വാണിയമ്പലത്ത് വീട്ടുപറമ്പിലെ കിണറ്റിൽ വീണ് ഒന്നര വയസ്സുകാരൻ മരിച്ചു
മലപ്പുറം വാണിയമ്പലത്ത് വീട്ടുപറമ്പിലെ കിണറ്റിൽ വീണ് ഒന്നര വയസ്സുകാരൻ മരിച്ചു. കളിച്ചുകൊണ്ടിരുന്ന കുട്ടിയെ കാണാതായതിനെത്തുടർന്ന് നടത്തിയ തിരച്ചിലിലാണ് കിണറ്റിൽ കണ്ടെത്തിയത്.
Rajeev 
വാണിയമ്പലം: വീട്ടുപറമ്പിലെ കിണറ്റിൽ വീണ് ഒന്നര വയസ്സുകാരന് ദാരുണാന്ത്യം. വാണിയമ്പലം സ്വദേശിയായ അനന്തുവാണ് മരിച്ചത്. ബുധനാഴ്ച രാവിലെയാണ് നാടിനെ നടുക്കിയ സംഭവം നടന്നത്.
ബുധനാഴ്ച രാവിലെ 9:30-ഓടെ വീട്ടുപറമ്പിൽ കളിച്ചുകൊണ്ടിരിക്കുകയായിരുന്നു അനന്തു. പെട്ടെന്ന് കുട്ടിയെ കാണാതായതോടെ വീട്ടുകാരും നാട്ടുകാരും ചേർന്ന് പ്രദേശമാകെ വ്യാപകമായ തിരച്ചിൽ നടത്തിയെങ്കിലും കണ്ടെത്താനായില്ല. പിന്നീട് 11 മണിയോടെ വീട്ടുപറമ്പിലെ കിണറ്റിൽ പരിശോധന നടത്തിയപ്പോഴാണ് കുട്ടിയെ ഉള്ളിൽ വീണ നിലയിൽ കണ്ടെത്തിയത്.
ഉടൻ തന്നെ പുറത്തെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഏകദേശം 22 കോൽ താഴ്ചയുള്ള കിണറിൽ അത്യാവശ്യം വെള്ളമുണ്ടായിരുന്നു. കിണറിന്റെ കൈവരിക്ക് വെറും മൂന്ന് വരി ഇഷ്ടികയുടെ ഉയരം മാത്രമേ ഉണ്ടായിരുന്നുള്ളൂ എന്നത് അപകടത്തിന്റെ ആഘാതം വർദ്ധിപ്പിച്ചു. കളിക്കുന്നതിനിടയിൽ കുട്ടി അബദ്ധത്തിൽ കിണറ്റിലേക്ക് മറിഞ്ഞതാകാമെന്നാണ് പ്രാഥമിക നിഗമനം. നിയമപരമായ നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും.
