വ്യവസായ സംരംഭകരുടെ പ്രശ്നപരിഹാരം ജില്ലാ ഏകജാലക ക്ലിയറൻസ് ബോർഡ് 15 പരാതികൾ തീർപ്പാക്കി
ജില്ലയിലെ വ്യവസായ ലൈസൻസ് നടപടികൾ വേഗത്തിലാക്കാൻ ജില്ലാ കളക്ടറുടെ നേതൃത്വത്തിൽ ചേർന്ന ഏകജാലക ക്ലിയറൻസ് ബോർഡ് യോഗത്തിൽ 15 അപേക്ഷകൾക്ക് തീർപ്പായി. സംരംഭകർക്ക് പരമാവധി സഹായം നൽകാൻ ഉദ്യോഗസ്ഥർക്ക് കളക്ടർ നിർദ്ദേശം നൽകി.
അനില എം കൃഷ്ണൻ 
സംരംഭകർക്ക് ആശ്വാസം; ജില്ലാ ഏകജാലക ക്ലിയറൻസ് ബോർഡ് യോഗത്തിൽ 15 പരാതികൾക്ക് തീർപ്പായി
പ്രത്യേക പ്രതിനിധി
സിവിൽ സ്റ്റേഷൻ: ജില്ലയിലെ വ്യവസായ സംരംഭകർ നേരിടുന്ന പ്രതിസന്ധികൾക്ക് പരിഹാരം കാണുന്നതിനും ലൈസൻസ് അപേക്ഷകളിൽ വേഗത്തിൽ നടപടി സ്വീകരിക്കുന്നതിനുമായി ജില്ലാ ഏകജാലക ക്ലിയറൻസ് ബോർഡിന്റെയും ജില്ലാതല പരാതി പരിഹാര സമിതിയുടെയും സംയുക്ത യോഗം ചേർന്നു. ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ ചേർന്ന യോഗത്തിൽ ആകെ 15 അപേക്ഷകൾ തീർപ്പാക്കി.
ജില്ലാ ഏകജാലക ക്ലിയറൻസ് ബോർഡ് പരിഗണിച്ച 32 അപേക്ഷകളിൽ 15 എണ്ണത്തിലാണ് അന്തിമ തീരുമാനമായത്. ഇതിനുപുറമെ, ജില്ലാതല പരാതി പരിഹാര സമിതിക്ക് മുന്നിലെത്തിയ ഏഴ് അപേക്ഷകളിൽ രണ്ടെണ്ണവും തീർപ്പാക്കി. കൂടുതൽ രേഖകൾ ഹാജരാക്കേണ്ടതും അപേക്ഷകർ നേരിട്ട് ഹാജരാകാത്തതുമായ 22 കേസുകൾ അടുത്ത യോഗത്തിലേക്ക് മാറ്റി.
നാടിന്റെ പുരോഗതിക്ക് കൂടുതൽ വ്യവസായ നിക്ഷേപങ്ങളും തൊഴിലവസരങ്ങളും അത്യാവശ്യമാണെന്ന് ജില്ലാ കളക്ടർ ജി. പ്രിയങ്ക പറഞ്ഞു. സംരംഭകർ സമർപ്പിക്കുന്ന അപേക്ഷകളിൽ നിയമപരമായ തടസ്സങ്ങൾ ഒഴിവാക്കി പരമാവധി പ്രായോഗിക പരിഹാരം കണ്ടെത്താൻ ഉദ്യോഗസ്ഥർ ശ്രദ്ധിക്കണമെന്നും കളക്ടർ നിർദ്ദേശിച്ചു. ലൈസൻസിംഗുമായി ബന്ധപ്പെട്ട നൂലാമാലകൾ കുറച്ച് വ്യവസായ സൗഹൃദ അന്തരീക്ഷം ഉറപ്പാക്കുകയാണ് സർക്കാരിന്റെ ലക്ഷ്യമെന്നും അവർ കൂട്ടിച്ചേർത്തു.
കളക്ടറേറ്റ് ട്രെയിനിംഗ് ഹാളിൽ നടന്ന യോഗത്തിൽ ജില്ലാ വ്യവസായ കേന്ദ്രം ജനറൽ മാനേജർ ഇൻ ചാർജ് പി. സ്വപ്ന, കെ.എസ്.എസ്.ഐ.എ ജില്ലാ പ്രസിഡന്റ് ടോം തോമസ്, ജില്ലാ വ്യവസായ കേന്ദ്രം മാനേജർ ജി. വിനോദ് എന്നിവർക്കൊപ്പം വിവിധ വകുപ്പുകളിലെ ഉന്നത ഉദ്യോഗസ്ഥരും പങ്കെടുത്തു
