മാധ്യമ സ്വാതന്ത്ര്യത്തിന്മേൽ കടന്നുകയറ്റം പുതിയ തലമുറൈ ചാനലിനെ പൂട്ടിട്ട് ജോസഫ് വിജയ് സർക്കാർ അരശ് കേബിളിൽ നിന്ന് ഒഴിവാക്കി
തമിഴ്നാട്ടിൽ ജോസഫ് വിജയ് സർക്കാരിനെ വിമർശിച്ച പുതിയ തലമുറൈ വാർത്താ ചാനലിനെ സർക്കാർ കേബിൾ ശൃംഖലയായ അരശ് ടിവിയിൽ നിന്നും നീക്കം ചെയ്തു. മാധ്യമ സ്വാതന്ത്ര്യത്തിന്മേലുള്ള കടന്നുകയറ്റത്തിനെതിരെ ചെന്നൈ പ്രസ് ക്ലബ് ഉൾപ്പെടെയുള്ള സംഘടനകൾ പ്രതിഷേധവുമായി രംഗത്ത്.
Angel Varghese 
മാധ്യമ സ്വാതന്ത്ര്യത്തിന്മേൽ കടന്നുകയറ്റം: 'പുതിയ തലമുറൈ' ചാനലിനെ പൂട്ടിട്ട് വിജയ് സർക്കാർ; അരശ് കേബിളിൽ നിന്ന് ഒഴിവാക്കി
ചെന്നൈ: തമിഴ്നാട്ടിലെ പ്രമുഖ വാർത്താ ചാനലായ ‘പുതിയ തലമുറൈ’ക്കെതിരെ പ്രതികാര നടപടിയുമായി മുഖ്യമന്ത്രി ജോസഫ് വിജയിന്റെ സർക്കാർ. സർക്കാരിന്റെ ഔദ്യോഗിക കേബിൾ നെറ്റ്വർക്കായ തമിഴ്നാട് അരശ് കേബിൾ ടിവിയിൽ (TACTV) നിന്നും ചാനലിനെ പൂർണ്ണമായും നീക്കം ചെയ്തു. മുൻകൂട്ടി യാതൊരുവിധ നോട്ടീസും നൽകാതെയാണ് സർക്കാർ ഈ അപ്രതീക്ഷിത നടപടി സ്വീകരിച്ചിരിക്കുന്നത്.
വിമർശനങ്ങൾക്ക് പിന്നാലെ പ്രതികാരം
കഴിഞ്ഞ കുറച്ചു ദിവസങ്ങളായി സംസ്ഥാനത്തെ ക്രമസമാധാന പ്രശ്നങ്ങളെക്കുറിച്ച് ‘പുതിയ തലമുറൈ’ ചാനൽ തുടർച്ചയായി വാർത്തകൾ നൽകിയിരുന്നു. കൂടാതെ ചെന്നൈ നീലാങ്കരയിലെ വീട്ടിൽ നിന്നുള്ള മുഖ്യമന്ത്രി ജോസഫ് വിജയിന്റെ യാത്രകൾ കാരണം പൊതുജനങ്ങൾക്കും ട്രാഫിക് നിയന്ത്രിക്കുന്ന പൊലീസിനും ഉണ്ടാകുന്ന കടുത്ത ബുദ്ധിമുട്ടുകളെക്കുറിച്ചും ചാനൽ റിപ്പോർട്ട് ചെയ്തിരുന്നു.
മുഖ്യമന്ത്രിയുടെ ഡൽഹി സന്ദർശനത്തിന് ശേഷം മാധ്യമങ്ങളെ പൂർണ്ണമായി ഒഴിവാക്കിയ നടപടിയെയും ചാനൽ രൂക്ഷമായി വിമർശിച്ചിരുന്നു. ഡൽഹി സന്ദർശന വേളകളിൽ മുഖ്യമന്ത്രിമാർ വാർത്താസമ്മേളനം നടത്തുന്നത് പതിവായിരുന്നു. എന്നാൽ ഇതിൽ നിന്നെല്ലാം വിഭിന്നമായി മാധ്യമങ്ങളെ കാണാതെ വിജയ് മടങ്ങിയത് ചാനൽ ചർച്ചയാക്കിയിരുന്നു. ഇതിന് പിന്നാലെയാണ് സർക്കാരിന്റെ ഭാഗത്തുനിന്നും ചാനലിനെതിരെയുള്ള അച്ചടക്ക നടപടി ഉണ്ടായത്.
ശക്തമായ പ്രതിഷേധവുമായി മാധ്യമ ലോകം
സർക്കാരിന്റെ ഈ നീക്കം മാധ്യമ സ്വാതന്ത്ര്യത്തിന്മേലുള്ള നഗ്നമായ കടന്നുകയറ്റമാണെന്നും ജനാധിപത്യ വിരുദ്ധമാണെന്നും ആരോപിച്ച് ചാനൽ അധികൃതരും വിവിധ മാധ്യമ സംഘടനകളും രംഗത്തെത്തിയിട്ടുണ്ട്.
വിഷയത്തിൽ ചെന്നൈ പ്രസ് ക്ലബ് ശക്തമായ പ്രതിഷേധം രേഖപ്പെടുത്തി. ചാനലിനെതിരെയുള്ള നടപടി അഭിപ്രായ സ്വാതന്ത്ര്യത്തിനു മേലുള്ള കടന്നാക്രമണമാണെന്നും, നീക്കം ചെയ്ത ചാനൽ അടിയന്തരമായി പുനഃസ്ഥാപിച്ചില്ലെങ്കിൽ ശക്തമായ പരസ്യപ്രതിഷേധങ്ങളിലേക്ക് കടക്കുമെന്നും ചെന്നൈ പ്രസ് ക്ലബ് പ്രസ്താവനയിലൂടെ മുന്നറിയിപ്പ് നൽകി.
