കെഎസ്ആർടിസി ആശുപത്രി തിരുവനന്തപുരത്ത് മന്ത്രി ഗണേഷ് കുമാർ
കെഎസ്ആർടിസി ജീവനക്കാർക്കും പൊതുജനങ്ങൾക്കും കുറഞ്ഞ നിരക്കിൽ ചികിത്സ ഉറപ്പാക്കാൻ തിരുവനന്തപുരം കിഴക്കേകോട്ടയിൽ കെഎസ്ആർടിസി ആശുപത്രി വരുന്നു. ഡയാലിസിസ് സൗകര്യം, ന്യായവില ഫാർമസി തുടങ്ങി വിപുലമായ സൗകര്യങ്ങളാണ് മന്ത്രി കെ.ബി. ഗണേഷ് കുമാർ പ്രഖ്യാപിച്ചത്.
Angel Varghese 
കെഎസ്ആർടിസിയുടെ 'ആരോഗ്യവണ്ടി'; തിരുവനന്തപുരത്ത് പുതിയ ആശുപത്രി വരുന്നു, കുറഞ്ഞ നിരക്കിൽ ചികിത്സ
തിരുവനന്തപുരം: ഇനി ആനവണ്ടി മാത്രമല്ല, മികച്ച ചികിത്സയും കെഎസ്ആർടിസി ഉറപ്പാക്കുന്നു. തിരുവനന്തപുരം കിഴക്കേകോട്ടയിലെ കെഎസ്ആർടിസി ഭൂമിയിൽ പുതിയ സൂപ്പർ സ്പെഷ്യാലിറ്റി സൗകര്യങ്ങളുള്ള ആശുപത്രി വരുന്നു. കെഎസ്ആർടിസി ജീവനക്കാർക്കും സാധാരണക്കാരായ പൊതുജനങ്ങൾക്കും കുറഞ്ഞ നിരക്കിൽ ചികിത്സ ലഭ്യമാക്കുകയാണ് പദ്ധതിയുടെ ലക്ഷ്യം. നിയമസഭയിൽ ചോദ്യോത്തര വേളയിൽ ഗതാഗത മന്ത്രി കെ.ബി. ഗണേഷ് കുമാറാണ് ഇക്കാര്യം അറിയിച്ചത്.
പദ്ധതിയുടെ പ്രധാന സവിശേഷതകൾ:
കുറഞ്ഞ നിരക്കിൽ ഡയാലിസിസ്: ഇന്ത്യൻ ഓയിൽ കോർപ്പറേഷൻ, ഡയാലിസിസ് മിഷൻ, നിംസ് ആശുപത്രി എന്നിവയുടെ സഹകരണത്തോടെയാകും ഡയാലിസിസ് യൂണിറ്റ് പ്രവർത്തിക്കുക. നെഫ്രോളജിസ്റ്റിന്റെ സേവനം സൗജന്യമായിരിക്കും.
ന്യായവില ഫാർമസി: മരുന്നുകൾ ഏറ്റവും കുറഞ്ഞ നിരക്കിൽ ലഭ്യമാക്കാൻ ഹോസ്പിറ്റലിനോട് ചേർന്ന് ഫാർമസി സജ്ജീകരിക്കും.
ആദ്യ ഘട്ടം: തുടക്കത്തിൽ പത്ത് കിടക്കകളോട് കൂടിയ സൗകര്യമാണ് കിഴക്കേകോട്ടയിൽ ഒരുക്കുന്നത്.
എമർജൻസി യൂണിറ്റുകൾ: ഇതിന് പുറമെ സംസ്ഥാനത്തെ 14 പ്രധാന ഡിപ്പോകൾ കേന്ദ്രീകരിച്ച് എമർജൻസി മെഡിക്കൽ കെയർ യൂണിറ്റുകളും ആരംഭിക്കും.
കെഎസ്ആർടിസി ലാഭത്തിലേക്ക്; യാത്രക്കാരുടെ എണ്ണത്തിൽ വൻ വർധന
ആശുപത്രി പ്രഖ്യാപനത്തോടൊപ്പം കെഎസ്ആർടിസിയുടെ സാമ്പത്തിക മുന്നേറ്റത്തെക്കുറിച്ചും മന്ത്രി സംസാരിച്ചു. 2023-ൽ പ്രതിദിനം 19.35 ലക്ഷമായിരുന്ന യാത്രക്കാരുടെ എണ്ണം 2025-ൽ 20.27 ലക്ഷമായി ഉയർന്നു. വരുമാനത്തിലും വലിയ കുതിച്ചുചാട്ടമുണ്ടായിട്ടുണ്ട്. പ്രതിദിന വരുമാനം 6.69 കോടിയിൽ നിന്നും 8.25 കോടി രൂപയായി വർധിച്ചതായും മന്ത്രി സഭയിൽ വ്യക്തമാക്കി.
