ബിഎസ്എൻഎൽ സഹകരണ സംഘം നിക്ഷേപത്തട്ടിപ്പ് അന്വേഷണം ശക്തമാക്കി ഇഡി

ബിഎസ്എൻഎൽ സഹകരണ സംഘം നിക്ഷേപത്തട്ടിപ്പ്: ഇഡി അന്വേഷണം ഊർജിതമാക്കി; രേഖകൾ പിടിച്ചെടുത്തു

​തിരുവനന്തപുരം: ബിഎസ്എൻഎൽ എൻജിനീയേഴ്സ് സഹകരണ സംഘത്തിലെ 300 കോടി രൂപയുടെ നിക്ഷേപത്തട്ടിപ്പ് കേസിൽ എൻഫോഴ്സ്മെന്റ് ഡയറക്ടറേറ്റ് (ഇഡി) അന്വേഷണം പുനരാരംഭിച്ചു. കള്ളപ്പണം വെളുപ്പിക്കൽ ഉൾപ്പെടെയുള്ള ഗുരുതരമായ ആരോപണങ്ങളുടെ പശ്ചാത്തലത്തിലാണ് കേന്ദ്ര ഏജൻസിയുടെ ഇടപെടൽ.

​നിക്ഷേപത്തട്ടിപ്പുമായി ബന്ധപ്പെട്ട് തിരുവനന്തപുരം ജില്ലാ സെൻട്രൽ ഗവ. പെൻഷനേഴ്സ് കോഓപ്പറേറ്റീവ് സൊസൈറ്റിക്ക് നഷ്ടപ്പെട്ട 3.78 കോടി രൂപയുടെ വിവരങ്ങൾ ശേഖരിക്കുന്നതിനായി ഇഡി ഉദ്യോഗസ്ഥർ തിരുവനന്തപുരത്തെത്തി. സൊസൈറ്റിയുടെ നിലവിലെ ഭരണസമിതി അംഗങ്ങളിൽ നിന്ന് മൊഴിയെടുക്കുകയും, ഇതുമായി ബന്ധപ്പെട്ട നിർണായക രേഖകൾ പരിശോധിക്കുകയും ചെയ്തു. അക്കൗണ്ടന്റ് ജനറൽ ഓഫിസിൽനിന്ന് വിരമിച്ച ഉദ്യോഗസ്ഥർ ഉൾപ്പെടെയുള്ളവരാണ് പെൻഷനേഴ്സ് സൊസൈറ്റിയിലെ അംഗങ്ങൾ.

​സിഎംആർഎൽ – എക്സാലോജിക് സാമ്പത്തിക ഇടപാട് കേസ് അന്വേഷിക്കുന്ന അതേ ഇഡി സംഘം തന്നെയാണ് ബിഎസ്എൻഎൽ തട്ടിപ്പു കേസും അന്വേഷിക്കുന്നത്. മുൻ ഭരണസമിതിയുടെ കാലത്താണ് പെൻഷനേഴ്സ് സൊസൈറ്റി ബിഎസ്എൻഎൽ സഹകരണ സംഘത്തിൽ പണം നിക്ഷേപിച്ചത്. അന്ന് പെൻഷനേഴ്സ് സൊസൈറ്റി സെക്രട്ടറിയായിരുന്ന വ്യക്തി തന്നെയാണ് സി. അച്യുതമേനോൻ ഫൗണ്ടേഷന്റെയും സെക്രട്ടറി. ഫൗണ്ടേഷൻ ബിഎസ്എൻഎൽ സൊസൈറ്റിയിൽ നടത്തിയ 18 ലക്ഷം രൂപയുടെ നിക്ഷേപം തിരികെ ലഭിക്കാത്തതുമായി ബന്ധപ്പെട്ട കേസും നിലവിലുണ്ട്.

​അതേസമയം, നിക്ഷേപം തിരികെ ലഭിക്കണമെന്നാവശ്യപ്പെട്ട് നിക്ഷേപകർ രൂപീകരിച്ച 'ബിഎസ്എൻഎൽ ഡെപ്പോസിറ്റേഴ്സ് അസോസിയേഷൻ' ഹൈക്കോടതിയിൽ റിട്ട് ഹർജി ഫയൽ ചെയ്തിട്ടുണ്ട്. ഇഡിയുടെ അപ്രതീക്ഷിത നീക്കം കേസിൽ വരും ദിവസങ്ങളിൽ കൂടുതൽ നടപടികളിലേക്ക് വഴിവെച്ചേക്കുമെന്നാണ് സൂചന.