ഓണത്തോടനുബന്ധിച്ച് ഭക്ഷ്യസുരക്ഷാ പരിശോധന ശക്തമാക്കി വൈറ്റിലയിൽ സ്ഥാപനം അടപ്പിച്ചു
എറണാകുളം ജില്ലയിൽ ആരോഗ്യ വകുപ്പും ഫുഡ് സേഫ്റ്റിയും ചേർന്ന് ഓണത്തോടനുബന്ധിച്ച് പ്രത്യേക ഭക്ഷ്യസുരക്ഷാ പരിശോധന തുടങ്ങി. വൈറ്റിലയിൽ നടത്തിയ പരിശോധനയിൽ ഒരു കട അടപ്പിച്ചു, 3 കടകൾക്ക് പിഴ ചുമത്തി.
Abu TA 
കൊച്ചിയിൽ ഓണത്തോടനുബന്ധിച്ച് പ്രത്യേക ഭക്ഷ്യസുരക്ഷാ പരിശോധന തുടക്കമായി; വൈറ്റിലയിൽ തട്ടുകട അടപ്പിച്ചു
വൈറ്റില (എറണാകുളം): ഓണാഘോഷങ്ങൾക്ക് മുന്നോടിയായി കൊച്ചി നഗരത്തിലെ ഭക്ഷണശാലകൾ കേന്ദ്രീകരിച്ച് ആരോഗ്യ വകുപ്പും ഫുഡ് സേഫ്റ്റിയും സംയുക്തമായി പ്രത്യേക ഡ്രൈവ് ആരംഭിച്ചു. ഓഗസ്റ്റ് 11-ന് വൈകീട്ട് വൈറ്റില ഭാഗത്തെ 10 സ്ഥാപനങ്ങളിൽ നടത്തിയ മിന്നൽ പരിശോധനയിൽ ഗുരുതര വീഴ്ചകൾ കണ്ടെത്തിയതിനെ തുടർന്ന് ഒരു തട്ടുകട അടപ്പിച്ചു.
ശുചിത്വ മാനദണ്ഡങ്ങൾ പാലിക്കാത്ത 3 കടകൾക്ക് 14,500 രൂപ പിഴ ചുമത്തി. കൂടാതെ, കുടിവെള്ള പരിശോധനാ റിപ്പോർട്ട് ലഭ്യമല്ലാതിരുന്ന 6 കടകളിൽ നിന്നും വെള്ളത്തിന്റെ സാമ്പിളുകൾ ശേഖരിച്ച് ലബോറട്ടറി പരിശോധനയ്ക്കായി അയച്ചിട്ടുണ്ട്. ആരോഗ്യ വകുപ്പ്, ഫുഡ് സേഫ്റ്റി, കൊച്ചി നഗരസഭ ആരോഗ്യ വിഭാഗം, പോലീസ് എന്നിവരുടെ സഹകരണത്തോടെയാണ് റൈഡ് സംഘടിപ്പിച്ചത്.
ആഹാരപാനീയങ്ങൾ തയ്യാറാക്കുന്നതും വിതരണം ചെയ്യുന്നതുമായ എല്ലാ സ്ഥാപനങ്ങളും ഭക്ഷ്യസുരക്ഷാ മാനദണ്ഡങ്ങൾ കർശനമായി പാലിക്കണമെന്ന് ജില്ലാ മെഡിക്കൽ ഓഫീസർ (ഡി.എം.ഒ) ഡോ. ഷാഹിർ ഷാ ആർ നിർദ്ദേശിച്ചു. പരിശോധനയോടൊപ്പം ഹോട്ടലുടമകൾക്കും ജീവനക്കാർക്കും ബോധവത്കരണം നൽകുകയും, പാലിക്കേണ്ട മാർഗ്ഗനിർദ്ദേശങ്ങൾ അടങ്ങിയ പോസ്റ്ററുകൾ കടകളിൽ പ്രദർശിപ്പിക്കുകയും ചെയ്തു. വരുന്ന ദിവസങ്ങളിൽ കൊച്ചിയുടെ മറ്റ് പ്രദേശങ്ങളിലേക്കും പരിശോധന വ്യാപിപ്പിക്കുമെന്നും അധികൃതർ അറിയിച്ചു.
ഡി.എം.ഒ ഓഫീസിലെ ടെക്നിക്കൽ അസിസ്റ്റന്റുമാരായ സന്തോഷ് കെ.റ്റി, ബാബു എം.ആർ, ഫുഡ് സേഫ്റ്റി ഓഫീസർ ആദർശ്, കോർപ്പറേഷൻ ഹെൽത്ത് ഇൻസ്പെക്ടർമാരായ അഖില, സ്വപ്ന, അജീഷ് എന്നിവരുടെ നേതൃത്വത്തിലായിരുന്നു പരിശോധന.
