപിയുടെ വിവാദ പരാമർശം.
തമിഴ്നാട് നിയമസഭാ തിരഞ്ഞെടുപ്പിന് മുന്നോടിയായി സർക്കാർ നടപ്പിലാക്കുന്ന ‘നിങ്ങളുടെ സ്വപ്നം ഞങ്ങളോട് പറയൂ’ എന്ന പദ്ധതിയെ പരിഹസിക്കവെയാണ് ഷൺമുഖം അതിരുവിട്ടത്. "എനിക്ക് നയൻതാരയെ വേണം, നിങ്ങൾ അത് സാധിച്ചുതരുമോ? ഒരാൾക്ക് നയൻതാരയെ വിവാഹം കഴിക്കണമെന്നാണ് സ്വപ്നമെങ്കിൽ അത് സ്റ്റാലിൻ നടത്തിക്കൊടുക്കുമോ?" എന്നായിരുന്നു അദ്ദേഹത്തിന്റെ ചോദ്യം.
ഡിഎംകെയുടെ പ്രതിഷേധം
ഷൺമുഖത്തിന്റേത് പരിഷ്കൃത സമൂഹത്തിനു നിരക്കാത്ത പ്രസ്താവനയാണെന്ന് ഡിഎംകെ വക്താവ് ഡോ. സയദ് ഹഫീസുല്ല പറഞ്ഞു. സർക്കാർ നയങ്ങളെ വിമർശിക്കാൻ ആർക്കും അവകാശമുണ്ടെന്നും എന്നാൽ സ്ത്രീകളെ അശ്ലീലമായി അധിക്ഷേപിക്കുന്നത് അംഗീകരിക്കാനാവില്ലെന്നും അദ്ദേഹം വ്യക്തമാക്കി. ഷൺമുഖത്തിനെതിരെ കർശന നടപടിയെടുക്കാൻ എഐഎഡിഎംകെ നേതൃത്വം തയ്യാറാകണമെന്നും ഡിഎംകെ ആവശ്യപ്പെട്ടു.
മുൻപും വിവാദനായകൻ
സ്ത്രീവിരുദ്ധ പരാമർശങ്ങളുടെ പേരിൽ സി.വി. ഷൺമുഖം വിവാദത്തിലാകുന്നത് ഇതാദ്യമല്ല. കഴിഞ്ഞ വർഷം സ്റ്റാലിന്റെ തിരഞ്ഞെടുപ്പ് വാഗ്ദാനങ്ങളെ പരിഹസിക്കുന്നതിനിടെ ‘മുഖ്യമന്ത്രി സൗജന്യ ഭാര്യയെ വരെ പ്രഖ്യാപിച്ചേക്കാം’ എന്ന് അദ്ദേഹം പറഞ്ഞത് വലിയ പ്രതിഷേധങ്ങൾക്ക് കാരണമായിരുന്നു.
വിഷയത്തിൽ എഐഎഡിഎംകെ ഇതുവരെ ഔദ്യോഗികമായി പ്രതികരിച്ചിട്ടില്ല. വ്യക്തിപരമായ ഇത്തരം പരാമർശങ്ങൾ പാർട്ടിയുടെ നിലപാടല്ലെന്നാണ് ഒരു മുതിർന്ന നേതാവ് വ്യക്തമാക്കിയത്.
