പായിപ്രയിൽ കുടിവെള്ളത്തിനായി ജനങ്ങൾ വലയുന്നു; വാട്ടർ അതോറിറ്റി ഓഫീസിലേക്ക് യു.ഡി.എഫ് സമരം
പായിപ്ര പഞ്ചായത്തിലെ രൂക്ഷമായ കുടിവെള്ളക്ഷാമത്തിനെതിരെ മൂവാറ്റുപുഴ വാട്ടർ അതോറിറ്റി ഓഫീസിൽ യു.ഡി.എഫ് ജനപ്രതിനിധികൾ പ്രതിഷേധിച്ചു. സർക്കാർ കുടിശ്ശിക നൽകാത്തതാണ് പ്രതിസന്ധിക്ക് കാരണമെന്ന് ആക്ഷേപം.
Angel Varghese 
പായിപ്രയിൽ കുടിവെള്ളക്ഷാമം രൂക്ഷം: വാട്ടർ അതോറിറ്റി ഓഫീസിൽ യു.ഡി.എഫ് ജനപ്രതിനിധികളുടെ പ്രതിഷേധം
മൂവാറ്റുപുഴ: എൽ.ഡി.എഫ് സർക്കാരിന്റെ അനാസ്ഥയിൽ പായിപ്ര പഞ്ചായത്തിൽ കുടിവെള്ള വിതരണം പൂർണ്ണമായും തടസ്സപ്പെട്ടതിനെതിരെ മൂവാറ്റുപുഴ വാട്ടർ അതോറിറ്റി ഓഫീസിൽ യു.ഡി.എഫ് ജനപ്രതിനിധികൾ പ്രതിഷേധ സമരം നടത്തി. പഞ്ചായത്തിലെ ജനങ്ങൾ കുടിവെള്ളത്തിനായി നെട്ടോട്ടമോടുമ്പോൾ സർക്കാർ സംവിധാനങ്ങൾ തികഞ്ഞ നിസ്സംഗത പാലിക്കുകയാണെന്ന് യു.ഡി.എഫ് ആരോപിച്ചു.
വാട്ടർ അതോറിറ്റി കരാറുകാർക്ക് ഒന്നര വർഷമായി ബില്ലുകൾ മാറി നൽകുന്നില്ലെന്നും, ഇതുമൂലമാണ് അറ്റകുറ്റപ്പണികളും ജലവിതരണവും നിലച്ചതെന്നും ഉദ്യോഗസ്ഥർ തന്നെ സമ്മതിച്ചതായി സമരക്കാർ ചൂണ്ടിക്കാട്ടി. പഞ്ചായത്ത് ഭരണസമിതി ടാങ്കർ ലോറികളിൽ കുടിവെള്ളം എത്തിച്ചാണ് നിലവിൽ ജനങ്ങളുടെ ദാഹം അകറ്റുന്നത്.
സർക്കാരിന്റെ പരാജയം മറച്ചുവെക്കാൻ എൽ.ഡി.എഫ് മെമ്പർമാർ ഒളിച്ചോടുകയാണെന്നും ജനങ്ങളുടെ അടിസ്ഥാന ആവശ്യങ്ങൾ കണ്ടില്ലെന്നു നടിക്കുന്ന ഭരണകൂടം ജനരോഷം നേരിടേണ്ടി വരുമെന്നും യു.ഡി.എഫ് നേതാക്കൾ മുന്നറിയിപ്പ് നൽകി. തടസ്സപ്പെട്ട ജലവിതരണം പുനഃസ്ഥാപിക്കും വരെ പ്രതിഷേധം തുടരാനാണ് ജനപ്രതിനിധികളുടെ തീരുമാനം.
