പഴയ തട്ടകത്തിലേക്ക് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ കൊച്ചിയിൽ
മുൻ എറണാകുളം കളക്ടറും നിലവിലെ മുഖ്യ തിരഞ്ഞെടുപ്പ് കമ്മീഷണറുമായ ഗ്യാനേഷ് കുമാർ കൊച്ചി സന്ദർശിക്കുന്നു. ഗോശ്രീ പാലം ഉൾപ്പെടെയുള്ള തന്റെ ഭരണകാലത്തെ വികസന നേട്ടങ്ങൾ അദ്ദേഹം നേരിൽ കാണും.
Angel Varghese 
പഴയ തട്ടകത്തിലേക്ക് മുഖ്യ തിരഞ്ഞെടുപ്പ് കമ്മീഷണർ; ഓർമ്മകൾ പുതുക്കാൻ ഗ്യാനേഷ് കുമാർ കൊച്ചിയിൽ
കൊച്ചി: രണ്ട് പതിറ്റാണ്ട് മുൻപ് എറണാകുളം ജില്ലാ കളക്ടറായി നഗരത്തിന്റെ മുഖച്ഛായ മാറ്റിയ ഗ്യാനേഷ് കുമാർ വീണ്ടും തന്റെ പഴയ തട്ടകത്തിലേക്ക്. രാജ്യത്തിന്റെ മുഖ്യ തിരഞ്ഞെടുപ്പ് കമ്മീഷണർ എന്ന നിലയിൽ ഔദ്യോഗിക സന്ദർശനത്തിനായി കേരളത്തിലെത്തുന്ന അദ്ദേഹം, തന്റെ ഭരണകാലത്ത് നിർമ്മാണം പൂർത്തിയാക്കിയ പദ്ധതികൾ സന്ദർശിച്ച് ഓർമ്മകൾ പുതുക്കും.
2001 ജൂൺ മുതൽ 2004 ജൂലൈ വരെയുള്ള 36 മാസക്കാലം എറണാകുളം കളക്ടറായിരുന്ന ഗ്യാനേഷ് കുമാർ, ജില്ലയുടെ വികസന ചരിത്രത്തിൽ നിർണ്ണായകമായ പല മാറ്റങ്ങൾക്കും തുടക്കമിട്ട വ്യക്തിയാണ്. വരാനിരിക്കുന്ന നിയമസഭാ തിരഞ്ഞെടുപ്പ് ഒരുക്കങ്ങൾ വിലയിരുത്താൻ മാർച്ച് അഞ്ചിന് കൊച്ചിയിലെത്തുന്ന അദ്ദേഹം, തിരക്കേറിയ ഔദ്യോഗിക ചർച്ചകൾക്കിടയിലാണ് പഴയ വികസന പദ്ധതികൾ നേരിൽ കാണാൻ സമയം കണ്ടെത്തുന്നത്.
ഗോശ്രീ മുതൽ ചെറായി വരെ
വൈപ്പിൻ നിവാസികളുടെ പതിറ്റാണ്ടുകളായുള്ള സ്വപ്നമായിരുന്ന 'ഗോശ്രീ' പാലങ്ങളുടെ നിർമ്മാണം സമയബന്ധിതമായി പൂർത്തിയാക്കിയത് ഗ്യാനേഷ് കുമാറിന്റെ ഏറ്റവും വലിയ നേട്ടമായി കണക്കാക്കപ്പെടുന്നു. ബാങ്കുകളുടെ കൺസോർഷ്യം രൂപീകരിച്ച് ഫണ്ട് കണ്ടെത്തി, കളക്ടറായി ചുമതലയേറ്റു രണ്ടു മാസത്തിനുള്ളിൽ നിർമ്മാണം തുടങ്ങാനും സ്ഥാനമൊഴിയുന്നതിന് മുൻപ് അത് ഉദ്ഘാടനം ചെയ്യാനും അദ്ദേഹത്തിന് സാധിച്ചു.
മറൈൻ ഡ്രൈവിലെ ചീനവലപ്പാലം, മ്യൂസിക്കൽ വാക്ക് വേ, നവീകരിച്ച ദർബാർ ഹാൾ ഗ്രൗണ്ട്, എറണാകുളം ജനറൽ ആശുപത്രിയിലെ പുതിയ സമുച്ചയം, ചെറായി ബീച്ചിന്റെ പുനരുദ്ധാരണം എന്നിവയെല്ലാം അദ്ദേഹത്തിന്റെ ദീർഘവീക്ഷണത്തിൽ പിറന്നവയാണ്. മൂന്ന് ദിവസത്തെ സന്ദർശനത്തിനിടയിൽ ഈ പ്രധാന കേന്ദ്രങ്ങളെല്ലാം അദ്ദേഹം സന്ദർശിക്കും.
തിരഞ്ഞെടുപ്പ് ഉദ്യോഗസ്ഥരുമായുള്ള കൂടിക്കാഴ്ചയ്ക്ക് പുറമെ, കന്നി വോട്ടർമാരുമായും അദ്ദേഹം സംവദിക്കും. രണ്ട് ദശാബ്ദത്തിന് ശേഷമുള്ള തന്റെ ഈ മടക്കയാത്ര വൈകാരികവും അഭിമാനകരവുമാണെന്ന് അദ്ദേഹം സൂചിപ്പിച്ചു. ജില്ലാ ഭരണകൂടം അദ്ദേഹത്തിന്റെ സന്ദർശനത്തിനായി വിപുലമായ ക്രമീകരണങ്ങളാണ് ഒരുക്കിയിരിക്കുന്നത്.
