കേരളത്തിൽ ഇന്ന് ഒരാൾക്ക് കൂടി ഷിഗെല്ല സ്ഥിരീകരിച്ചു കൊല്ലത്ത് രോഗബാധ നിപ സമ്പർക്കപ്പട്ടികയിലുള്ള 4 പേർ ക്വാറന്റൈൻ പൂർത്തിയാക്കി
കേരളത്തിൽ നിപ സമ്പർക്കപ്പട്ടികയിലുള്ള കൂടുതൽ പേരെ ക്വാറന്റൈനിൽ നിന്നും ഒഴിവാക്കി. അതേസമയം കൊല്ലം ജില്ലയിൽ ഒരാൾക്ക് കൂടി ഷിഗെല്ല സ്ഥിരീകരിച്ചു. ജൂൺ മാസത്തിൽ മാത്രം 191 പേർക്കാണ് ഷിഗെല്ല ബാധിച്ചത്.
Angel Varghese 
നിപ ഉയർന്ന റിസ്ക് വിഭാഗത്തിലുള്ള 4 പേർ കൂടി ക്വാറന്റൈൻ പൂർത്തിയാക്കി; സംസ്ഥാനത്ത് ഒരു ഷിഗെല്ല കേസ് കൂടി
തിരുവനന്തപുരം: സംസ്ഥാനത്ത് നിപ പ്രതിരോധ പ്രവർത്തനങ്ങളിൽ വലിയ ആശ്വാസം. നിപ ബാധിതന്റെ സമ്പർക്കപ്പട്ടികയിൽ ഉൾപ്പെട്ട് 21 ദിവസത്തെ കർശന നിരീക്ഷണം പൂർത്തിയാക്കിയ, ഉയർന്ന റിസ്ക് വിഭാഗത്തിൽപ്പെട്ട 4 പേരെക്കൂടി ക്വാറന്റൈനിൽ നിന്നും ഒഴിവാക്കി. ഇവർക്കൊപ്പം കുറഞ്ഞ റിസ്ക് വിഭാഗത്തിൽപ്പെട്ട 22 പേരെയും ഇന്ന് നിരീക്ഷണത്തിൽ നിന്നും ഒഴിവാക്കിയിട്ടുണ്ട്. നിരീക്ഷണ കാലയളവിൽ ഇവർക്ക് യാതൊരുവിധ രോഗലക്ഷണങ്ങളും പ്രകടിപ്പിക്കാത്തതിനെ തുടർന്നാണ് നടപടി. രോഗബാധിതന്റെ കുടുംബാംഗങ്ങൾ, സുഹൃത്തുക്കൾ, സഹപ്രവർത്തകർ, ആരോഗ്യപ്രവർത്തകർ എന്നിവരാണ് നിരീക്ഷണത്തിലുണ്ടായിരുന്നത്.
ഇതോടെ ഉയർന്ന റിസ്ക് വിഭാഗത്തിൽ നിന്ന് ക്വാറന്റൈൻ പൂർത്തിയാക്കിയവരുടെ ആകെ എണ്ണം 7 ആയി. കുറഞ്ഞ റിസ്ക് വിഭാഗത്തിൽ നിന്ന് 34 പേരും നിരീക്ഷണം പൂർത്തിയാക്കി. നിലവിൽ വളരെ ഉയർന്ന റിസ്ക് വിഭാഗത്തിലെ 4 പേരും, ഉയർന്ന റിസ്ക് വിഭാഗത്തിലെ 7 പേരും ഉൾപ്പെടെ ആകെ 11 പേരാണ് ക്വാറന്റൈനിലുള്ളത്. കുറഞ്ഞ റിസ്ക് വിഭാഗത്തിൽപ്പെട്ട 52 പേർ ഇപ്പോഴും നിരീക്ഷണത്തിലാണ്.
ജൂൺ 10 മുതൽ ജില്ലയിൽ നിപ സമാന ലക്ഷണങ്ങളോടെ എത്തിയ 57 പേരിൽ നടത്തിയ പരിശോധനാ ഫലങ്ങളും നെഗറ്റീവാണ്. അതേസമയം, നിപ ബാധിതനായ വ്യക്തി കോഴിക്കോട് മെഡിക്കൽ കോളേജിൽ വെന്റിലേറ്ററിൽ ചികിത്സയിൽ തുടരുകയാണ്.
പൊതുജനങ്ങളുടെ സംശയനിവാരണത്തിനായി ജില്ലാ കൺട്രോൾ റൂമിൽ ഇതുവരെ 95 ഫോൺ വിളികളാണ് എത്തിയത്. സമ്പർക്കപ്പട്ടികയിലുള്ളവരെ ആരോഗ്യപ്രവർത്തകർ ഫോൺ വഴി നിരന്തരം ബന്ധപ്പെടുന്നുണ്ട്. കൂടാതെ ജില്ലാ മാനസികാരോഗ്യ പരിപാടിയുടെ ഭാഗമായി 125 പേർക്ക് ഫോൺ വഴി കൗൺസിലിംഗും മാനസിക പിന്തുണയും ഉറപ്പാക്കിയിട്ടുണ്ട്.
കൊല്ലത്ത് ഒരു ഷിഗെല്ല കേസ് കൂടി; ജൂണിൽ മാത്രം 6 മരണം
സംസ്ഥാനത്ത് ഇന്ന് ഒരാൾക്ക് കൂടി ഷിഗെല്ല രോഗബാധ സ്ഥിരീകരിച്ചു. കൊല്ലം ജില്ലയിലാണ് പുതിയ കേസ് റിപ്പോർട്ട് ചെയ്തത്. ഇതോടെ ഈ വർഷം സംസ്ഥാനത്ത് ഷിഗെല്ല സ്ഥിരീകരിച്ചവരുടെ എണ്ണം 267 ആയി ഉയർന്നു. ജൂൺ മാസത്തിൽ മാത്രം 191 പേർക്കാണ് രോഗബാധ ഉണ്ടായത്; 6 മരണങ്ങളും റിപ്പോർട്ട് ചെയ്തിട്ടുണ്ട്.
ജൂൺ മാസത്തിൽ കോഴിക്കോട്, മലപ്പുറം, വയനാട് ജില്ലകളിലാണ് ഏറ്റവും കൂടുതൽ ഷിഗെല്ല കേസുകൾ റിപ്പോർട്ട് ചെയ്തത്. നിലവിൽ കോഴിക്കോട് (65), വയനാട് (26), തൃശൂർ (13), ആലപ്പുഴ (5) എന്നീ നാല് ജില്ലകളിൽ ഔട്ബ്രേക്ക് (രോഗവ്യാപനം) പ്രഖ്യാപിച്ചിട്ടുണ്ട്. ഇവയ്ക്ക് പുറമെ മലപ്പുറം (30), തിരുവനന്തപുരം (18), കൊല്ലം (13), കണ്ണൂർ (11), എറണാകുളം (4), ഇടുക്കി (3), പാലക്കാട് (3) എന്നീ ജില്ലകളിലും ജൂൺ മാസത്തിൽ ഷിഗെല്ല കേസുകൾ റിപ്പോർട്ട് ചെയ്തിട്ടുണ്ട്. ആരോഗ്യവകുപ്പ് പ്രതിരോധ നടപടികൾ ശക്തമാക്കി.
