പാലാരിവട്ടത്ത് യുവാവിനെ അപ്പാർട്ട്മെന്റിൽ വിളിച്ചുവരുത്തി ക്രൂരമർദ്ദനം പണവും ഫോണും കവർന്നു
കൊച്ചി പാലാരിവട്ടത്ത് യുവാവിനെ അപ്പാർട്ട്മെന്റിൽ തടഞ്ഞുവെച്ച് മർദ്ദിച്ച് പണം തട്ടിയ കേസിൽ പോലീസ് അന്വേഷണം ആരംഭിച്ചു. പരിക്കേറ്റ പെരുമ്പാവൂർ സ്വദേശി ആശുപത്രിയിൽ ചികിത്സയിലാണ്
Angel Varghese 
പാലാരിവട്ടത്ത് യുവാവിനെ അപ്പാർട്ട്മെന്റിൽ വിളിച്ചുവരുത്തി ക്രൂരമർദ്ദനം; പണവും ഫോണും കവർന്നു
പാലാരിവട്ടം: സുഹൃത്തെന്ന വ്യാജേന വിളിച്ചുവരുത്തി യുവാവിനെ ക്രൂരമായി മർദ്ദിച്ച് പണവും മൊബൈൽ ഫോണും കവർന്നതായി പരാതി. പെരുമ്പാവൂർ വെങ്ങോല സ്വദേശി കെ.വി. സന്ദീപാണ് (24) ആക്രമണത്തിന് ഇരയായത്. സംഭവത്തിൽ പാലാരിവട്ടം സ്വദേശി മനുവിനും കണ്ടാലറിയാവുന്ന മറ്റ് മൂന്ന് പേർക്കുമെതിരെ പോലീസ് കേസെടുത്തു.
സംഭവത്തെക്കുറിച്ച് പോലീസ് പറയുന്നത്:
കഴിഞ്ഞ മാർച്ച് 30-ന് വൈകിട്ട് നാല് മണിയോടെയാണ് ഒന്നാം പ്രതിയായ മനു, സന്ദീപിനെ പാടിവട്ടത്തെ അപ്പാർട്ട്മെന്റിലേക്ക് വിളിച്ചുവരുത്തിയത്. വൈകിട്ട് ആറോടെ അവിടെനിന്ന് മടങ്ങാൻ തുടങ്ങിയ സന്ദീപിനെ പ്രതികൾ തടഞ്ഞുനിർത്തുകയും ക്രൂരമായി മർദ്ദിക്കുകയുമായിരുന്നു. മനു സന്ദീപിന്റെ വയറ്റിൽ ചവിട്ടിയതായും മറ്റ് പ്രതികൾ ചേർന്ന് ശരീരമാസകലം മർദ്ദിച്ചതായും പരാതിയിൽ പറയുന്നു. ആക്രമണത്തിൽ സന്ദീപിന്റെ വാരിയെല്ലിന് പൊട്ടലേറ്റിട്ടുണ്ട്.
മർദ്ദനത്തിന് ശേഷം സന്ദീപിന്റെ കൈവശമുണ്ടായിരുന്ന മൊബൈൽ ഫോൺ പ്രതികൾ തട്ടിയെടുത്തു. തുടർന്ന് ഫോണിലെ വാലറ്റ് ആപ്പ് വഴി 24,757 രൂപ മറ്റൊരു അക്കൗണ്ടിലേക്ക് നിർബന്ധിതമായി അയപ്പിച്ചു. ഇതിന് പുറമെ സന്ദീപിന്റെ പഴ്സിലുണ്ടായിരുന്ന 13,000 രൂപയും പ്രതികൾ കവർന്നു.
ഗുരുതരമായി പരിക്കേറ്റ സന്ദീപ് നിലവിൽ കോലഞ്ചേരി മെഡിക്കൽ കോളേജ് ആശുപത്രിയിൽ ചികിത്സയിലാണ്. സന്ദീപിന്റെ മൊഴി രേഖപ്പെടുത്തിയ പാലാരിവട്ടം പോലീസ് പ്രതികൾക്കായി ഊർജിതമായ തിരച്ചിൽ ആരംഭിച്ചു.
