ചിന്നക്കനാൽ സൂര്യനല്ലി റോഡ് തകർന്നിട്ട് ആറ് വർഷം യാത്രാദുരിതത്തിൽ വലഞ്ഞ് നാട്ടുകാരും സഞ്ചാരികളും
മൂന്നാർ ചിന്നക്കനാൽ സൂര്യനല്ലി റോഡ് ആറ് വർഷമായി തകർന്നു കിടക്കുന്നു. കൊളുക്കുമല, ആനയിറങ്കൽ എന്നിവിടങ്ങളിലേക്കുള്ള യാത്ര ദുഷ്കരമായതോടെ വിനോദസഞ്ചാര മേഖലയും ഡ്രൈവർമാരും കടുത്ത പ്രതിസന്ധിയിലാണ്
അനില എം കൃഷ്ണൻ 
തകർന്നടിഞ്ഞ് സൂര്യനല്ലി - ചിന്നക്കനാൽ റോഡ്: വിനോദസഞ്ചാര മേഖല പ്രതിസന്ധിയിൽ യാത്രക്കാർ ദുരിതത്തിൽ
മൂന്നാർ: ലോകപ്രശസ്ത വിനോദസഞ്ചാര കേന്ദ്രങ്ങളായ കൊളുക്കുമലയിലേക്കും ആനയിറങ്കലിലേക്കും പോകുന്ന പ്രധാന പാതയായ ചിന്നക്കനാൽ - സൂര്യനല്ലി റോഡ് ആറ് വർഷമായി തകർന്നു കിടക്കുന്നു. അധികൃതരുടെ കടുത്ത അവഗണന മൂലം കുണ്ടും കുഴിയുമായി മാറിയ ഈ റോഡിലൂടെയുള്ള യാത്ര ഇപ്പോൾ അതിസാഹസികമാണ്.
കെ.എസ്.ആർ.ടി.സി, പ്രൈവറ്റ് ബസ്സുകൾ, നൂറുകണക്കിന് ടാക്സി ജീപ്പുകൾ എന്നിവ നിത്യേന സഞ്ചരിക്കുന്ന റോഡാണിത്. റോഡിന്റെ ശോചനീയാവസ്ഥ മൂലം വിനോദസഞ്ചാരികളുടെ വരവ് ഗണ്യമായി കുറഞ്ഞത് പ്രദേശത്തെ വ്യാപാര മേഖലയെ തളർത്തി. റിസോർട്ടുകൾ, ഹോംസ്റ്റേകൾ, ഹോട്ടലുകൾ എന്നിവയുടെ വരുമാനം നിലച്ച മട്ടാണ്.
തകർന്നടിയുന്ന ഉപജീവനമാർഗ്ഗങ്ങൾ
സഞ്ചാരികളെ ആശ്രയിച്ച് കുടുംബം പുലർത്തുന്ന ജീപ്പ്, ടാക്സി ഡ്രൈവർമാർ കടുത്ത സാമ്പത്തിക പ്രതിസന്ധിയിലാണ്. വണ്ടികളുടെ അറ്റകുറ്റപ്പണിക്ക് പോലും പണമില്ലാത്ത അവസ്ഥയാണെന്ന് ഇവർ പരാതിപ്പെടുന്നു. റോഡിലെ വലിയ കുഴികൾ കാരണം ഇരുചക്ര വാഹനയാത്രികർ അപകടത്തിൽപ്പെടുന്നത് നിത്യസംഭവമായി മാറിയിരിക്കുകയാണ്.
യുദ്ധകാലാടിസ്ഥാനത്തിൽ റോഡ് പുനർനിർമ്മിച്ച് പ്രദേശത്തെ വിനോദസഞ്ചാര മേഖലയെയും സാധാരണക്കാരുടെ ജീവിതത്തെയും സംരക്ഷിക്കണമെന്നാണ് നാട്ടുകാരുടെ ആവശ്യം.
