അനാഥകുട്ടികളുടെ ക്ഷേമത്തിന് 371 കോടി രൂപ നൽകി എം.എ. യൂസഫലി യുഎഇയിൽ വൻ പ്രഖ്യാപനം
യുഎഇയിലെ അനാഥകുട്ടികളുടെ ഉന്നമനത്തിനായി ‘മദർ ഓഫ് ദ് നേഷൻ എൻഡോവ്മെന്റ്’ പദ്ധതിയിലേക്ക് 15 കോടി ദിർഹം (371 കോടി രൂപ) കൈമാറി ലുലു ഗ്രൂപ്പ് ചെയർമാൻ എം.എ. യൂസഫലി.
Angel Varghese 
യുഎഇയിലെ അനാഥകുട്ടികളുടെ ക്ഷേമത്തിന് 15 കോടി ദിർഹം കൈമാറി എം.എ. യൂസഫലി; ‘മദർ ഓഫ് ദ് നേഷൻ എൻഡോവ്മെന്റ്’ പദ്ധതിക്ക് കരുത്തായി ലുലു ഗ്രൂപ്പ്
അബുദാബി: യുഎഇയിലെ അനാഥകുട്ടികളുടെ ഉന്നമനവും സുരക്ഷയും ലക്ഷ്യമിട്ടുള്ള ‘മദർ ഓഫ് ദ് നേഷൻ എൻഡോവ്മെന്റ്’ (Mother of the Nation Endowment) പദ്ധതിക്ക് വൻ സഹായവുമായി ലുലു ഗ്രൂപ്പ് ചെയർമാൻ എം.എ. യൂസഫലി. 15 കോടി ദിർഹത്തിന്റെ (ഏകദേശം 371 കോടി രൂപ) ധനസഹായമാണ് അദ്ദേഹം പദ്ധതിയിലേക്ക് കൈമാറിയത്. വരാനിരിക്കുന്ന റമസാൻ കാലത്തിന് മുന്നോടിയായി പ്രഖ്യാപിച്ച ഈ കാരുണ്യസ്പർശം യുഎഇയിലെ ശിശുക്ഷേമ മേഖലയിൽ വലിയ മാറ്റങ്ങൾക്ക് വഴിതുറക്കും.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ പ്രത്യേക താല്പര്യപ്രകാരം അബുദാബി ഔഖാഫ് ആണ് ഈ പദ്ധതി നടപ്പിലാക്കുന്നത്. അനാഥരായ കുട്ടികളുടെ വിദ്യാഭ്യാസം, ആരോഗ്യപരിരക്ഷ, സാമൂഹിക ശാക്തീകരണം എന്നിവ ഉറപ്പാക്കി അവരുടെ ഭാവി സുരക്ഷിതമാക്കുന്നതിനാണ് പദ്ധതി മുൻഗണന നൽകുന്നത്.
"അബുദാബി ആസ്ഥാനമായി 52 വർഷമായി പ്രവർത്തിക്കുന്ന എനിക്ക് ഭരണാധികാരികളുടെ കാരുണ്യവഴിയിലുള്ള ഇത്തരം മഹത്തായ സംരംഭങ്ങളുടെ ഭാഗമാകാൻ കഴിഞ്ഞതിൽ വലിയ അഭിമാനമുണ്ട്," എന്ന് എം.എ. യൂസഫലി പറഞ്ഞു. രാഷ്ട്രപിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാനും രാഷ്ട്രമാതാവ് ഷെയ്ഖാ ഫാത്തിമ ബിൻത് മുബാറക്കും വിഭാവനം ചെയ്ത ജീവകാരുണ്യത്തിന്റെ പാതയാണ് ഈ പദ്ധതിയിലൂടെ പ്രതിഫലിക്കുന്നതെന്നും അദ്ദേഹം കൂട്ടിച്ചേർത്തു.
അബുദാബി ഔഖാഫിന്റെ നേരിട്ടുള്ള മേൽനോട്ടത്തിൽ ഒരു പ്രത്യേക നിക്ഷേപ പദ്ധതിയായാണ് ഇത് വിഭാവനം ചെയ്തിരിക്കുന്നത്. സഹായം അർഹരായവരിലേക്ക് കൃത്യമായി എത്തുന്നുണ്ടെന്ന് ഉറപ്പാക്കാൻ ശക്തമായ നിരീക്ഷണ സംവിധാനവും ഇതിനായി പ്രവർത്തിക്കുന്നുണ്ട്. ദാനധർമങ്ങളിലും സഹിഷ്ണുതയിലും അധിഷ്ഠിതമായ ഒരു സമൂഹത്തെ കെട്ടിപ്പടുക്കാനുള്ള യുഎഇയുടെ ശ്രമങ്ങൾക്ക് ഈ എൻഡോവ്മെന്റ് വലിയ ഊർജ്ജമാകും
