അസിസ്റ്റന്റ് കമ്മീഷണർ അനുപമ ഇക്ബാലായി അമലാ പോൾ എം. പത്മകുമാർ ചിത്രത്തിന്റെ ചിത്രീകരണം ആരംഭിച്ചു

അമലാ പോൾ - എം. പത്മകുമാർ ഹൊറർ ത്രില്ലർ ചിത്രത്തിന് മാഹിയിൽ തുടക്കമായി ആദ്യ ഷോട്ടിൽ കോട്ടയം നസീർ

​മാഹി: പ്രമുഖ നടി അമലാ പോളിനെ കേന്ദ്ര കഥാപാത്രമാക്കി എം. പത്മകുമാർ സംവിധാനം ചെയ്യുന്ന പുതിയ പാൻ ഇന്ത്യൻ ചിത്രത്തിന്റെ ചിത്രീകരണം മാഹിയിൽ ആരംഭിച്ചു. രാജ് സാഗർ ഫിലിംസിന്റെ ബാനറിൽ രമേഷ് ഗോപിനാഥ് നിർമ്മിക്കുന്ന ഈ ചിത്രം പൂർണ്ണമായും ഹൊറർ ത്രില്ലർ പശ്ചാത്തലത്തിലാണ് ഒരുങ്ങുന്നത്.

​മാഹി അയിഷാ മൻസിലിൽ നടന്ന പൂജ ചടങ്ങോടെയാണ് ചിത്രീകരണത്തിന് തുടക്കമായത്. സാമൂഹ്യ-സാംസ്കാരിക രംഗങ്ങളിലെ പ്രമുഖരുടെ സാന്നിധ്യത്തിൽ ഉഷാ ശ്രീധരൻ, സ്നിഷ രമേഷ് എന്നിവർ ചേർന്ന് ഭദ്രദീപം തെളിയിച്ചു. പോണ്ടിച്ചേരി മുൻ ആഭ്യന്തര മന്ത്രി ഇ. വത്സരാജ്, വ്യവസായ പ്രമുഖൻ സുധാകരൻ പൂക്കോട് എന്നിവർ ചടങ്ങിൽ പങ്കെടുത്തു. നിർമ്മാതാവ് ലിബർട്ടി ബഷീർ സ്വിച്ച് ഓൺ കർമ്മവും മാഹി എം.എൽ.എ അഡ്വ. ടി. ഷോട്ടിൽ കുമാർ ഫസ്റ്റ് ക്ലാപ്പും നിർവ്വഹിച്ചു. നടൻ കോട്ടയം നസീറാണ് ആദ്യ ഷോട്ടിൽ അഭിനയിച്ചത്.

​കണ്ണൂരും പരിസര പ്രദേശങ്ങളിലും നടക്കുന്ന പ്രമാദമായ ഒരു കേസിന്റെ അന്വേഷണത്തിനായി എത്തുന്ന അസിസ്റ്റന്റ് കമ്മീഷണർ അനുപമ ഇക്ബാലിന്റെ കഥയാണ് ചിത്രം പറയുന്നത്. അമലാ പോളിനൊപ്പം വിജയ് ബാബു, ഇർഷാദ്, കോട്ടയം നസീർ, ഇന്ദ്രൻസ്, ബിനു പപ്പു, മുക്ത, റോണി ഡേവിഡ് രാജ്, ഉയിർ ഹരീഷ്, ദീപൻ ശിവരാമൻ, ആദ്യാ അമിത് തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്.

​എം.പി. സുനീഷ് തിരക്കഥയെഴുതിയ ചിത്രത്തിന്റെ ഛായാഗ്രഹണം അജയ് ഡേവിഡ് കാച്ചപ്പിള്ളിയും എഡിറ്റിംഗ് സൂരജ് ഇ.എസും നിർവ്വഹിക്കുന്നു. ഹരി നാരായണൻ, മുത്തു വിവേക് മൂഴുക്കുന്ന് എന്നിവരുടെ വരികൾക്ക് നന്ദഗോപൻ, കെ.കെ. നിഷാദ് എന്നിവർ സംഗീതം പകരുന്നു. മാഹി, തലശ്ശേരി, വടകര, കണ്ണൂർ, കൂത്തുപറമ്പ് എന്നിവിടങ്ങളിലായി ചിത്രീകരണം പൂർത്തിയാകും.