ജസ്ലിയയുടെ മരണം ഡോ. സിറിയക് ജോർജ് ഒളിവിൽ ലുക്ക് ഔട്ട് നോട്ടീസ് പുറപ്പെടുവിക്കാൻ പോലീസ്
അങ്കമാലിയിൽ വിദ്യാർഥിനിയെ കാറിടിപ്പിച്ചു കൊലപ്പെടുത്തിയ കേസിൽ ഡോക്ടർ അഞ്ചാം ദിവസവും ഒളിവിൽ. പ്രതിക്കായി പ്രത്യേക സംഘം അന്വേഷണം ഊർജിതമാക്കി.
Angel Varghese 
ജസ്ലിയയുടെ മരണം: അഞ്ചാം ദിവസവും ഒളിവിൽ തുടർന്ന് ഡോക്ടർ; ലുക്ക് ഔട്ട് നോട്ടീസ് പുറപ്പെടുവിക്കും
അങ്കമാലി: കോളജ് വിദ്യാർഥിനി ജസ്ലിയ ജോൺസനെ (19) കാറിടിപ്പിച്ചു കൊലപ്പെടുത്തിയ കേസിലെ പ്രതി ഡോ. സിറിയക് ജോർജ് ഒളിവിൽ തുടരുന്നു. അപകടം നടന്ന് അഞ്ച് ദിവസം പിന്നിട്ടിട്ടും പ്രതിയെ പിടികൂടാത്തതിൽ പ്രതിഷേധം ശക്തമായതോടെ അന്വേഷണത്തിനായി ആലുവ ഡിവൈഎസ്പിയുടെ നേതൃത്വത്തിൽ പ്രത്യേക സംഘത്തെ നിയോഗിച്ചു. പ്രതി രാജ്യം വിടാതിരിക്കാൻ ലുക്ക് ഔട്ട് നോട്ടീസ് പുറപ്പെടുവിക്കുമെന്ന് പോലീസ് അറിയിച്ചു.
ഫെബ്രുവരി 28-ന് അങ്കമാലി ടെൽക്ക് ജംക്ഷനു സമീപമാണ് അപകടമുണ്ടായത്. അങ്കമാലി മോണിങ് സ്റ്റാർ ഹോംസയൻസ് കോളജ് വിദ്യാർഥിനിയായ ജസ്ലിയ ജോലി കഴിഞ്ഞ് മടങ്ങുമ്പോഴാണ് സിറിയക് ജോർജ് ഓടിച്ച കാർ പിന്നിൽനിന്നിടിച്ച് തെറിപ്പിച്ചത്. അപകടത്തിന് ശേഷം കാർ നിർത്താതെ പോയി. തലയ്ക്ക് ഗുരുതരമായി പരിക്കേറ്റ ജസ്ലിയ മസ്തിഷ്കമരണത്തിന് കീഴടങ്ങിയതോടെ കുടുംബം അവയവദാനത്തിന് സമ്മതം മൂളുകയായിരുന്നു.
അന്വേഷണത്തിലെ വീഴ്ചകൾ:
അപകടത്തിന് പിന്നാലെ ഡോ. സിറിയക് താൻ ഹൗസ് സർജനായി ജോലി ചെയ്യുന്ന സ്വകാര്യ മെഡിക്കൽ കോളജിൽ രണ്ട് ദിവസം എത്തിയിരുന്നതായി സൂചനയുണ്ട്. എന്നിട്ടും പോലീസ് പ്രതിയെ പിടികൂടിയില്ലെന്ന ആക്ഷേപം ശക്തമാണ്. ഇടുക്കിയിലെയും അതിരമ്പുഴയിലെയും ബന്ധുവീടുകളിൽ പോലീസ് പരിശോധന നടത്തിയെങ്കിലും പ്രതിയെ കണ്ടെത്താനായിട്ടില്ല. കാർ പിന്നീട് ആലപ്പുഴ തുറവൂരിൽ നിന്ന് കണ്ടെത്തിയിരുന്നു.
നിലവിൽ കുറ്റകരമായ നരഹത്യക്കാണ് കേസെടുത്തിരിക്കുന്നത്. ഒപ്പമുണ്ടായിരുന്ന സഹപാഠി അക്ഷയ് പോലീസിൽ ഹാജരായി മൊഴി നൽകിയിട്ടുണ്ട്. പ്രതിയെ ഉടൻ പിടികൂടുമെന്ന് റൂറൽ എസ്പി കെ.എസ്. സുദർശൻ അറിയിച്ചു.
