മഴ വന്നല്ലോ മാം, അവധി തരുമോ? കളക്ടറോട് കുട്ടികൾഎറണാകുളം ജില്ലാ കളക്ടറുടെ ഇൻസ്പയർ വെഡ്നസ്ഡേ ക്ക് തുടക്കം
എറണാകുളം ജില്ലാ കളക്ടർ ജി. പ്രിയങ്കയുടെ വിദ്യാർത്ഥി സമ്പർക്ക പരിപാടിയായ ഇൻസ്പയർ വെഡ്നസ്ഡേ ക്ക് തുടക്കമായി. ആദ്യ ദിനത്തിൽ തെങ്ങോട് ഗവ. ഹൈസ്കൂളിലെ വിദ്യാർത്ഥിനികൾ കളക്ടറുടെ ചേംബറിലെത്തി സംവദിച്ചു.
അനില എം കൃഷ്ണൻ 
കളക്ടറോട് കുട്ടികൾ ചോദിച്ചു: "മഴ വന്നല്ലോ മാം, അവധി തരുമോ?"; 'ഇൻസ്പയർ വെഡ്നസ്ഡേ'ക്ക് ഹൃദ്യമായ തുടക്കം
കൊച്ചി: ഗൗരവമേറിയ ചർച്ചകളും ഔദ്യോഗിക ഫയൽ നീക്കങ്ങളും മാത്രം നടക്കാറുള്ള ജില്ലാ കളക്ടറുടെ ചേംബറിലേക്ക് ഇന്നലെ കൗതുകമുണർത്തുന്ന ചോദ്യങ്ങളുമായി ഒരുപറ്റം വിദ്യാർത്ഥിനികളെത്തി. എറണാകുളം ജില്ലാ കളക്ടർ ജി. പ്രിയങ്കയുടെ സവിശേഷമായ വിദ്യാർത്ഥി സമ്പർക്ക പരിപാടിയായ 'ഇൻസ്പയർ വെഡ്നസ്ഡേ'ക്ക് (Inspire Wednesday) ഹൃദ്യമായ തുടക്കമായി. ഔദ്യോഗിക തിരക്കുകൾ മാറ്റിവെച്ച് കുട്ടികളെ സ്വീകരിക്കാൻ കളക്ടർ നേരിട്ടെത്തിയിരുന്നു.
അധ്യാപകരില്ലാത്ത ചേംബർ; മനസ്സ് തുറന്ന് കുട്ടികൾ
കുട്ടികൾക്ക് ഭയമില്ലാതെ സംസാരിക്കാൻ ഒപ്പം വന്ന അധ്യാപകരോട് കുറച്ചുസമയത്തേക്ക് പുറത്തേക്ക് നിൽക്കാൻ കളക്ടർ ആവശ്യപ്പെടുകയായിരുന്നു. ഇതോടെ കുട്ടികൾ കൂടുതൽ ആത്മവിശ്വാസത്തോടെ കളക്ടറോട് വിശേഷങ്ങൾ പങ്കുവെച്ചു. സംഭാഷണത്തിനിടയിലാണ് കുട്ടികളിലൊരാൾ കൗതുകകരമായ ആ ചോദ്യം ഉന്നയിച്ചത്: "മഴ വന്നല്ലോ മാം, അവധി തരുമോ?"
കുട്ടികളുടെ സുരക്ഷയ്ക്കാണ് താൻ എപ്പോഴും മുൻഗണന നൽകുന്നതെന്നും, അതുകൊണ്ട് തന്നെ മഴയുടെ തീവ്രതയും മുന്നറിയിപ്പുകളും കൃത്യമായി വിലയിരുത്തി ആവശ്യമായ സമയത്ത് അവധി നൽകുമെന്നും കളക്ടർ മറുപടി നൽകി. കൈയടിയോടെയാണ് കുട്ടികൾ ഈ മറുപടി സ്വീകരിച്ചത്.
സ്വപ്നങ്ങളിലേക്ക് വഴിതുറന്ന് 'ഗോൾ സെറ്റിങ്'
തങ്ങളുടെ ഭാവി ലക്ഷ്യങ്ങൾ എന്തൊക്കെയാണെന്നും അവ എങ്ങനെ നേടിയെടുക്കാൻ പദ്ധതിയിടുന്നു എന്നും കുട്ടികൾ 'ഇൻസ്പയർ വെഡ്നസ്ഡേ' ഫോമുകളിൽ കുറിച്ചു. ചെറുപ്രായത്തിൽ തന്നെ കുട്ടികളിൽ വ്യക്തമായ ലക്ഷ്യബോധം വളർത്തിയെടുക്കാൻ ഈ പരിപാടിയിലൂടെ സാധിക്കുമെന്ന് ജില്ലാ കളക്ടർ ജി. പ്രിയങ്ക പറഞ്ഞു.
ആരോഗ്യ പാഠങ്ങളുമായി ബിന്ദു ചേച്ചി
സംവാദത്തിന് മുന്നോടിയായി കുട്ടികളുടെ വ്യക്തിശുചിത്വത്തെക്കുറിച്ചും ആരോഗ്യ സംരക്ഷണത്തെക്കുറിച്ചും അവബോധം നൽകുന്ന ക്ലാസും സംഘടിപ്പിച്ചിരുന്നു. 'ഇ-ഉന്നതി' എൻ.ജി. ഒയിൽ നിന്നുള്ള ഡോ. ബിന്ദു സത്യജിത് കുട്ടികളോട് സംവദിക്കുകയും, അവർക്കായി പേഴ്സണൽ ഹൈജീൻ കിറ്റുകൾ വിതരണം ചെയ്യുകയും ചെയ്തു.
വിദ്യാർത്ഥി സമ്പർക്ക പരിപാടിയുടെ ആദ്യ എഡിഷനിൽ തെങ്ങോട് ഗവ. ഹൈസ്കൂളിൽ നിന്നുള്ള 25 വിദ്യാർത്ഥിനികളാണ് പങ്കെടുത്തത്. വിദ്യാഭ്യാസ വകുപ്പിന്റെ നേതൃത്വത്തിൽ കുട്ടികൾക്കായി പ്രത്യേക ബസ് സൗകര്യവും ഒരുക്കിയിരുന്നു. ഇനി മുതൽ എല്ലാ ബുധനാഴ്ചകളിലും ജില്ലയിലെ വിവിധ സ്കൂളുകളിൽ നിന്നുള്ള കുട്ടികൾക്ക് ജില്ലാ കളക്ടറുമായി നേരിട്ട് സംവദിക്കാൻ 'ഇൻസ്പയർ വെഡ്നെസ്ഡേ'യിലൂടെ അവസരമൊരുങ്ങും.
