ജോസ് കെ. മാണി പാലായിൽ മത്സരിക്കും റോഷി അഗസ്റ്റിൻ മൈക്ക് പിടിച്ചുവാങ്ങി പ്രഖ്യാപനം നടത്തിയത് ചർച്ചയാകുന്നു.

​ജോസ് കെ. മാണി പാലായിൽ തന്നെ മത്സരിക്കും; മൈക്ക് പിടിച്ചുവാങ്ങി ഉറപ്പിച്ചു പറഞ്ഞ് റോഷി അഗസ്റ്റിൻ

​അടിമാലി: വരാനിരിക്കുന്ന നിയമസഭാ തിരഞ്ഞെടുപ്പിൽ കേരള കോൺഗ്രസ് (എം) ചെയർമാൻ ജോസ് കെ. മാണി പാലായിൽ തന്നെ ജനവിധി തേടുമെന്ന് മന്ത്രി റോഷി അഗസ്റ്റിൻ. അടിമാലിയിൽ എൽഡിഎഫ് മധ്യമേഖലാ വികസന മുന്നേറ്റ ജാഥയുടെ ഭാഗമായി നടന്ന വാർത്താസമ്മേളനത്തിലാണ് റോഷി അഗസ്റ്റിൻ ഇക്കാര്യം ആവർത്തിച്ച് വ്യക്തമാക്കിയത്.

​മത്സരരംഗത്തുണ്ടാകുമോ എന്ന ചോദ്യത്തിന് "പാർട്ടി തീരുമാനിക്കും" എന്ന് ജോസ് കെ. മാണി മറുപടി നൽകുന്നതിനിടെയാണ് റോഷി ഇടപെട്ടത്. ജോസിന്റെ കൈവശമിരുന്ന മൈക്ക് വാങ്ങി, "ജോസ് കെ. മാണി പാലായിൽ തന്നെ മത്സരിക്കും, അത് പാർട്ടിയുടെ തീരുമാനമാണ്" എന്ന് റോഷി ഉറപ്പിച്ചു പറഞ്ഞു. തുടർന്ന് മൈക്ക് തിരിച്ചുവാങ്ങാൻ ജോസ് കെ. മാണി ശ്രമിക്കുന്നതും കൗതുകകരമായ കാഴ്ചയായി.

​മാണി സി. കാപ്പനെതിരെ രൂക്ഷവിമർശനം

​പാലാ എംഎൽഎ മാണി സി. കാപ്പനെതിരെ കടുത്ത വിമർശനമാണ് വാർത്താസമ്മേളനത്തിൽ ജോസ് കെ. മാണി ഉന്നയിച്ചത്. പാലായിൽ വികസന പ്രവർത്തനങ്ങൾ നടന്നിട്ടില്ലെന്നും തന്റെ പരാജയം മറയ്ക്കാൻ കാപ്പൻ അനാവശ്യ ആരോപണങ്ങൾ ഉന്നയിക്കുകയാണെന്നും അദ്ദേഹം പറഞ്ഞു.

​യുഡിഎഫുമായി ചർച്ച നടത്തിയോ എന്ന് കുരിശുപള്ളി മാതാവിനു മുന്നിൽ വച്ച് പറയണമെന്ന കാപ്പന്റെ വെല്ലുവിളിക്കും ജോസ് മറുപടി നൽകി. "മാതാവിനെ പ്രാർത്ഥിക്കുന്ന ആളാണ് ഞാനും. ഉത്തരം മുട്ടുമ്പോൾ കൊഞ്ഞനം കുത്തുന്നവരോട് മറുപടിയില്ല" - ജോസ് കെ. മാണി വ്യക്തമാക്കി. നേരത്തെ കോട്ടയത്ത് നടന്ന സ്റ്റിയറിങ് കമ്മിറ്റി യോഗത്തിന് ശേഷവും റോഷി അഗസ്റ്റിൻ ഇതേ നിലപാട് വ്യക്തമാക്കിയിരുന്നു.