അഖിലേന്ത്യാ പണിമുടക്ക് ഇന്ന് അർധരാത്രി മുതൽ കേരളം സ്തംഭിക്കും.

കേന്ദ്ര നയങ്ങൾക്കെതിരെ രാജ്യം സ്തംഭിക്കും; 24 മണിക്കൂർ അഖിലേന്ത്യാ പണിമുടക്ക് ഇന്ന് അർധരാത്രി മുതൽ

​തിരുവനന്തപുരം: കേന്ദ്ര സർക്കാർ നയങ്ങൾക്കെതിരെ സംയുക്ത ട്രേഡ് യൂണിയൻ സമിതി പ്രഖ്യാപിച്ച 24 മണിക്കൂർ പണിമുടക്ക് ഇന്ന് അർധരാത്രി ആരംഭിക്കും. ലേബർ കോഡുകൾ പിൻവലിക്കുക, തൊഴിലുറപ്പു പദ്ധതി സംരക്ഷിക്കുക, വൈദ്യുതി നിയമഭേദഗതി പിൻവലിക്കുക തുടങ്ങിയ പത്തിന ആവശ്യങ്ങളുന്നയിച്ചാണ് സമരം.

​പങ്കെടുക്കുന്നവർ

​സിഐടിയു (CITU), ഐഎൻടിയുസി (INTUC) തുടങ്ങി പ്രമുഖ സംഘടനകളെല്ലാം സമരരംഗത്തുണ്ട്. സിപിഎം, സിപിഐ അടക്കമുള്ള രാഷ്ട്രീയ പാർട്ടികളും കർഷകത്തൊഴിലാളി, സർക്കാർ-അധ്യാപക സംഘടനകളും പണിമുടക്കിന് ഐക്യദാർഢ്യം പ്രഖ്യാപിച്ചിട്ടുണ്ട്. എന്നാൽ ബിഎംഎസ് (BMS) പണിമുടക്കിൽ പങ്കെടുക്കുന്നില്ല.

​സ്തംഭിക്കുന്ന മേഖലകൾ

​ഗതാഗതം: കെഎസ്ആർടിസി, സ്വകാര്യ ബസുകൾ, ഓട്ടോ, ടാക്സി, ലോറി തുടങ്ങിയവ നിരത്തിലിറങ്ങില്ല.

​വാണിജ്യം: ഷോപ്പിങ് മാളുകൾ, കടകമ്പോളങ്ങൾ, ഐടി മേഖല, ചെറുകിട വ്യവസായങ്ങൾ എന്നിവ പൂർണമായും അടഞ്ഞുകിടക്കും.

​ബാങ്കിങ് & ഇൻഷുറൻസ്: ബാങ്ക്, ഇൻഷുറൻസ്, പ്രതിരോധം, റെയിൽവേ, തുറമുഖം എന്നീ മേഖലകളിലെ ജീവനക്കാരും കരാർ തൊഴിലാളികളും പണിമുടക്കിനെ പിന്തുണയ്ക്കുന്നു.

​ഒഴിവാക്കപ്പെട്ടവ

​അത്യാവശ്യ സർവീസുകളായ പാൽ, പത്രം, ആശുപത്രികൾ, മരുന്ന് ഷോപ്പുകൾ, ഫയർ ആൻഡ് റെസ്‌ക്യൂ, ആംബുലൻസ് എന്നിവയെ പണിമുടക്കിൽ നിന്ന് ഒഴിവാക്കിയിട്ടുണ്ട്. കൂടാതെ:

​ശബരിമല തീർഥാടകർ, മാരാമൺ കൺവെൻഷൻ എന്നിവർക്ക് തടസ്സമുണ്ടാകില്ല.

​കോഴഞ്ചേരി, തോട്ടപ്പുഴശേരി പഞ്ചായത്തുകളെയും പണിമുടക്കിൽ നിന്ന് ഒഴിവാക്കിയിട്ടുണ്ട്.

​ബലപ്രയോഗമോ അക്രമമോ ഉണ്ടാകില്ലെന്നും സമാധാനപരമായ പണിമുടക്കാണ് ലക്ഷ്യമിടുന്നതെന്നും സിഐടിയു അഖിലേന്ത്യാ സെക്രട്ടറി എളമരം കരീം അറിയിച്ചു