മൂന്നാറിൽ സ്ട്രോബറി വസന്തം; നാല് വർഷത്തെ ഇടവേളയ്ക്ക് ശേഷം ഹോർട്ടികോർപ് ഫാമിൽ വിളവെടുപ്പ് തുടങ്ങി
കാലാവസ്ഥാ വ്യതിയാനത്തെ അതിജീവിച്ച് മൂന്നാർ ഹോർട്ടികോർപ് ഫാമിൽ സ്ട്രോബറി വിളവെടുപ്പ് ആരംഭിച്ചു. വിനോദസഞ്ചാരികൾക്ക് നേരിട്ടെത്തി പഴങ്ങൾ വാങ്ങാൻ സൗകര്യമൊരുക്കിയിട്ടുണ്ട്
അനില എം കൃഷ്ണൻ 
മൂന്നാർ: നീണ്ട നാല് വർഷത്തെ ഇടവേളയ്ക്ക് ശേഷം മൂന്നാർ ഹോർട്ടികോർപ് ഫാമിൽ സ്ട്രോബറി വിളവെടുപ്പിന് തുടക്കമായി. മൂന്നാർ ടൗണിന് സമീപമുള്ള സൈലന്റ് വാലി റോഡിലെ ഫാമിലാണ് ഇത്തവണ സ്ട്രോബറി കൃഷി വിജയകരമായി പൂർത്തിയാക്കിയത്. ചില സാങ്കേതിക കാരണങ്ങളാൽ കഴിഞ്ഞ നാല് വർഷമായി ഇവിടെ കൃഷി നടന്നിരുന്നില്ല.
കാലാവസ്ഥാ വ്യതിയാനം മൂലം ഇത്തവണ കൃഷി രീതികളിൽ മാറ്റം വരുത്തിയിരുന്നു. സാധാരണയായി ഓഗസ്റ്റ് മാസത്തിൽ കൃഷി ആരംഭിച്ച് നവംബർ-ഡിസംബർ മാസങ്ങളിൽ വിളവെടുപ്പ് നടത്താറുള്ള സ്ഥാനത്ത്, ഇത്തവണ നവംബറിലാണ് തൈകൾ നടാൻ സാധിച്ചത്. പുണെയിൽ നിന്നെത്തിച്ച അത്യുൽപാദന ശേഷിയുള്ള 'നെബുല' ഇനത്തിൽപെട്ട ചെടികളാണ് ഇവിടെ ഉപയോഗിച്ചിരിക്കുന്നത്. വലിപ്പമേറിയ പഴങ്ങൾ ലഭിക്കുന്നു എന്നതാണ് ഈ ഇനത്തിന്റെ പ്രത്യേകത.
ആധുനിക കൃഷി രീതികളായ പ്ലാസ്റ്റിക് മൾച്ചിംഗ് (Plastic Mulching), തുള്ളിനന (Drip Irrigation) എന്നിവ ഉപയോഗിച്ചാണ് ചെടികൾ പരിപാലിക്കുന്നത്. കളകൾ ഒഴിവാക്കാനും ഈർപ്പം നിലനിർത്താനും ഇത് സഹായിക്കുന്നു. മൂന്നാറിലെത്തുന്ന വിനോദസഞ്ചാരികൾക്ക് ഫാം സന്ദർശിക്കാനും നേരിട്ട് പഴങ്ങൾ വാങ്ങാനും സൗകര്യമുണ്ട്. ഒരു കിലോ സ്ട്രോബറിക്ക് 600 രൂപയാണ് നിലവിലെ വില.
