കാട്ടുങ്കൽ പോളച്ചനായി ജോജുവിന്റെ തേരോട്ടം ഷാജി കൈലാസ് ചിത്രം വരവ് ടീസർ പുറത്ത്
മലഞ്ചരക്കിന്റെ ഗന്ധമുള്ള ഹൈറേഞ്ച് പ്രതികാര കഥയുമായി ഷാജി കൈലാസ്. ജോജു ജോർജ് നായകനാകുന്ന വരവ് ചിത്രത്തിന്റെ ആവേശം നിറയ്ക്കുന്ന ടീസർ പുറത്തിറങ്ങി. മെയ് മാസത്തിൽ ചിത്രം തിയേറ്ററുകളിലേക്ക്.
Vazhoor Jose 
കാട്ടുങ്കൽ പോളച്ചന്റെ 'വരവ്'; ഹൈറേഞ്ച് പശ്ചാത്തലത്തിൽ ഷാജി കൈലാസിന്റെ മാസ് ആക്ഷൻ ത്രില്ലർ ടീസർ പുറത്ത്
കൊച്ചി: പ്രേക്ഷകർ ഏറെ ആകാംക്ഷയോടെ കാത്തിരുന്ന ഷാജി കൈലാസ് ചിത്രം 'വരവ്' ടീസർ പുറത്തിറങ്ങി. മലഞ്ചരക്കിന്റെ സുഗന്ധമുള്ള ഹൈറേഞ്ച് പശ്ചാത്തലത്തിൽ, നസ്രാണി കുടുംബങ്ങൾക്കിടയിലെ പകയുടെയും പ്രതികാരത്തിന്റെയും കഥ പറയുന്ന ചിത്രത്തിന്റെ ടീസർ വിഷുദിനമായ ഏപ്രിൽ 15-നാണ് റിലീസ് ചെയ്തത്. മികച്ച ആക്ഷൻ ചിത്രങ്ങൾ സമ്മാനിച്ചിട്ടുള്ള ഷാജി കൈലാസ്, തന്റെ കരിയറിലെ തന്നെ ഏറ്റവും മികച്ച മേക്കിംഗുമായാണ് ഇത്തവണ എത്തുന്നത്.
എ.കെ. പോൾസൺ എന്ന 'കാട്ടുങ്കൽ പോളച്ചൻ' ആയി ജോജു ജോർജ് വെള്ളിത്തിരയിൽ തകർപ്പൻ പ്രകടനമാണ് കാഴ്ചവെച്ചിരിക്കുന്നത്. പത്ത് ദിവസത്തെ പരോളിലിറങ്ങുന്ന പോളച്ചന്റെ ജീവിതവും അതിനെ ചുറ്റിപ്പറ്റിയുള്ള രാഷ്ട്രീയ - സാമൂഹിക കിടമത്സരങ്ങളുമാണ് ചിത്രത്തിന്റെ ഇതിവൃത്തം. മധ്യതിരുവിതാംകൂറിലെ പ്രബല കുടുംബങ്ങൾക്കിടയിലെ ശത്രുതയും പവർ പോളിറ്റിക്സും ചിത്രം ചർച്ച ചെയ്യുന്നു.
എ.കെ. സാജൻ തിരക്കഥയൊരുക്കുന്ന ചിത്രത്തിൽ അർജുൻ അശോകൻ, മുരളി ഗോപി എന്നിവരും സുപ്രധാന വേഷങ്ങളിലുണ്ട്. കൂടാതെ സുകന്യ, വാണി വിശ്വനാഥ്, വിൻസി അലോഷ്യസ്, സാനിയ ഇയ്യപ്പൻ, ബാബുരാജ്, ബൈജു സന്തോഷ് തുടങ്ങി വലിയൊരു താരനിര തന്നെ അണിനിരക്കുന്നുണ്ട്. എട്ട് തകർപ്പൻ ആക്ഷൻ രംഗങ്ങളാണ് ചിത്രത്തിന്റെ പ്രധാന ആകർഷണം.
ഓൾഗ പ്രൊഡക്ഷൻസിന്റെ ബാനറിൽ നൈസി റെജി നിർമ്മിക്കുന്ന ചിത്രം മെയ് മാസത്തിൽ തീയേറ്ററുകളിലെത്തും. എസ്. ശരവണൻ ക്യാമറയും ഷമീർ മുഹമ്മദ് എഡിറ്റിംഗും നിർവ്വഹിക്കുന്നു. മൂന്നാർ, വാഗമൺ, കോട്ടയം തുടങ്ങിയ ലൊക്കേഷനുകളിലായാണ് ചിത്രീകരണം പൂർത്തിയാക്കിയത്
